2 Tɛsoloniɔn 2 - Ku̍o̍ Delee 1999

Nyɔ̍ Sɔ̀n nyɔ̍

¹ À de̍di̍i̍ᵻ, ɛ̀ kɔ̍-a dǒ à Joi Jusu Klai-a ji̍-ɛ ke à gbǎ tàdùè ìè ɔ̍ i̍ jǎɛ pùn i̍-ɛ, à ba̍le mɔ̀-ɛ,

² pò mɔ̀ wɔ̌n wlu̍ àe̍e̍ nyɔ̍ poe ɛ̍ gbànwli, iě nyɔ̍ duuh iě ɛ̍ chlǐh wɛ̀ u̍h iě ka nu̍ ɛ̍ sɔ nɔ̌ à we̍-ɛ, mɔ̀-a ku̍ bɔ̌ tlɛ̍-ɛ. Pò u̍h la̍ Joi-a ji̍-i weɛ̍ nyni̍ wɛ̀-oɛ, ɛ̍ bɔ̌ mɔ̀-a ku̍ tlɛ̍-ɛ. Wɛ̀ mɔ̀-a wlùh wɔ̍ bɔ̌ dě de̍i̍ gbǎ-a ke dǒ ɛ̍ we̍.

³ Mɔ̀ bɔ̌ wɔ̌n-ɛ nyɔ̍ bɔ̌ mɔ̀ i̍ boe-ɛ dǒ dɛ̍-o-dɛ̍ we̍. Dɛ̍nu̍ɛ, pò weɛ̍ laa̍ ɛ̍ iě ji̍-ɛ, nɛ̀ Nyɔsoa kɛ̍n i̍ poe-ɛa mu̍ nɛ, wɛ̀ Nyɔ̍ Sɔ̀n iě à kɛ̍n wlǔh-i. Ɔ̍ tìh chɛn i̍ wɛ̀ ɔ̍ iě-e gbɔ̀lɔ-ɛ.

⁴ Ɔ̍ se̍ slaǎ sà dɛ̍ᵻ kli̍hgbɛ̍ nyɔ̍gbei-a dǎɛ-a nyɔsoa-a dɛ̍ dǎɛ mu̍. Ɔ̍ mu̍ ɔ̍ chɛ̀ i̍ bɛ̌-ɛ, wɛ̀ ɔ̍ iě ɔ̍ chɛ̀ gbalǎ i̍ jǎ-ɛ dě Nyɔsoa-a slaǎ sà gbò sɔ̀n. Ɔ̍ mu̍ ɔ̍ chɛ̀ Nyɔsoa dǎɛ.

⁵ Ti̍ ǐn nɛ-a dě mɔ̀ we̍-ɛ, dǒ ǐn sèàɛ̍ mɔ̀ ìh la wlùh. I̍h se̍ dǒ mɔ̀ wlì i̍ sǐ ae?

⁶ Mɔ̀-a chɛ̀ juo dɛ̍ ɛ̀ gbɛ̍n-a ka ɔ̍ kɛ̍n i̍ ke̍ te̍e̍ wɛ̀ ɔ̍-ɔ se̍a à kɛ̍n wlǔh-i iě ɔ̍ ti̍-a taǐn iě-a nyni̍-ɛ.

⁷ Dɛ̍nu̍ɛ, Nyɔ̍ Sɔ̀n-a kwile-e gbǐh nɛ dbo̍ kɛ̍n wɛ̀ se̍e̍. Jɛ nyɔ̍ ɔ̀ chlìì-a ɛ̀ la de̍ kaka-ɛ, ɔ̍ mu̍ ɛ̍ nu̍ te̍e̍ wɛ̀ ɔ̍ chɛ̀ iě dǒ wìè-i sà-ɛ.

⁸ Wɛ̀ Nyɔ̍ Sɔ̀n iě tà wlǔh-ɛ dǔ. Jɛ nɛ̀ Joi Jusu-a mu̍ ji̍, wɛ̀ ɔ̍ iě nyɔ̍ kɛ̍n wlǔh-i. Nɛ̀ ɔ̍ mu̍ Nyɔ̍ Sɔ̀n-a chɛ̀ dbǎ dǒ ɔ̍ poɔ-a mu̍-a dě ɔ̍ wɔ̍ɔ̍n sɔ-ɛ we̍. Wɛ̀ ɔ̍ iě ɔ̍-ɔ gbɔ̀lɔ dǒ ɔ̍ ji̍ la̍.

⁹ Nɛ̀ Nyɔ̍ Sɔ̀n-a mu̍ ji̍ dǒ Setɔn-a gbǐh ke ɔ̍ nu̍-dɛ̍ᵻ we̍. Wɛ̀ ɔ̍ iě nyɔ̍ i̍ boe jbaɛdih ke, dɛ̍ᵻ klaaᵻ ke nyɔ̍ wɔ̍n flɔn-ɛ dɛ̍ᵻ nu̍,

¹⁰ ɛ̍ ke nyɔ̍ i̍ boe dɛ̍ᵻ sɔ̀nᵻ kli̍hgbɛ̍ ke dǒ nyɔ̍ ùh-a mu̍-a gbɔ̀lɔ-ɛ we̍. Dɛ̍nu̍ɛ, u̍h se̍ wɔ̌n u̍h iě tìh-a taǐn i̍ jbɛɛ wɛ̀ u̍h iě pǔh.

¹¹ Ɛ̍ tìh-ɛ, Nyɔsoa nu̍ ɛ̍ iě u̍h gba̍ si̍h-a wìè, ɛ̍ iě ɛ̍ nu̍ u̍h iě dɛ̍ ɛ̀ nu̍-a si̍h-ɛ tìh chɛ̀ po̍.

¹² Wɛ̀ nyɔ̍ kli̍hgbɛ̍ ùh se̍-a tìh-a taǐn tìh chɛ̀ po̍ iě dɛ̍ᵻ sɔ̀nᵻ nu̍-ɛa po̍-a gbǐh-ɛ, wɛ̀ kɛ̀n iě u̍h kwa̍a̍ sɔ.

Mɔ̀ tba̍-ɛ chèɛ̀ dǒ pǔh-ɛ we̍

¹³ À de̍di̍i̍ᵻ, Joi jbɛɛ mɔ̀ɔ̍. À kɔn à iě Nyɔsoa tlɔ̌ po̍ ti̍ kli̍hgbɛ̍ we̍ dǒ mɔ̀-a tàà. Dɛ̍nu̍ɛ, sɔ dě tɔ̀blɔ̍ɔ̍-ɛ, Nyɔsoa tba̍ mɔ̀ chèɛ̀ mɔ̀ iě pǔh, wɛ̀ mɔ̀ iě ɔ̍ nyɔ̍ nu̍ dǒ ɔ̍ Sùù ke tìh-a taǐn wlùh gbaɛ we̍.

¹⁴ Ɛ̍ kɔn tìh bo ɔ̍ jii pɔ̀n chɛ̀ à ja-a dě mɔ̀ we̍-ɛ, iě ɔ̍ dǎ mɔ̀. Wɛ̀ mɔ̀ iě fɔ̌ kɔn dě à Joi Jusu Klai-a tìh-a i̍ bɛ̌-ɛ di̍i̍.

¹⁵ Ɛ̍ tìh-ɛ, à de̍di̍i̍ᵻ, mɔ̀ ku̍-e klì i̍, mɔ̀ iě dɛ̍ᵻ à poe-a mɔ̀ nǎ dǒ à wɔ̍i̍n wlu̍ ke chlǐh-dɛ̍ we̍-ɛ i̍ gbɛ̍n.

¹⁶ Ǎn sà nǐ wɔ̍n, à Joi Jusu Klai-a chɛ̀ ke à Baa Nyɔsoa ɔ̀ jbɛɛ àɔ̀, wɛ̀ ɔ̀ nyǐ-a à kmɔ̌ sie wlì i̍ bɛ̌-ɛ ke wlì tè dɛ̍ chɛ̀ dě ɔ̍ blɛ nɛ-ɛ di̍i̍-ɛ,

¹⁷ ɔ̍ iě mɔ̀-a wlùh fùka, wɛ̀ ɔ̍ iě mɔ̀ gbǐh ku̍u̍ po̍ dě dbo̍ chɛ̀ kli̍hgbɛ̍ ke wlu̍-ɛ di̍i̍.