Chiin 2 - Ku̍o̍ Delee 1999

Nyɔsoa nyɔ̍-ɔ sà wìè fɔ̌ due

¹ Ǐn de̍di̍i̍ᵻ, à tìh-a i̍ bɛ̌-ɛ Joi Jusu Klai la, ka mɔ̀ gbɛ̍n-ɛa ɔ̍ wlùh gbaɛ dɛ sɔ̍nᵻ sɔɔ̌n i̍-ɛ, nɛ̀ mɔ̀ bɔ̌ wìè fɔ̌ due sà-a.

² Pò mɔ̀ gbǎ tàdùè wɛ̀ kèàǎn nyɔ̍ ɔ̀ po̍-ae kòo̍ bɔ̌jɔɛ ke, jlii̍ chɛ̀-ɛ ke nyɔ̍gbà nyɔ̍ ɔ̀ pa̍-a jlii̍ sɔ̀nᵻɛ́ u̍h iě mɔ̀ nynɛ̌ gbǎ-ɛ,

³ nɛ̀ mɔ̀ bɔ̌ nyɔ̍ ɔ̀ pa̍-a jlii̍ chɛ̀-ɛ nɛ due tèla̍ nyǐ-ɛ. Mɔ̀ bɔ̌ nyɔ̍gbà nyɔ̍ bu̍hᵻ ta̍i̍ nyna-ɛ àe̍e̍ mɔ̀ bɔ̌ ɔ̍ tèla̍ nyǐ-ɛ dǒ bloɔ̍.

⁴ Pò mɔ̀ nu̍ la̍a̍n-ɛ, nɛ̀ mɔ̀-a se̍-e nyɔ̍-ɔ i̍ chlɛ̌ dě mɔ̀-a chɛ̀ nynɛ̌, iě mɔ̀-a se̍ wlùh sɔ̀n tìh i̍ chɛ̍n-ɛ ae?

⁵ Ǎn tìh kma de̍di̍i̍ᵻ, mɔ̀ tba̍ dounᵻ i̍. Da̍a kmɔ̌ la we̍-ɛ, nyɔ̍gbà nyɔ̍ bo Nyɔsoa tba̍ chèɛ̀ ùh iě pàn dě wlùh gbaɛ di̍i̍. Ɔ̍ kmɔ̌ wlu̍ i̍ kɔn-ɛ kɔn wlu̍ ɔ̍ po̍-a tɔ̀ma̍a̍ dǒ nyɔ̍ ùh kma-a ɔ̍ tìh-ɛ we̍-ɛ, u̍h-a mu̍ ɛ̍ fɔ̌ kɔn ke.

⁶ Jɛ mɔ̀-a blaɛ nyɔ̍gbà nyɔ̍ wɔ̍n. Ɛ̍ se̍ pàn-nyɔ̍ ùh-a se̍ mɔ̀ tìh i̍ nu̍, wɛ̀ ùh-a se̍ mɔ̀ i̍ klǎ ùh-a se̍ mɔ̀ koti̍ gba̍ ae?

⁷ Klai-a nynɛ̌ chɛ̀ la ìh nɛ-a mɔ̀ kɛ̍n-ɛ, ɛ̍ se̍ u̍h mɔ ùh-a se̍ i̍h wɔ̍n nyni-i ae?

⁸ Telě-a klaa naɛ ɛ̀ nɛ-a dě Nyɔsoa-a wlu̍ di̍i̍ ɛ̀ la̍a̍, “Jbɛɛ ìn pònyɔ̍-ɔ ka àn chɛ̀-ɛ,” pò mɔ̀ gbɛ̍n ɛ̍ i̍ chɛ̀ɛ̌chɛ̀-ɛ, nɛ̀ mɔ̀-a dɛ̍ slɛ̌ i̍ wɛ̀.

⁹ Jɛ pò mɔ̀ ja wìè fɔ̌ due sà-ɛ, nɛ̀ mɔ̀-a nu̍ gblɛ̍n sɔ̀ɛ̀n. Nɛ̀ telě sà mɔ̀ kɛ̀n, dɛ̍nu̍ɛ, nɛ̀ mɔ̀ɔ̍ telě wa̍ nyɔ̍.

¹⁰ Pò nyɔ̍ tè-o telě kli̍hgbɛ̍ i̍ wɛ̀ ɔ̍ iě due wa̍-ɛ, nɛ̀ tìh gbɛ̍n ɔ̍ wɛ̀. Nɛ̀ telě kli̍hgbɛ̍ bo ɔ̍ wa̍.

¹¹ Dɛ̍nu̍ɛ, ɔ̀ due ɔ̀ la̍a̍, “Bɔ̌ nynɛ̌à nu̍-ɛɛ,” ɔ̍ bo ɔ̀ la̍a̍, “Bɔ̌ nyɔ̍ gbe̍ja̍a̍ po̍-ɛ.” Nɛ̀ pò àn jɛ se̍ nynɛ̌à nu̍ wɛ̀ ìè nyɔ̍ gbe̍ja̍a̍ poe-ɛ, nɛ̀ telě due laa̍ bo ìn wa̍.

¹² Mɔ̀-a wlu-ɛ ke mɔ̀-a nu̍-dɛ̍ᵻ kɔn i̍h iě nyɔ̍ ùh-a mu̍-a sàwi̍h sì dě telě ɛ̀ pǔh-ia nyɔ̍-ɛ di̍i̍-ɛ wɔ̀.

¹³ Dɛ̍nu̍ɛ, ti̍ sàwi̍h-a mu̍-a sì-ɛ dǒ Nyɔsoa jǔ-ɛ, nɛ̀ ɔ̍ se̍ nyɔ̍ se̍-a wɔɛ kɔn-ɛ wɔɛ jě mu̍. Jɛ wɔɛ jǎ dǒ sàwi̍h dlǔ.

Wlùh gbaɛ-a kɔn nu̍-dɛ̍ᵻ

¹⁴ Ǐn de̍di̍i̍ᵻ, pò nyɔ̍ blě wlùh gbaɛ wɛ̀ ɛ̍ se̍ nu̍-dɛ̍ᵻ de̍e̍ nɛ-ɛ, nɛ̀ dɛ̍ ɛ̍ mu̍ ɔ̍-o po̍ ɛ? Wlùh gbaɛ kaɛn laa̍ nɛ̀ ɛ̍ sǔh bɛ̌ɛ ɔ̍ pǔh-iɛ ae?

¹⁵ Nɛ̀ pò ìn de̍di̍i̍ᵻ jɔ̍gbauᵻ àe̍e̍ ìn de̍di̍i̍ᵻ nynɔ̌gbaɔᵻ se̍ jlii̍ àe̍e̍ di̍-dɛ̍ blě

¹⁶ wɛ̀ mɔ̀-a nyɔ̍ iě ka dǎ dě u̍h we̍, “Mɔ̀ mu̍ mɔ̀-a dɛ̍ pɛlɛpɛ, seɔn bɔ̌ mɔ̀ nu̍-ɛ mɔ̀ iě dbo̍-oɛ,” nɛ̀ dɛ̍ àn wlu̍-a sǔh gbǎ-ɛ u̍h we̍ ɛ? Dɛ̍nu̍ɛ, ìn se̍ u̍h dɛ̍ᵻ u̍h nɛ-a blě ka̍-a nyǐ.

¹⁷ Nɛ̀ɛ̍, kǎ wlùh gbaɛ-a tìh nɛ ke. Pò ɛ̍ nɛ due sǔh wɛ̀ nu̍-dɛ̍ᵻ se̍ dǒ ɛ̍ de̍e̍ nɛ-ɛ, nɛ̀ ɛ̍ mɛ̌-ɛ.

¹⁸ Jɛ nyɔ̍ dɔɔ-a mu̍ ka dǎ, “Mɔ̍ɔ-ɛ, ǐn blě wlùh gbaɛ-ɛ, wɛ̀ jɔ la ɔ̍ blě nu̍-dɛ̍ᵻ.” Nɛ̀ ǎn mu̍ ka dǎ, “Àn wlùh gbaɛ ɛ̀ se̍-a nu̍-dɛ̍ᵻ blě-ɛ, to ɛ̍ iě ɛ̍ jě. Wɛ̀ mɔ̍ɔ-ɛ, iě ǎn wlùh gbaɛ to dǒ ǎn nu̍-dɛ̍ᵻ we̍.”

¹⁹ Ka Nyɔsoa nɛ-a due-ɛ, ìn po̍ ɛ̍ tìh chɛ̀ ae? Iě nɛ̀ ɛ̍ nmɔ jii̍. Jeědih bei-a chɛ̀ po̍ ɛ̍ tìh chɛ̀ ke iě i̍h-a ku̍-a tlɛ̍.

²⁰ Mɔ̀ bo-nyɔ̍ la, ka pò wlùh gbaɛ se̍ nu̍-dɛ̍ᵻ de̍e̍ nɛ-ɛ, nɛ̀ ɛ̍ fǒ-a gbɔ̀-ɛ, ìn se̍ i̍h juo ae?

²¹ À baa Eblaɛɛn to ɔ̍ jǔ jɔ̍gbau Ase ɔ̍ iě ɔ̍ slaǎ sà-ɛ dǒ gblǒ kɛ̍n. Ɔ̍ nu̍-dɛ̍ laa̍ bo ɛ̀ nu̍ ɔ̍ i̍ slɛ̌-nyɔ̍ we̍i̍ dǒ Nyɔsoa we̍.

²² Àn jě-e, kǎ ɔ̍ wlùh gbaɛ ke ɔ̍ nu̍-dɛ̍ᵻ nu̍ we̍ nɛ̍aɛ. Ɔ̍ wlùh gbaɛ wɛ̀ kwlǎ dǒ ɔ̍ nu̍-dɛ̍ᵻ we̍.

²³ Nyɔsoa-a wlu̍ ɛ̀ la̍a̍, “Eblaɛɛn gbaɛ Nyɔsoa wlùh, ɛ̍ kɔn Nyɔsoa-a slè-e ɔ̍ i̍ slɛ̌-nyɔ̍-ɛ,” sɔ wlu̍ la ɛ̍ gbǎ chɛ̀-ɛ. Ɛ̍ kɔn Nyɔsoa dǎɛ Eblaɛɛn ɔ̍ jbɛɛ nyɔ̍.

²⁴ Jě ka nyɔ̍-a nu̍-dɛ̍ᵻ bo ɛ̀ slɛ̌-ɛa nyɔ̍ i̍ dě Nyɔsoa jlǐh-ɛ, ɛ̍ se̍ wlùh gbaɛ-a sǔh.

²⁵ Kǎ ɛ̍ nɛ ke dǒ kàìà nynɔ̌ Wleaa we̍. Ti̍ ɔ̍ gba̍-a pɛ̀-nyɔ̍ ùh sɔ-a dě Eslɔɛ nyɔ̍ we̍-ɛ gbò we̍ wɛ̀ ɔ̍ jaɛ-a u̍h wìè dɛɛ we̍ iě u̍h mu̍-a u̍h blǐ pɛlɛpɛ-ɛ, dǒ ɔ̍ nu̍-dɛ̍ nui ɔ̍ i̍ slɛ̌-nyɔ̍ we̍i̍ dě Nyɔsoa jlǐh.

²⁶ Ɛ̀ kɔn ba̍ pò nyɔ̍-a sùù sì-ɛ, nɛ̀ ɔ̍ mɛ̌-aɛ, ɛ̍ kɔn ba̍ bo ke. Pò wlùh gbaɛ se̍ nu̍-dɛ̍ᵻ de̍e̍ nɛ-ɛ, nɛ̀ ɛ̍ mɛ̌-ɛ.