2 Pitɛ 1 - Ku̍o̍ Delee 1999

¹ Mɔ̍ Samo Pitɛ, ǐn nu̍ pòi̍ju ke gba̍tòà dǒ Jusu Klai we̍. Nyɔ̍ ùh jii-a dě à Nyɔsoa ke à Sèìe Nyɔ̍ Jusu Klai-a i̍ slɛ̌-ɛ di̍i̍ iě u̍h-a Klai wlì tè-ɛ ke à naɛ nɛ-a due-ɛ, u̍h bo ǎn chlǐh we̍.

² Ǎn sà nǐ wɔ̍n blɛ ke wlùh-a i̍ tè-ɛ iě kɛ̍n i̍ gboǎɛ dě mɔ̀-a Nyɔsoa ke à Joi Jusu juo-ɛ di̍i̍.

Kǎ Nyɔsoa nyɔ̍ iě ka nɛ

³ Dɛ̍ᵻ kli̍hgbɛ̍ à pɔ̀n-a wɛ̀ à iě-a dě Nyɔsoa we̍ fòè kmɔ̌ di̍i̍ nɛ-ɛ, Nyɔsoa-a gbǐh nyǐ i̍h àɔ̀ wɛ̀. Dɛ̍nu̍ɛ, nyɔ̍ ɔ̀ dǎ àɔ̀ wɛ̀ à iě-a ɔ̍ chɛ̀-a tìh-a i̍ bɛ̌-ɛ ke gblɛ̍n-ɛ nmɔ-ɛ kwa̍a̍ i̍ gblè-eɛ, à juo ɔ̍-ɛ.

⁴ Ɛ̍ kɔn ɔ̍ wlu̍ ɛ̀ gbǎ-a dɛ̍kɛ̍n iě ɛ̀ ku̍-a wɔ̍n-ɛ, wɛ̀ ɔ̍ po̍ ɛ̍ tɔ̀ma̍a̍ dǒ à we̍. Ɛ̍ bo ɛ̀ mu̍ kmɔ̌ nɛ wɛ̀ mɔ̀ iě kmɔ̌-a tba̍ɛ kɛ̍n i̍ la wɔ̍i̍n wa̍n, wɛ̀ mɔ̀ iě Nyɔsoa wɔ̀.

⁵ Ɛ̍ tìh-ɛ, mɔ̀ fɔ̀n dɛ̍ we̍ mɔ̀ iě dɛ̍ chɛ̀ dǒ mɔ̀-a wlùh gbaɛ de̍e̍ po̍. Dǒ dɛ̍ chɛ̀ de̍e̍ laa̍ mɔ̀ iě-o tɔɔ po̍,

⁶ wɛ̀ dǒ tɔɔ de̍e̍ laa̍ mɔ̀ iě-o chɛ̀ i̍ gbɛ̍n-ɛ po̍. Dǒ chɛ̀ i̍ gbɛ̍n-ɛ de̍e̍ laa̍ mɔ̀ iě-o klì i̍ ku̍-ɛ po̍. Dǒ klì i̍ ku̍-ɛ de̍e̍ laa̍ mɔ̀ iě-o Nyɔsoa dɛ-ɛ nɛ-ɛ po̍.

⁷ Dǒ Nyɔsoa dɛ-ɛ nɛ-ɛ de̍e̍ laa̍ mɔ̀ iě-o kɛ̍n i̍ gbe̍ɛ̍ɛn po̍, wɛ̀ dǒ kɛ̍n i̍ gbe̍ɛ̍ɛn de̍e̍ laa̍ mɔ̀ iě-o nyɔ̍ tìh kma-a po̍.

⁸ Ka mɔ̀ juo-a à Joi Jusu Klai-ɛ, pò mɔ̀ blě ìh la wɛ̀ i̍h iě i̍ klàn dě mɔ̀ ku̍sɔ̀n-ɛ, nɛ̀ ɛ̍ mu̍ kmɔ̌ nɛ mɔ̀ iě dɛ̍ kɛ̍n ji̍, nɛ̀ mɔ̀ se̍ pɔ̀ɔ̍pìe̍ nyɔ̍ nu̍ mu̍.

⁹ Jɛ nyɔ̍-o-nyɔ̍ ɔ̀ se̍-a ìh la blě-ɛ, nɛ̀ ɔ̍ dɔ̌-ɛ, ɔ̍-ɔ jě i̍. Nɛ̀ ka Nyɔsoa tǎli-a ɔ̍ tɛin gblɛ̍n sɔ̀ɛ̀n i̍-ɛ, nɛ̀ ɔ̍ mǎle-e.

¹⁰ Ɛ̍ tìh-ɛ, ǐn de̍di̍i̍ᵻ mɔ̀ fɔ̀n dɛ̍ we̍ wɛ̀ Nyɔsoa-a mɔ̀-a chèɛ̀ tba̍-a ke ɔ̍ mɔ̀-a dǎ-a iě nǐ de̍e̍ i̍ wɛ̀. Pò mɔ̀ nu̍ la̍a̍n-ɛ, nɛ̀ mɔ̀ se̍ gba̍ tàmlain gbǎ-ɛ.

¹¹ Nɛ̀ Nyɔsoa-a mu̍ mɔ̀ bu̍h i̍ sàɛ̀ wɛ̀ mɔ̀ iě dě à Sèìe Nyɔ̍ Joi Jusu Klai-a kmɔ̌ wlu̍ i̍ kɔn-ɛ di̍i̍ nɛ, ɛ̀ se̍-a i̍ sì la̍ kɔn-ɛ.

¹² Mɔ̀ juo ìh la, iě i̍h nɛ dě tìh-a taǐn mɔ̀ gbɛ̍n-a i̍-ɛ di̍i̍ gba̍i̍ngba̍i̍n. Jɛ kǎ ǎn mu̍ i̍h dǒ mɔ̀ wlì i̍ sǐ-i ke ma̍u̍ sǔh.

¹³ Ǐn juo ɛ̍-ɛ, ɛ̍ slɛ̌ i̍ iě mɔ̀ tìh la wlì i̍ sǐi ka ǐn tè-a kmɔ̌ i̍ ke̍-ɛ.

¹⁴ Ǐn juo ɛ̍-ɛ ǎn mɛ̌ɛ se̍ we̍ tɛn dɛ, kǎ à Joi Jusu Klai dǎ ǐn wlùh sèàɛ̍.

¹⁵ Ǎn mu̍ dɛ̍ we̍ fɔ̀n wɛ̀ pò ǐn sɔ nɔ̌ kmɔ̌-ɛ, mɔ̀ iě ìh la dǒ wlì blě-eɛ bɛ̌ɛ ti̍ kli̍hgbɛ̍ we̍.

Klai-a gbǐh kɔn-ɛ blě sàànsi̍i̍h

¹⁶ À Joi Jusu Klai-a ji̍-ɛ ɛ̀ mu̍-a gbǐh kɛ̍n nɛ-ɛ, ɛ̍ se̍ u̍h la̍a̍ à se̍ mɔ̀ wlùh sèàɛ̍, jɛ à chɛ̀ gba̍ jlǐhɛ̍ iě à jě ɔ̍ gbǐh laa̍.

¹⁷ Ti̍ Baa Nyɔsoa iě-a Jusu-a ja̍ tè-ɛ ke ɔ̍ tìh-a i̍ bɛ̌-ɛ wlu̍ dbo̍-ɛ, nɛ̀ dǒ à nɛ. Baajiɔ̍-a chɛ̀ ɔ̀ kɔn tìh bɛ̌-a i̍-ɛ, wlu̍ sɔ-a dě ɔ̍ we̍-ɛ, ɛ̍ la̍a̍, “Ɔ̀ la ǎn tìh kma Jǔ bo, ǎn wlùh tè i̍ dǒ ɔ̍ we̍.”

¹⁸ Ti̍ ɔ̍ ke à nɛ-a dě Nyɔsoa-a tlu̍h kɛ̍n-ɛ, dǒ à wɔ̌n-ɛ wlu̍ la ɛ̀ sɔ-a dě ja̍i̍wlɔ̀-ɛ.

¹⁹ Ɛ̍ tìh-ɛ, Nyɔsoa-a tu̍owli po̍ nyɔ̍-a wlu̍ bo à kui wlùh. Pò mɔ̀ tù ɛ̍ dounᵻɛ́, nɛ̀ mɔ̀-a nu̍ dɛ̍ chɛ̀. Dɛ̍nu̍ɛ, ɛ̍ wɔ̀ nape̍ ɛ̀ wa̍n-a dě kwile te̍e̍ wɛ̀ sɔ̀n-a sɛ̀n-aɛ ke chǔhtlɛ̀n ɛ̀ fa̍n-a sɔ̀nwɔ̍i̍n-ɛ dǒ mɔ̀ wlùh kɛ̍n.

²⁰ Dɛ̍ due mɔ̀ iě-a dounᵻ tù-ɛ, ɛ̍ nu̍, tu̍owli ìh poe-a dě Nyɔsoa-a wlu̍ di̍i̍-ɛ, nyɔ̍ se̍ ɛ̍ we̍ i̍ sèàɛ̍-ɛ bɛ̌ɛ dǒ ɔ̍ chɛ̀ we̍.

²¹ Dɛ̍nu̍ɛ, nyɔ̍-ɔ tè-o i̍ tèè wɛ̀ ɔ̍-ɔ po̍ Nyɔsoa-a tu̍owli, jɛ nyɔ̍ Nyɔsoa-a Sùù dǔ-a i̍-ɛ, ɔ̍-ɔ bo ɔ̀ po̍ Nyɔsoa-a tu̍owli.