2 Kɔwlɛntiɔn 9 - Ku̍o̍ Delee 1999

Nyɔ̍ dɔu-a mu̍ Nyɔsoa tlɔ̌ po̍

¹ Dɛ̍ kɔn tìh iě-a mɔ̀ we̍ chlǐh dǒ nyǐ-dɛ̍ᵻ à mu̍-a dbo̍ dě Nyɔsoa nyɔ̍ ùh nɛ-a dě Judia bloa̍ kɛ̍n-ɛ we̍-ɛ, ɛ̍ se̍ nɛ.

² Ǐn juo ka mɔ̀-a wlùh-a nu̍-a jàjà nu̍-ɛ nyɔ̍ we̍ gbǎ tìh-ɛ. Ǐn po̍ bu̍hᵻ wlù i̍ dě Mɛsedonia nyɔ̍ we̍ mɔ̀-a tìh. Na̍a̍, “À ba̍ᵻ Nyɔsoa nyɔ̍ nɛ-a dě Akaia bloa̍ kɛ̍n-ɛ, u̍h jě ti̍ sɔ dě sɔ̀n nɛ-ao de̍-ɛ we̍ u̍h iě nyɔ̍ we̍ gbǎ.” Mɔ̀-a wlùh-a jàjà nu̍-ɛ bo ɛ̀ nu̍ ɛ̍ iě u̍h-a dɔu-a pɔ̀n dɛ̍ nyǐ-ɛ i̍.

³ Ɛ̍ kɔn ǎn dbo̍ de̍di̍i̍ᵻ la wɛ̀ tìh à po̍-a bu̍hᵻ wlù i̍ mɔ̀-a tìh-ɛ, ɛ̍-ɛ je̍e si̍h nu̍, wɛ̀ mɔ̀ iě ti̍ jě ka na̍ mɔ̀-a mu̍-a nɛ-ɛ.

⁴ Pò Mɛsedonia nyɔ̍ ke ǐn ke à ji̍ wɛ̀ à iě mɔ̀ kɛ̍n jɛɛ wɛ̀ mɔ̀ɔ̍ se̍ ti̍ jě-ɛ, nɛ̀ tɛ̀n-a mu̍ à nu̍, dɛ̍nu̍ɛ, à tè mɔ̀ wlì kaa̍. Tɛ̀n-a mu̍ mɔ̀ nu̍ ke kaa̍ ɛ̍ iě à sìì.

⁵ Ɛ̍ tìh-ɛ, ɛ̍ mu̍ jii̍ nmɔ dǒ ǐn we̍ iě à de̍di̍i̍ᵻ i̍ tèle u̍h iě ǐn jǔ ji̍ dě mɔ̀ we̍, wɛ̀ u̍h iě ti̍ nya̍ sie u̍h iě dɛ̍ᵻ gba̍a̍ po̍ dǒ nyǐ-dɛ̍ᵻ kɔn wlu̍ mɔ̀ po̍-a tɔ̀ma̍a̍-aɛ we̍. Nɛ̀ i̍h-a mu̍ gba̍a̍ po̍-eɛ dǒ mɔ̀-a chɛ̀-a wlùh wlǎ we̍, ɛ̍ se̍ mɔ̀ gbɛ̍n kai.

⁶ Mɔ̀ bɔ̌ mǎle-ɛ ka nyɔ̍ ɔ̀ po̍-a dɛ̍ᵻ wei-ɛ, nɛ̀ ɔ̍ mu̍-a dɛ̍ᵻ wei chɛ̍n-ɛ. Iě nyɔ̍ ɔ̀ po̍-a dɛ̍ᵻ dɔu-ɛ, nɛ̀ ɔ̍ mu̍-a dɛ̍ᵻ dɔu chɛ̍n-ɛ.

⁷ Jɔ-ɛ, nɛ̀ ɔ̍ nyǐ dɛ̍ ɔ̍ tba̍-ɛa dě ɔ̍ chɛ̀ di̍i̍ ɔ̍ iě-a nyǐ-ɛ. Ɔ̍ wlùh bɔ̌ seɔn gbǎ-a dǒ ɛ̍ nyǐ laa̍ àe̍e̍ ɔ̍ bɔ̌ ɛ̍ nyǐ-ɛ nyɔ̍ gbɛ̍n kai. Dɛ̍nu̍ɛ, Nyɔsoa jbɛɛ nyɔ̍ ɔ̀ kɔn wlùh-a tè-a i̍ wɛ̀ ɔ̀ nyǐ-a nyɔ̍ dɛ̍-ɛ.

⁸ Nɛ̀ Nyɔsoa bɛ̌ɛ ɔ̍ iě mɔ̀ pɔ̀ìě kli̍hgbɛ̍ nyǐ. Wɛ̀ mɔ̀ iě ìh kli̍hgbɛ̍ mɔ̀ nɛ-a blě ka̍-ɛ blě ti̍ kli̍hgbɛ̍ we̍ dǒ mɔ̀-a chɛ̀ we̍. Nɛ̀ mɔ̀-a mu̍ dɛ̍ᵻ tlùgbei̍ blě dǒ nu̍-dɛ̍ᵻ chɛ̀ kli̍hgbɛ̍ nu̍-ɛ we̍.

⁹ Nyɔsoa-a wlu̍ la̍a̍, “Nyɔ̍ chɛ̀ nyɔ̍-ɔ chlì-i sɔ̍n de̍ dǒ nyɔ̍gbà nyɔ̍ dɛ̍ nyǐ la̍-a. Ɔ̍ dɛ̍ chɛ̀ se̍ mǎ mu̍ nɔ̌ kmɔ̌-a kmɔ̌.”

¹⁰ Nyɔsoa bo ɔ̀ nyǐ po̍-dɛ̍ᵻ gbà nyɔ̍ dɛ̍ᵻ jɔ̌. Ɔ̍-ɔ due laa̍ bo ɔ̀ nyǐ nyɔ̍ kli̍hgbɛ̍ di̍-dɛ̍ᵻ. Ɔ̍ mu̍ mɔ̀ dɛ̍ᵻ jɔ̌ kli̍hgbɛ̍ nyǐ, wɛ̀ ɔ̍ iě ɛ̍ nu̍ i̍h iě ku̍, wɛ̀ ɔ̍ iě mɔ̀-a nu̍-dɛ̍ᵻ chɛ̀-a jě-e dɛ̍ᵻ i̍ tìè-e.

¹¹ Nyɔsoa-a mu̍ mɔ̀ pàn-ɛ kaa̍, wɛ̀ mɔ̀ iě gblɛ̍n-ɛ nmɔ ti̍ kli̍hgbɛ̍ we̍. Iě nyɔ̍ dɔu iě ɔ̍ tlɔ̌ po̍ dǒ mɔ̀-a nyǐ-dɛ̍ᵻ à mu̍-a u̍h nyǐ-ɛ we̍.

¹² Dbo̍ la mɔ̀ nu̍-aɛ, ɛ̍ se̍ Nyɔsoa nyɔ̍ nɛ due we̍ gbǎ mu̍ dǒ dɛ̍ u̍h nɛ-a blě ka̍-ɛ we̍, jɛ ɛ̍ mu̍ ɛ̍ nu̍ ke iě nyɔ̍ dɔu iě Nyɔsoa tlɔ̌ po̍ wlu̍-u ba̍le.

¹³ Dbo̍ la ɛ̍ mu̍ ɛ̍ to ka mɔ̀ blě-a Nyɔsoa gblɛ̍n-ɛ. Mɔ̀-a pɔ̀n chɛ̀ ɛ̀ kɔ̍-a dǒ Klai pùn i̍-ɛ dɛ̍ɛ̍ jě-ɛ ke mɔ̀-a gblɛ̍n-ɛ nmɔ-ɛ dǒ u̍h ke nyɔ̍ kli̍hgbɛ̍ duuh we̍-ɛ, ɛ̍ mu̍ ɛ̍ nu̍ nyɔ̍ dɔu iě Nyɔsoa-a nynɛ̌ i̍ bɛ̌-ɛ.

¹⁴ U̍h-a mu̍ mɔ̀-a wlùh blě wɛ̀ u̍h iě dǒ mɔ̀-a tàà ba̍le dǒ blɛ kaɛn Nyɔsoa nyǐ-a mɔ̀-ɛ we̍.

¹⁵ Mɔ̀ à po̍ Nyɔsoa tlɔ̌ dǒ ɔ̍ nyǐ-dɛ̍ ɔ̍ nyǐ-a àɔ̀-ɛ we̍, ɛ̀ kɔn wɔ̍n wlɔ̀ nyi̍ɔ̍ se̍-a blě u̍h iě-a we̍ i̍ sèàɛ̍-ɛ.