Chiin 1 - Ku̍o̍ Delee 1999

¹ Mɔ̍ Chiin ɔ̀ nu̍-a Nyɔsoa ke Joi Jusu Klai-a pòi̍ju-ɛ, nɔ̌ ǐn we̍ bo chlǐh-dɛ̍ la ɛ̍ sɔ-ɔ. Nyɔsoa nyɔ̍ kli̍hgbɛ̍ sɛ̍-a kmɔ̌ la we̍-ɛ, mɔ̍ sà mɔ̀ nyinɔ̍ i̍.

Flɔ̍nwlùh chɛ̀-a sɔ dě Nyɔsoa we̍

² Ǐn de̍di̍i̍ᵻ, pò nyɔ̍ i̍ tɛ̀n-ɛ kaɛn kaɛn ji̍ mɔ̀ we̍-ɛ, nɛ̀ mɔ̀ nmɔ ɛ̍ tìh.

³ Dɛ̍nu̍ɛ, mɔ̀-a chɛ̀ juo ɛ̍-ɛ, mɔ̀-a wlùh gbaɛ-ɛ tɛ̀n-ɛ bo ɛ̀ mu̍ kmɔ̌ nɛ wɛ̀ mɔ̀ iě-e klì i̍ ku̍.

⁴ Mɔ̀ nu̍ ɛ̍ mɔ̀-a dě klì i̍ ku̍-ɛ iě mɔ̀ wlɔ̀ nyni̍-i, wɛ̀ mɔ̀ iě nɛi̍ wɛ̀, mɔ̀ iě i̍ gbà, dɛ̍-ɛ je̍e mɔ̀ we̍ blu̍.

⁵ Pò mɔ̀-a nyɔ̍ se̍ flɔ̍nwlùh blě-ɛ, nɛ̀ ɔ̍ tèle Nyɔsoa i̍, nɛ̀ ɔ̍ mu̍ ɛ̍ ɔ̍ nyǐ. Nyɔsoa bo ɔ̀ kɔn nyɔ̍ dɛ̍ nyǐ-ɛ pe̍ɛ kɛ̍n i̍. Ɔ̍ nyǐ nyɔ̍ kli̍hgbɛ̍ dɛ̍ blɛ ka.

⁶ Jɛ pò nyɔ̍ ja ɔ̍ dɛ̍ jbǎ-ɛɛ, nɛ̀ ɔ̍ blě wlùh gbaɛ. Jɛ nɛ̀ ɔ̍ bɔ̌ ɛ̍ pòkɔ̌ɔ po̍-ɛ. Nyɔ̍ jɔ po̍-a pòkɔ̌ɔ-ɛ, nɛ̀ ka poɔ-a ji̍ iě jbǒ-a dǒ-a nu̍ sàkǎsàkǎ-ɛ, nɛ̀ kǎ nyɔ̍ laa̍ ɔ̍ tìh nɛ.

⁷ Nyɔ̍ kaɛn laa̍ nɛ̀ ɔ̍ bɔ̌ dɛ̍ jě tìh gbàɛ̀-ɛ dě Joi we̍.

⁸ Dɛ̍nu̍ɛ, nɛ̀ wlùh sɔɔ̌n i̍ gbè-a nu̍ ɔ̍-ɛ, nɛ̀ ɔ̍ wlùh-u gbɛ̍n dɛ̍ due kɛ̍n i̍.

Nyɔ̍gbà nyɔ̍ ke pàn-nyɔ̍ nu̍ mɔna̍

⁹ De̍di̍i̍ jɔ kɔn sɔ̍n se̍-a dɛ̍ i̍ gbɛ̍n-ɛ, pò Nyɔsoa dǔ ɔ̍ ja̍i̍-ɛ, nɛ̀ ɔ̍ nu̍ mɔna̍.

¹⁰ Nɛ̀ pò jɔ pàn wɛ̀ Nyɔsoa iě ɔ̍ wlù ja-ɛ, nɛ̀ ɔ̍ nu̍ mɔna̍ ke. Dɛ̍nu̍ɛ, ka fɔ̀ài̍n-a nu̍-a dě tu̍ ja̍ blu̍-ɛɛ, kǎ ɔ̍ pàn-a mu̍ i̍ sì-ɛ nu̍ ke.

¹¹ Dɛ̍nu̍ɛ, pò jlǔh wlǔh kwlǎ-ɛ, nɛ̀ ɛ̍ nɛ sànsàn, iě ɛ̍ dɛ̌blɛ pei-a fɔ̀ài̍n i̍. Wɛ̀ i̍h-a blu̍ i̍h ja̍i̍, nɛ̀ i̍h-a jii̍ nmɔ-ɛ mǎ-ɛ. Kǎ pàn-nyɔ̍-a tìh-a mu̍ nɛ ke. Pò ɔ̍ nɛ dǒ pɛlǔh po̍-ɛa tɔǐ wɛ̀-ɛ, wɛ̀ ɔ̍ pàn-dɛ̍ᵻ iě-e gbɔ̀lɔ.

Dě Nyɔsoa we̍ bo dɛ̍ᵻ chɛ̀ kli̍hgbɛ̍-a sɔ-ɛ

¹² Nyɔ̍ ɔ̀ ku̍-ae klì i̍ dǒ ɔ̍ i̍ tɛ̀n-ɛ we̍-ɛ, nɛ̀ ɔ̍ nmɔ i̍. Dɛ̍nu̍ɛ, nyɔ̍ ɔ̀ mu̍-a i̍ tɛ̀n-ɛ laa̍ i̍ nyna-ɛ, nɛ̀ ɔ̍ mu̍ kmɔ̌ sie feɛ-a blawɛ̌ tèè. Ɛ̍ kɔn wlu̍ bo Nyɔsoa po̍ tɔ̀ma̍a̍ dǒ nyɔ̍ kma-a ɔ̍ tìh-ɛ we̍.

¹³ Ɛ̍ tìh-ɛ, pò nyɔ̍ ja blu̍ja̍a̍ gbǎ m-ɛ, nɛ̀ ɔ̍ bɔ̌ ka nu̍ Nyɔsoa bo ɔ̀ pɔ̀n ɔ̍ blu̍ja̍a̍ po̍-ɛi. Dɛ̍nu̍ɛ, dɛ̍ sɔ̀n-ɔ po̍ Nyɔsoa blu̍ja̍a̍, wɛ̀ ɔ̍ chɛ̀ se̍ nyɔ̍-o-nyɔ̍ blu̍ja̍a̍ po̍-ɛi pɔ̀n ke.

¹⁴ Jɛ nyɔ̍ ɔ̀ ji̍-a blu̍ja̍a̍ gbǎ la̍-ɛ, nɛ̀ ɔ̍ chɛ̀-a wlùh dɛ̍ᵻ bo ìh-a chlì ɔ̍ dě ɛ̍ di̍i̍.

¹⁵ Nɛ̀ pò ɔ̍ wlùh dɛ̍ᵻ nɛ kwlǐ-ɛ, nɛ̀ i̍h wlǔh-i gblɛ̍n sɔ̀ɛ̀n. Nɛ̀ pò gblɛ̍n sɔ̀ɛ̀n ku̍ gbo̍gbo̍-ɛ, nɛ̀ ɛ̍ wlǔh-i mɛ̌ɛ.

¹⁶ Nɛ̀ɛ̍, ǎn tìh kma de̍di̍i̍ᵻ, mɔ̀ bɔ̌ wɔ̌n-ɛ nyɔ̍ bɔ̌ mɔ̀ i̍ boe-ɛ.

¹⁷ Nyǐ-dɛ̍ᵻ kli̍hgbɛ̍ ìh nmɔ-a jii̍ iě ìh wɛ̀-a gblɛ̍ja̍i̍-ɛ, i̍h sɔ dě ja̍i̍wlɔ̀. I̍h-a sɔ dě Baa Nyɔsoa ɔ̀ nu̍-a dɛ̍ᵻ kli̍hgbɛ̍ ìh blě-a sɔ̀npli dě ja̍i̍-ɛ we̍. Ɔ̍-ɔ sàɛ̀ wɛ̀ ɔ̍ iě kwile-a chɛ̀ blě dě sàɛ̀-ɛ di̍i̍.

¹⁸ Ɔ̍ dǔ ɔ̍ chɛ̀-a wlùh-u wɛ̀ ɔ̍ nu̍ àɔ̀ dǒ wlu̍ ɛ̀ nu̍-a tìh-a taǐn-ɛ we̍. Wɛ̀ à iě nya̍mla nu̍ dǒ dɛ̍ᵻ kli̍hgbɛ̍ ɔ̍ nu̍-a we̍.

Pò nyɔ̍ wɔ̌n dɛ̍-ɛ nɛ̀ ɔ̍ nu̍ ɛ̍

¹⁹ Ǎn tìh kma de̍di̍i̍ᵻ, ɛ̀ la bo mɔ̀ iě dounᵻ tù. Bɔ̌ nyɔ̍ kli̍hgbɛ̍ pu̍e̍e dounᵻ i̍ suei̍, jɛ nɛ̀ u̍h tlɛ̀n dǒ wlu la̍, nɛ̀ u̍h tlɛ̀n dǒ jlu̍h-u gbǎ la̍-a.

²⁰ Dɛ̍nu̍ɛ, i̍ slɛ̌ kmɔ̌ kɔn di̍i̍ Nyɔsoa-a pɔ̀n-a à iě-a nɛ-ɛ, jlu̍h-u gba̍-e nyɔ̍.

²¹ Ɛ̍ tìh-ɛ, mɔ̀ sà sììjii̍ nu̍-ɛ sɔ̍n di̍i̍, ɛ̍ ke kà kɔn-ɛ ke. Nɛ̀ mɔ̀ ji̍ ja̍ mɔ̀ iě wlu̍ Nyɔsoa tù-a dǒ mɔ̀ wlùh kɛ̍n-ɛ i̍ gbɛ̍n. Ɛ̍-ɛ bo ɛ̀ bɛ̌ɛ mɔ̀ pǔh-iɛ.

²² Wlu̍-a chɛ̀ bo mɔ̀ iě nu̍, jɛ mɔ̀ bɔ̌ ɛ̍ dounᵻ we̍ po̍ nyɔ̍ nu̍-ɛ sǔh. Pò mɔ̀ po̍ ɛ̍ dounᵻ we̍ iě mɔ̀ se̍ ɛ̍ nu̍-ɛ, nɛ̀ mɔ̀-a boe mɔ̀-a chɛ̀ i̍.

²³ Jɛ nyɔ̍ jɔ wɔ̌n-a wlu̍ la sǔh wɛ̀ ɔ̀ se̍-a ɛ̍ nu̍-nyɔ̍-ɛ, nɛ̀ ɔ̍ wɔ̀ nyɔ̍ ɔ̀ gbɛ̀n-a ɔ̍ chɛ̀-a jua̍a̍ ja̍ dě jela̍a̍ di̍i̍-ɛ.

²⁴ Ɔ̍ wɔ̀-a ɔ̍ chɛ̀ ja̍ gbɛ̀n-ɛ, wɛ̀ ɔ̍ mu̍. Iě ɔ̍ nyna-o wɛ̀ ɔ̍ mǎle ɔ̍ chɛ̀-a nɛka we̍, nɛ̀ kǎ nyɔ̍ laa̍ ɔ̍ tìh nɛ.

²⁵ Jɛ telě la ɛ̀ wɛ̀-a nɛi̍ wɛ̀ ɛ̀ pǔh-ia nyɔ̍-ɛ, nyɔ̍ ɔ̀ tù-a ɛ̍ dounᵻ ɔ̀ se̍-a ɛ̍ we̍ mǎle wɛ̀ ɔ̀ gba̍-a ɛ̍ nu̍-ɛ dluwe̍ i̍-ɛ, nɛ̀ ɔ̍ mu̍ pɔ̀ìě jě dǒ ɔ̍ nu̍-dɛ̍ kɛ̍n.

²⁶ Nyɔ̍ jɔ ɔ̀ la̍ ɔ̀ nu̍-a Nyɔsoa dɛ wɛ̀ ɔ̀ se̍-a ɔ̍ chɛ̀-a wɔ̍n gbèwe̍ gbɛ̍n-ɛ bɛ̌ɛ-ɛ, nɛ̀ ɔ̍ boe ɔ̍ chɛ̀ i̍. Nɛ̀ ɔ̍ Nyɔsoa dɛ se̍ dɛ̍kɛ̍n gbǎ.

²⁷ Dɛ̍ Baa Nyɔsoa-a dǎɛ-a Nyɔsoa dɛ-a gblangbai̍-ɛ, ɛ̍ nu̍ kwie̍nynuu̍ ke tèwànynɔ̌ᵻ ùh-a jě-a tìh-ɛ we̍ i̍ gbɛ̀n-ɛ, ɛ̍ ke nyɔ̍ ɔ̀ sà-a ɔ̍ chɛ̀ dě kmɔ̌-a sììjii̍ di̍i̍-ɛ ke.