2 Tɛsoloniɔn 1 - Ku̍o̍ Delee 1999

¹ Mɔ̍ Pɔɔ ke Sale ke Timote ke, nɔ̌ à we̍ bo chlǐh-dɛ̍ la ɛ̍ sɔ-ɔ. Ɛ̍ mu̍ chɔchi̍h nyɔ̍ nɛ-a dǒ Tɛsolonaika wlɔ̀ di̍i̍-ɛ we̍, ùh nɛ-a dě à Baa Nyɔsoa ke Joi Jusu Klai ja̍a̍-ɛ.

² Ǎn sà nǐ wɔ̍n Baa Nyɔsoa ke Joi Jusu Klai iě mɔ̀ blɛ ke wlùh-a i̍ tè-ɛ nyǐ.

Sàwi̍h sì-ɛa mu̍ nɛ dǒ Klai-a ji̍ la̍

³ À de̍di̍i̍ᵻ, à kɔn à iě Nyɔsoa tlɔ̌ po̍ ti̍ kli̍hgbɛ̍ we̍ dǒ mɔ̀-a tàà. À blaɛ i̍ à iě ɛ̍ nu̍, dɛ̍nu̍ɛ, mɔ̀-a wlùh gbaɛ-a ku̍ i̍ fùùh fùùh, iě mɔ̀-a nyɔ̍ juh-ɛ, u̍h-a we̍ jbɛɛ-a gbǎ kɛ̍n.

⁴ Ɛ̍ tìh-ɛ, à chɛ̀-a po̍ mɔ̀-a bu̍hᵻ wlù i̍ dě Nyɔsoa-a chɔchi̍h nyɔ̍ nynɛ̌. Dɛ̍nu̍ɛ, klě jě-ɛ ke jua̍i̍ sàɛ̀-ɛ ji̍ mɔ̀ we̍, wɛ̀ dě ɛ̍ di̍i̍-ɛ mɔ̀-a ku̍-e klì i̍ iě mɔ̀-a blě wlùh gbaɛ.

⁵ Ìh kli̍hgbɛ̍ la i̍h-a flɔn-ɛ ɛ̍ we̍i̍ ka Nyɔsoa-a pa̍-a i̍ slɛ̌-ɛ taɔ-ɛ. Ɔ̍ nu̍ ɛ̍-ɛ, wɛ̀ mɔ̀ iě ɔ̍ kmɔ̌ wlu̍ i̍ kɔn-ɛ di̍i̍ mu̍ ka̍ nɛ, ɛ̀ kɔn tìh mɔ̀-a sàɛ̀-a jua̍i̍-ɛ.

⁶ Nyɔsoa-a nu̍-dɛ̍ slɛ̌ i̍, ɛ̍ tìh-ɛ, ɔ̍ mu̍ nyɔ̍ ùh sàɛ̀-a mɔ̀ jua̍i̍-ɛ jua̍i̍ sàɛ̀.

⁷ Mɔ̀ɔ̍ ùh-a sàɛ̀-a jua̍i̍-ɛ, ɔ̍ mu̍ ɛ̍ nu̍ mɔ̀ ke àɔ̀ ke à iě feɛ i̍ jě. Ti̍ Joi Jusu ke ɔ̍ gbǐh ǐnchɔ̀-a mu̍-a dě ja̍i̍wlɔ̀ sɔ dě nɛ̍-a pàìbǒ di̍i̍-ɛ, dǒ ìh la i̍h-a mu̍ nɛ-ɛ.

⁸ Wɛ̀ ɔ̍ iě nyɔ̍ ùh se̍-a Nyɔsoa juo-ɛ ke, nyɔ̍ ùh se̍-a pɔ̀n chɛ̀ ɛ̀ kɔ̍-a dǒ à Joi Jusu pùn i̍-ɛ ɛ̍ wlu̍ nu̍-ɛ kàn gbɛ̍n.

⁹ U̍h-a mu̍ kàn gbɛ̍n-ɛ, wɛ̀ u̍h iě-e gbɔ̀lɔ nɔ̌ kmɔ̌-a kmɔ̌. U̍h se̍ Joi-a jua̍a̍ jě mu̍, ɛ̍ ke ɔ̍ tìh-a i̍ bɛ̌-ɛa i̍ bɛ̌ɛ gbǐh ke.

¹⁰ Pò ɔ̍ ji̍ dǒ weɛ̍ laa̍ di̍i̍-ɛ, wɛ̀ ɔ̍ wlùh gbaɛ nyɔ̍ iě ɔ̍ nynɛ̌ i̍ bɛ̌-ɛ, u̍h iě ɔ̍ ja̍ tè. Mɔ̀-a mu̍ dě u̍h nynɛ̌ nɛ ke, dɛ̍nu̍ɛ, mɔ̀ gbaɛ tu̍owli à po̍-a dě mɔ̀ we̍-ɛ wlùh.

¹¹ Ɛ̍ kɔn tìh à ba̍le dǒ mɔ̀-a tàà ti̍ kli̍hgbɛ̍ we̍. À ba̍le-e à Nyɔsoa-a mɔ̀ dǎ-a la mɔ̀ iě ɛ̍ ka̍ nɛ. Wɛ̀ ɔ̍ iě dɛ̍ᵻ chɛ̀ kli̍hgbɛ̍ mɔ̀-a pɔ̀n-a nu̍-ɛ i̍-ɛ ke mɔ̀-a dbo̍ mɔ̀ nu̍-a dě wlùh gbaɛ di̍i̍-ɛ i̍ wɔ̀ dě ɔ̍ gbǐh di̍i̍.

¹² Wɛ̀ à Joi Jusu-a nynɛ̌ iě i̍ bɛ̌ dě mɔ̀ ja̍a̍, iě mɔ̀ naɛ iě i̍ bɛ̌ ke dě à Nyɔsoa ke Joi Jusu Klai-a blɛ nɛ-ɛ di̍i̍.