Chiin 3 - Ku̍o̍ Delee 1999

Wɔ̍n nu̍ kanɛa dɛ̍

¹ Ǐn de̍di̍i̍ᵻ, mɔ̀-a nyɔ̍ dɔu bɔ̌ nǎ po̍ nyɔ̍ nu̍-ɛ. Dɛ̍nu̍ɛ, mɔ̀ juo ɛ̍-ɛ, àɔ̀ nu̍-a nǎ po̍ nyɔ̍-ɛ, à naɛ sàwi̍h-a mu̍ wɔ̍n ku̍ ɛ̍ iě-o dɛ̍ i̍ sìì.

² À kli̍hgbɛ̍ la à sì dɛ̍ i̍ ti̍ kli̍hgbɛ̍ we̍. Pò nyɔ̍-ɔ se̍a wlu̍ i̍ sì-ɛ, nɛ̀ ɔ̍ wɛ̀ nɛi̍ wɛ̀. Nɛ̀ ɔ̍ bɛ̌ɛ ɔ̍ chɛ̀ i̍ gbɛ̍n-ɛ dǒ dɛ̍ᵻ kli̍hgbɛ̍ we̍.

³ À po̍ soo̍bli dbǔ wɔ̍ɔ̍n wɛ̀ ɛ̍ iě à wlùh nu̍. Nɛ̀ à fèàɛ̀ ɛ̍-ɛ tà kli̍hgbɛ̍ à pɔ̀n-a ɛ̍ iě-a mu̍-ɛ.

⁴ Gbɛ̀n blǎgbè ja̍ ìè jě ke. Ɛ̍ nu̍ dɛ̍ slìì iě tìlèè poɔ-a bli̍a ɛ̍. Tipɛ̌n juwɛ bo bli̍a nyɔ̍-a nu̍ iě ɔ̍ po̍ ɛ̍ wìè-e, iě ɛ̍ mu̍ tà ɔ̍ pɔ̀n-a ɛ̍ iě-a mu̍-ɛ.

⁵ Kǎ wɔ̍n-a tìh nɛ. Ɛ̍ wàn i̍ sǔh wɛ̀ ɛ̍ blɔ̌ dǒ dɛ̍ᵻ klaaᵻ we̍. Jě ka kwlae̍ nu̍-a ku̍-ɛɛ, jɛ nɛ̍ pòèɛ̍ bo ɛ̀ fɔ̍n ɛ̍.

⁶ Wɔ̍n bo ɛ̀ nu̍ nɛ̍. Kmɔ̌ la dɛ̍ᵻ sɔ̀nᵻ jǐ-a nɔ̌ di̍i̍-ɛ, ɛ̍ bo ɛ̀ po̍ wɔ̍n ke dǒ à ku̍ pùn. Ɛ̍ nyni-i à ku̍ kli̍hgbɛ̍ jii̍, iě ɛ̍ fɔ̍n nyɔ̍-a kmɔ̌ kli̍hgbɛ̍. Ɛ̍ sà ɛ̍ nɛ̍ dě kàn nɛ̍ di̍i̍.

⁷ Nyɔ̍ bɛ̌ɛ kwlǎ nmi̍i̍ ke, na̍wɛ̍ᵻ ke, pɛ̀lɛ̌ naɛ nmi̍i̍ ke smìi̍ kli̍hgbɛ̍ pɛ̌ i̍ tù-ɛ, wɛ̀ ɛ̍ nɛ laan wɛ̀ ke.

⁸ Jɛ nyɔ̍ se̍ wɔ̍n pɛ̌ i̍ tù-ɛ bɛ̌ɛ. Ɛ̍-ɛ dɛ̍ sɔ̀n dɛ̍. Nyɔ̍ se̍ ɛ̍ gbèwe̍ gbɛ̍n-ɛ bɛ̌ɛ. Ɛ̍ jǐ chɛ̌n-nǐ i̍.

⁹ Ɛ̍-ɛ bo à nu̍ wɛ̀ à po̍ à Joi ɔ̀ nu̍-a Baa-a tlɔ̌. Ɛ̍-ɛ due laa̍ bo à nu̍ wɛ̀ à chlèe à ba̍ ɔ̀ Nyɔsoa nu̍-a dě ɔ̍ chɛ̀-a tu̍ di̍i̍-ɛ.

¹⁰ Dě wɔ̍n due laa̍ di̍i̍ bo tlɔ̌ po̍ wlu̍ ke chlèwli̍ laa̍ i̍h-a sɔ-ɔ. Ǐn de̍di̍i̍ᵻ, ɛ̍ se̍ kɔn ɛ̍ iě laǎn nɛ.

¹¹ Mɔ̀ jě nǐ chɛ̀ ke tɔ̌nnǐ sɔ dě kao̍dlu due di̍i̍ wɛ̀ sàì ae?

¹² Ǐn de̍di̍i̍ᵻ, fei-tu̍ se̍ ɔle-tu̍-a buǒᵻ po̍-ɛ bɛ̌ɛ. Nɛ̀ tlo-dbǔ se̍ bɛ̌ɛ ke ɛ̍ iě fei-tu̍-a buǒᵻ po̍. Kao̍dlu ɛ̀ nɛ-a tɔ̌n wɔ̍n-ɛ, ɛ̍ se̍ nǐ chɛ̀ po̍-ɛ bɛ̌ɛ.

Nyɔsoa bo ɔ̀ nyǐ nyɔ̍ flɔ̍nwlùh chɛ̀

¹³ Nyɔ̍ bo ɔ̀ flɔn di̍i̍ i̍ iě ɔ̀ wɔ̌n dɛ̍ɛ̍ i̍ dě mɔ̀ nynɛ̌ ɛ? Nɛ̀ ɔ̍ to ɛ̍ dě ɔ̍ kmɔ̌ chɛ̀ di̍i̍, ɛ̍ ke nu̍-dɛ̍ᵻ chɛ̀ ɔ̍ nu̍-a dě tìh i̍ gbɛ̍n flɔ̍nwlùh di̍i̍-ɛ ke.

¹⁴ Jɛ pò mɔ̀ kɔn wlɛ̀n sɔ̀n wɛ̀ mɔ̀ iě klǎn kɔn-ɛ, nɛ̀ mɔ̀ bɔ̌ blɔ̌-ɛ mɔ̀-a flɔ̍nwlùh blě tìh. Pò mɔ̀ blɔ̌-ɛ, nɛ̀ mɔ̀-a tmɔ̌-ɛ tìh-a taǐn si̍h-i.

¹⁵ Flɔ̍nwlùh kaɛn la, nɛ̀ ɛ̍ se̍ dě ja̍i̍wlɔ̀ sɔ. Kmɔ̌ naɛ flɔ̍nwlùh bo. Ɛ̍ se̍ dě Nyɔsoa we̍ sɔ, dě Kǔ we̍ bo ɛ̍ sɔ-ɔ.

¹⁶ Tà wlɛ̀n ke klǎn kɔn-ɛ nɛ-aɛ, nɛ̀ dǒ wɔ̍ɔ̍n i̍ sà-a ke dɛ̍ᵻ sɔ̀nᵻ kli̍hgbɛ̍-a nɛ.

¹⁷ Jɛ flɔ̍nwlùh jɛ sɔ-a dě ja̍i̍wlɔ̀-ɛ, ɛ̍ nɔ̀ɔ̍, ɛ̍ nɛ wlaǎwla, iě ɛ̍ gbe̍ɛ̍ɛn kmɔ̌ i̍. Ɛ̍ gbɛ̍n gba̍n, iě ɛ̍ blě jbɛɛ-ɛ. Ɛ̍ jǐ-i wɔɛ i̍, iě ɛ̍ blě nu̍-dɛ̍ᵻ chɛ̀. Ɛ̍-ɛ chlɛ̌-e dɛ̍ɛ̍ i̍, iě ɛ̍ se̍ mɛɔ sɔɔ̌n wɔ̍ɔ̍n nɛ.

¹⁸ Nyɔ̍ ùh-a gbe̍ɛ̍ɛn-a kmɔ̌ i̍-ɛ, nɛ̀ u̍h-a tù dɛ̍ wɛ̀ ɛ̍ iě i̍ slɛ̌-dɛ̍-a buǒᵻ po̍.