2 Tɛsoloniɔn 3 - Ku̍o̍ Delee 1999

Ba̍le dǒ à tàà

¹ Ɛ̀ bɔ̌ɛ-aoɛ, à de̍di̍i̍ᵻ, mɔ̀ ba̍le dǒ à tàà wɛ̀ Joi-a wlu̍ iě na suei̍, wɛ̀ nyɔ̍gbei iě ɛ̍ ja̍ tè ka ɛ̍ nɛ-a dě mɔ̀ we̍-ɛ.

² Mɔ̀ ba̍le wɛ̀ Nyɔsoa iě à sèìe dě kà kɔn nyɔ̍ ke dɛ̍ sɔ̀n nu̍ nyɔ̍ kwa̍a̍. Dɛ̍nu̍ɛ, ɛ̍ se̍ nyɔ̍ kli̍hgbɛ̍ ùh se̍ wlùh gbaɛ blě.

³ Jɛ Joi-i gblìh wlu̍ kɛ̍n, ɔ̍ mu̍ mɔ̀ gbǐh nyǐ wɛ̀ ɔ̍ iě mɔ̀ kɛ̍n kaɛn dǒ Nyɔ̍ Sɔ̀n we̍.

⁴ À tè Joi wlì dǒ mɔ̀ we̍, ka mɔ̀-a nu̍-a dɛ̍ᵻ à sèàɛ̍-a mɔ̀ wlùh iě mɔ̀-a mu̍-a i̍h dluwe̍ i̍ gba̍-ɛ.

⁵ Ǎn sà nǐ wɔ̍n Joi iě mɔ̀-a pɔluh wìè-e po̍ dǒ ka Nyɔsoa nu̍-a mɔ̀ɔ̍ jbɛɛ we̍, ɛ̍ ke dě klì i̍ ku̍-ɛ Klai nyǐ-a mɔ̀-ɛ ke.

Nyɔ̍ kli̍hgbɛ̍ kɔn u̍h iě dbo̍ nu̍

⁶ À de̍di̍i̍ᵻ, à po̍ mɔ̀ telě i̍ dǒ à Joi Jusu Klai-a nynɛ̌ kɛ̍n. De̍di̍i̍ jɔ nɛ-a dě flàn-dɛ̍ di̍i̍-ɛ, nɛ̀ mɔ̀ ti̍ɛ̍ɛn ɔ̍ we̍ i̍, ɛ̍ ke nyɔ̍ ùh-u nu̍-a dɛ̍ à poe-a mɔ̀ nǎ-ɛ ke.

⁷ Mɔ̀-a chɛ̀ juo ɛ̍ mɔ̀ kɔn mɔ̀ iě-e à wɔ̀ɔ̀ i̍ sà. Ti̍ à nɛ-a dě mɔ̀ we̍-ɛ, mɔ̀ jě àɔ̀, à se̍ flàn.

⁸ À-a di̍ nyɔ̍-o-nyɔ̍-a di̍-dɛ̍ wɛ̀ à-a se̍ ɛ̍ tàà pɛ̌ɛ. Jɛ à nu̍ kmu dbo̍ wlù ke sɔ̀n, wɛ̀ à-a je̍e nyɔ̍-o-nyɔ̍ wɔ̍ɔ̍n i̍ bɛ̌ɛ.

⁹ Ɛ̍ se̍-ɛ nɛ̀ à se̍ i̍ blaɛ à iě mɔ̀ wlì tè kai, jɛ à nu̍ ɛ̍ wɛ̀ ɛ̍ iě dě mɔ̀ jlǐh i̍ ju̍o̍e, wɛ̀ mɔ̀ iě-e à wɔ̀ɔ̀ i̍ sà.

¹⁰ Ti̍ à iě-a dě mɔ̀ we̍ nɛ-ɛ, à nyǐ mɔ̀ telě la, à la̍a̍, “Pò jɔ se̍ dbo̍ nu̍-ɛ, nɛ̀ ɔ̍ bɔ̌ dɛ̍ di̍-ɛ.”

¹¹ À bla̍ ìh la, dɛ̍nu̍ɛ, à wɔ̌n i̍h mɔ̀-a nyɔ̍ duuh nɛ dě flàn-dɛ̍ di̍i̍. U̍h-u nu̍ dbo̍, jɛ tìh se̍-a u̍h-a tìh-ɛ bo u̍h-a po̍ wɔ̍n di̍i̍.

¹² Nyɔ̍tu laa̍ à tè u̍h telě i̍, à gbɛ̍n u̍h-a bu̍hᵻ dǒ Joi Jusu Klai-a nynɛ̌ kɛ̍n u̍h iě gbain nɛ u̍h iě dbo̍ nu̍, u̍h iě u̍h-a chɛ̀-a dɛ̍ i̍ pɔ̀n.

¹³ À de̍di̍i̍ᵻ, mɔ̀ bɔ̌ se̍a̍ dǒ dɛ̍ chɛ̀ nu̍-ɛ we̍.

¹⁴ Pò nyɔ̍-o-nyɔ̍ se̍ dɛ̍ à bla̍-a nɔ̌ chlǐh-dɛ̍ la di̍i̍-ɛ nu̍-ɛ, nɛ̀ mɔ̀ tù ɔ̍ jlǐhɛ̍, mɔ̀ iě ɔ̍ sɔ̍nᵻ i̍ sà wɛ̀ tɛ̀n iě ɔ̍ nu̍.

¹⁵ Bɔ̌ ɔ̍ ja̍ gbɛ̀n-ɛ ka àn nyɛ̌-nyɔ̍-ɛ, jɛ tù ɔ̍ slɛ̌n ka àn mu̍-a de̍di̍i̍ᵻ duuh-a tìh nu̍-ɛ.

Bɔ̌ɛ-o wlu̍ la

¹⁶ Ǎn sà nǐ wɔ̍n Joi ɔ̀ nyǐ-a nyɔ̍ wlùh-a i̍ tè-ɛɛ, ɔ̍ chɛ̀-a gbǎ iě mɔ̀ wlùh-a i̍ tè-ɛ nyǐ ti̍ kli̍hgbɛ̍ we̍ tà kli̍hgbɛ̍. Joi nɛ mɔ̀ kli̍hgbɛ̍ we̍ o.

¹⁷ Mɔ̍ Pɔɔ, ǎn chɛ̀-a sɔ̍n bo ǎn chlǐh-i nyinɔ̍ i̍ sà wlu̍ la. Mɔ̍ sà mɔ̀ nyinɔ̍ i̍. Ɛ̀ la bo ɛ̀ nu̍ juola dě ǎn chlǐh-dɛ̍ᵻ kli̍hgbɛ̍ di̍i̍. Kǎ ǎn nu̍ chlǐh-ɛ.

¹⁸ Ǎn sà nǐ wɔ̍n, à Joi Jusu Klai-a blɛ iě dǒ mɔ̀ kli̍hgbɛ̍ we̍ nɛ o.