2 Timote 4 - Ku̍o̍ Delee 1999

¹ Dǒ Nyɔsoa ke Jusu Klai jɔ mu̍-a mɛ̌-nyɔ̍ ke kmɔ̌ nɛ nyɔ̍-a sàwi̍h sì-ɛ jǔ bo ǎn poe ka ìn slǔh. Dɛ̍nu̍ɛ, ɔ̍ mu̍ ji̍ ɔ̍ iě kmɔ̌ wlu̍ i̍ kɔn.

² Wɛ̀ ìè Nyɔsoa-a tu̍owli po̍, ɛ̍ jɛ nɛ nɔɔ i̍, iě ɛ̍ jɛ se̍ nɔɔ i̍ nɛ-ɛ, nɛ̌ ɛ̍ kɛ̍ɛ̍n ìè ɛ̍ bla̍. Nɛ̀ ìn wǐi u̍h dlǔ i̍, ìè u̍h wìè-e po̍. Nɛ̀ ìn fùka u̍h-a wlùh, ìè u̍h nǎ po̍ dǒ wlùh i̍ gbɛ̍n-ɛ we̍.

³ Ɛ̍ mu̍ ti̍ kɔn nɛ̀ nyɔ̍ɔ se̍ dě Nyɔsoa dɛ-a nǎ po̍-ɛ we̍ dounᵻ po̍ mu̍, wɛ̀ u̍h iě dǒ u̍h-a chɛ̀-a wlùh dɛ̍ᵻ de̍e̍ wɔ̀. Nɛ̀ u̍h-a mu̍ nǎ po̍ nyɔ̍ dɔu i̍ gbòe dǒ u̍h-a chɛ̀ we̍, wɛ̀ u̍h iě dɛ̍ᵻ u̍h-a pɔ̀n-a wɔ̌n-ɛ i̍-ɛ sà.

⁴ U̍h-a mu̍ i̍ bǐi u̍h iě tìh-a taǐn dounᵻ we̍ sà, wɛ̀ u̍h iě se̍o̍nɛ dounᵻ we̍ po̍.

⁵ Jɛ mɔ̀ɔ̍, tù àn chɛ̀ tɔ̀ɔ̀n dǒ dɛ̍ᵻ kli̍hgbɛ̍ we̍. Ku̍-e klì i̍ dǒ jua̍i̍ sàɛ̀ la̍. Nu̍ àn pɔ̀n chɛ̀ bla̍ dbo̍, nɛ̀ ìn nu̍ ɛ̍ sɔ̍nᵻ ka ìn nu̍-a Nyɔsoa-a pòi̍ju-ɛ.

⁶ Dɛ̍nu̍ɛ, mɔ̍ɔ-ɛ, ǐn gbàɛ̀ wɛ̀ ǎn feɛ iě slaǎ sà-ɛ dǒ Nyɔsoa we̍. Ǎn nɔ̌ kmɔ̌ sɔ ti̍ nyni wɛ̀.

⁷ Ǐn fɔ̀n fɔ̀n-ɛa chɛ̀ naɛ wɛ̀. Ǐn wɔ̀ dlǔᵻ wɔ̍i̍n blaɛ-ɛ wɛ̀, iě ǐn se̍ wlùh gbaɛ i̍ sɔ.

⁸ Nɛ̀ɛ̍, blawɛ̌ ɛ̀ tè-ea i̍ dǒ i̍ slɛ̌-nyɔ̍ we̍, ɛ̀ Joi ɔ̀ nu̍-a i̍ slɛ̌-ɛ sàwi̍h sì nyɔ̍ ɔ̍ mu̍-a ǐn nyǐ dǒ bɔ̌ɛ-o weɛ̍ laa̍ di̍i̍-ɛ, ɛ̍ fuo la̍ ǐn kɛ̍ɛ̍n. Nɛ̀ ɛ̍ se̍ ǐn nɛ due ɔ̍ se̍ ɛ̍ nyǐ mu̍. Jɛ nyɔ̍ kli̍hgbɛ̍ ùh ɔ̍ ji̍-i tɔ̌n-a nu̍-aɛ, ɔ̍ mu̍ ɛ̍ u̍h nyǐ ke.

Pɔɔ bla̍ ɔ̍ chɛ̀-a tìh

⁹ Po̍-e gbǐh ìè nɔ̌ ǐn we̍ ji̍ suei̍.

¹⁰ Dɛ̍nu̍ɛ, Dima gbǎ dě ti̍laa kmɔ̌ la ɛ̍ we̍ jbɛɛ dɛ di̍i̍. Ɛ̍ kɔn ɔ̍ sà ǐn sɔ̍nᵻ i̍, iě ɔ̍ mu̍ dǒ Tɛsolonaika. Klɛsɛin mu̍ Kelesea fɔɔ, iě Taitɔ mu̍ Damɛtia fɔɔ.

¹¹ Luu nɛ due bo ɔ̀ nɛ da̍a ǐn we̍. Nɛ̀ ìn mu̍ Maɛ bǒ ɔ̍ ke ìè ji̍. Dɛ̍nu̍ɛ, ɔ̍ sà ǐn sɔ̍n-ɔ nɔ̌ dbo̍ la di̍i̍.

¹² Wɛ̀ ǐn dbo̍ Tekikɔ dǒ Ɛfɛsɔ.

¹³ Ìn ja ji̍-ɛ, nɛ̀ ìn ja ǎn gbàùo̍-jliɛ̍ ǐn si̍e̍-a dǒ Tloa dǒ Kapɔ we̍-ɛ, ɛ̍ ke ǎn chlǐh-dɛ̍ᵻ ke. Jih u̍h nui-a dɛ̍ku-ɛ bo ǎn dǎ gbe̍i̍n.

¹⁴ Ɛlesana ɔ̀ nu̍-a bla̍-nyɔ̍-ɛ, kà ɔ̍ nu̍-a ǐn pùn-ɛ, ɛ̍ ku̍ wɔ̍n. Jɛ Nyɔsoa-a mu̍ ɔ̍ gba̍a̍ sà-ɛ dǒ ɔ̍ nu̍-dɛ̍ we̍.

¹⁵ Àn chɛ̀ nu̍ nɛnɛ̌ ke dǒ ɔ̍ pùn. Dɛ̍nu̍ɛ, ɔ̍ faɛn-a à tu̍owli la sǔh-ɛ, ɛ̍ se̍ dɛ̍ka nɛ.

¹⁶ Ti̍ iě-a ǎn chɛ̀ tìh dlǔ i̍ sà sàǐtòò-ɛ, ǐn se̍ we̍ tǐn nyɔ̍ kɔn. Nyɔ̍ kli̍hgbɛ̍ sà ǐn sɔ̍nᵻ i̍. Jɛ ǎn sà nǐ wɔ̍n Nyɔsoa-a je̍e ɛ̍ dǒ u̍h dlǔ po̍.

¹⁷ Jɛ Joi nyna ǐn de̍e̍ i̍, wɛ̀ ɔ̍ nyǐ ǐn gbǐh iě tu̍owli po̍ gblaan, wɛ̀ ùh se̍-a Juu nyɔ̍-ɛ u̍h kli̍hgbɛ̍ iě i̍h wɔ̌n. Iě ɔ̍ sèìe m dě gbòlò wɔ̍ɔ̍n.

¹⁸ Joi-a mu̍ ǐn dɛ̍ᵻ sɔ̀nᵻ kli̍hgbɛ̍ wɔ̍i̍n sèìe, wɛ̀ ɔ̍ iě ǐn dě ɔ̍ wlu̍ i̍ kɔn kmɔ̌ nɛ-a dě ja̍i̍wlɔ̀-ɛ di̍i̍ gba̍ pɛlɛpɛ. Dǒ ɔ̍ we̍ tìh-a i̍ bɛ̌-ɛ kɔn nɔ̌ kmɔ̌-a kmɔ̌. Kǎ ɛ̍-ɛ nɛ.

Pɔɔ sà nyɔ̍ nyinɔ̍ i̍

¹⁹ Mɔ̍ sà Plisela ke Akwela nyinɔ̍ i̍, ɛ̍ ke Onɛsefɔwlɔ-a chɛ̌ ke.

²⁰ Iwlaslu nɛ dǒ Kɔwlɛn, iě ǐn sie Tlofimɔ dǒ Mailitɔ, dɛ̍nu̍ɛ, ɔ̍ poa-ɛ.

²¹ Fɔ̀n dɛ̍ we̍ ìè ji̍ sasǎ wɛ̀ ɛ̍ iě wìla̍ nu̍. Iublɔ ke Pudɛn ke Lainɔ ke Klaɔdia la̍ u̍h sà mɔ̀ nyinɔ̍ i̍. Kǎ de̍di̍i̍ᵻ kli̍hgbɛ̍ dǎ ke.

²² Joi nɛ ìn we̍ o. Ǎn sà nǐ wɔ̍n Nyɔsoa-a blɛ iě dǒ mɔ̀ we̍ nɛ.