2 Kɔwlɛntiɔn 8 - Ku̍o̍ Delee 1999

Blě wlùh wlǎ dǒ dɛ̍ nyǐ-ɛ we̍

¹ À de̍di̍i̍ᵻ, à pɔ̀n mɔ̀ wlùh sèàɛ̍ i̍ dǒ dɛ̍ Nyɔsoa-a blɛ nɛ-ɛ nu̍-a dǒ chɔchi̍h nyɔ̍ nɛ-a Mɛsedonia bloa̍ kɛ̍n-ɛ we̍.

² Tìh jě-ɛ klaa ji̍ u̍h we̍, jɛ u̍h-a nmɔ-ɛ kaa̍ ti̍ kli̍hgbɛ̍ we̍. U̍h nu̍ nyɔ̍gbà pa̍ nyɔ̍-a pɔ̀ɔ̍pìe̍ naɛ, jɛ u̍h blě wlùh wlǎ kaa̍ dǒ dɛ̍ nyǐ-ɛ we̍.

³ Ǎn sèàɛ̍ mɔ̀ wlùh, dɛ̍ u̍h bɛ̌ɛ-a u̍h iě-a nyǐ-ɛ, nɛ̀ u̍h nyǐ ɛ̍ u̍h. U̍h sì tà u̍h kɔn u̍h iě-a siee-a chɛ̀-ɛ, dǒ u̍h-a chɛ̀-a wlùh wlǎ-a sǔh we̍.

⁴ U̍h ba̍le àɔ̀ chɛ̀ɛ̌chɛ̀ u̍h iě-o sɔ̍n po̍ ka̍ jě dǒ u̍h ba̍ᵻ Nyɔsoa nyɔ̍ ùh nɛ-a dě Judia bloa̍ kɛ̍n-ɛ we̍ gbǎ la̍.

⁵ Iě u̍h nu̍ ɛ̀ la, ɛ̀ à se̍-a wlùh kɛ̍n tè-ɛ. Sàǐtòò-ɛ, u̍h nyǐ u̍h-a chɛ̀ Joi, wɛ̀ u̍h nyǐ u̍h-a chɛ̀ àɔ̀ ke ɛ̀ Nyɔsoa-a pɔ̀n-a u̍h iě-a nu̍-ɛ.

⁶ Ɛ̍ tìh-ɛ, à ba̍le Taitɔ ɔ̀ tè-a dbo̍ chɛ̀ la gbɔ̀ dě mɔ̀ nynɛ̌-ɛ, ɔ̍ iě ɛ̍ i̍ wɔ̀.

⁷ Ka mɔ̀ sìì-a nyɔ̍ duuh dǒ dɛ̍ᵻ kli̍hgbɛ̍ we̍-ɛ, ɛ̀ nu̍-a wlùh gbaɛ blě-ɛ ke, wlu-ɛ juo-ɛ ke, tɔɔ blě-ɛ ke, nyɔ̍ we̍ gbǎ wlùh blě-ɛ ke, àɔ̀ jbɛɛ ke à pɔ̀n mɔ̀ iě nyɔ̍ sìì dǒ dbo̍ chɛ̀ la nu̍-ɛ we̍ ke.

⁸ Ǐn se̍ ɛ̀ laa̍ sà iě mɔ̀ telě nyǐ mɔ̀ iě nu̍. Jɛ nyɔ̍ duuh-a nyɔ̍ tìh kma-a tɛ̀n mɔ̀ɔ̍ pò mɔ̀-a jbɛɛ-ɛ nu̍ jbɛɛ chɛ̀ɛ̌chɛ̀-ɛ.

⁹ Mɔ̀ juo à Joi Jusu Klai-a blɛ nɛ-ɛ. Ɔ̍ pàn-ɛ de, jɛ ɔ̍ nu̍ ɔ̍ chɛ̀ nyɔ̍gbà nyɔ̍ we̍i̍ mɔ̀-a tìh, wɛ̀ ɔ̍ nyɔ̍gbà pa̍-a iě ɛ̍ nu̍ mɔ̀ iě pàn.

¹⁰ Sɔ̀n nɛ-ao de̍-ɛ, mɔ̀ɔ̍ bo ùh nu̍ sàǐtòò nyɔ̍ ùh nyǐ dɛ̍. Mɔ̀ nu̍ ɛ̍, dɛ̍nu̍ɛ, mɔ̀-a pɔ̀n ɛ̍ nu̍ ɛ̍ i̍ dɛbo. Dě ǎn flɔ̍nwlùh we̍-ɛ, ɛ̍ mu̍ jii̍ nmɔ dǒ mɔ̀ we̍

¹¹ mɔ̀ iě ɛ̍ i̍ wɔ̀ kaka. Mɔ̀-a wlùh nu̍ jàjà dǒ ɛ̍ i̍ wɔ̀-ɛ we̍ ka mɔ̀ nu̍-a ɛ̍ gbɔ̀ tè-ɛ. Mɔ̀ nu̍ ɛ̍ dǒ dɛ̍ ɛ̀ mɔ̀ blě-aɛ we̍.

¹² Pò mɔ̀-a wlùh ja jàjà nu̍ mɔ̀ iě dɛ̍ nyǐ-ɛ, Nyɔsoa-a mu̍ mɔ̀-a nyǐ-dɛ̍ i̍ gbɛ̍n dǒ ìh mɔ̀ blě-aɛ we̍. Ɔ̍ se̍ dɛ̍ mɔ̀ se̍-a blě-ɛ mɔ̀ɔ̍ i̍ pɔ̀n-ɛ mu̍.

¹³ Ɛ̍ se̍ nɛ̀ nyɔ̍ duuh iě kɛ̍n i̍ flɔn wɛ̀ gbɛ̀ iě mɔ̀ɔ̍ nɔ̀ɔ̍ bla̍ kai, jɛ mɔ̀ iě beɛ̍ɛ tìh bo.

¹⁴ Mɔ̀ blě dɛ̍ dɔu kaka, iě u̍h se̍ dɛ̍ dɔu blě. Ɛ̍ tìh-ɛ, mɔ̀ gbǎ u̍h we̍, wɛ̀ pò ti̍ ji̍ u̍h blě dɛ̍ dɔu wɛ̀ mɔ̀ se̍ dɛ̍ dɔu blě-ɛ, u̍h iě mɔ̀ we̍ gbǎ ke, wɛ̀ mɔ̀ iě beɛ̍ɛ.

¹⁵ Nyɔsoa-a wlu̍ la̍a̍, “Nyɔ̍ ɔ̀ gbòe-a di̍-dɛ̍ᵻ dɔu i̍-ɛ, ɔ̍ se̍ di̍-dɛ̍ᵻ dɔu blě, iě nyɔ̍ ɔ̀ gbòe-a di̍-dɛ̍ᵻ wei i̍-ɛ, ɔ̍ se̍ di̍-dɛ̍ᵻ wei blě.”

Pɔɔ dbo̍ Taitɔ

¹⁶ Jɛ à po̍ Nyɔsoa tlɔ̌, ɔ̀ nu̍-a ɛ̍ iě Taitɔ kma-a mɔ̀-a tìh ka à nu̍-a mɔ̀-a tìh kma-aɛ.

¹⁷ Ɔ̍ se̍ à ba̍le wlu̍ nɛ due i̍ gbɛ̍n, jɛ dǒ ɔ̍ wlùh-a jàjà nu̍-ɛ we̍-ɛ, ɔ̍ ji̍-e mɔ̀ we̍ dǒ ɔ̍ chɛ̀-a wlùh wlǎ we̍.

¹⁸ À dbo̍ ɔ̍ ke à de̍di̍i̍ ɔ̀ chɔchi̍h nyɔ̍ kli̍hgbɛ̍ juo-a dǒ ɔ̍ pɔ̀n chɛ̀ bla̍-a we̍-ɛ.

¹⁹ Ɛ̍ se̍ ɛ̍ nɛ due, jɛ chɔchi̍h nyɔ̍ tba̍ ɔ̍ chèɛ̀ ɔ̍ ke à iě nyǐ-dɛ̍ᵻ la wìèlè ja ɛ̀ mu̍-a Joi-a nynɛ̌ i̍ bɛ̌-ɛ, wɛ̀ ɛ̍ iě ɛ̍ to ka à pɔ̀n-a nyɔ̍ we̍ gbǎ-a i̍-ɛ.

²⁰ À nu̍ nɛnɛ̌ wɛ̀ nyɔ̍-ɔ je̍e à nynɛ̌ sà ka à nu̍-a nyǐ-dɛ̍ᵻ dɔu la dbo̍ nui-ɛɛ.

²¹ À wlùh dɛ nu̍ à iě dɛ̍ ɛ̀ slɛ̌-a i̍-ɛ nu̍. Ɛ̍ se̍ ɛ̀ slɛ̌-a i̍ dě Joi jlǐh-ɛ nɛ due, jɛ ɛ̀ slɛ̌-a i̍ ke dě nyɔ̍ jlǐh-ɛ.

²² À dbo̍ u̍h ke à de̍di̍i̍ dɔɔ. À tɛ̀n ɔ̍-ɔ wɛ̀ kaa̍, iě à juo-o dɛ̍ i̍ ka ɔ̍ wlùh-a nu̍-a jàjà ɔ̍ iě-a nyɔ̍ we̍ gbǎ-ɛ. Kaka la̍ ka ɔ̍ tè-a mɔ̀ wlì kaa̍-ɛ, ɛ̍ nu̍ ɔ̍ wlùh-a jàjà kaa̍ ɛ̍ sìì sàǐtòò naɛ ɔ̍ iě mɔ̀ we̍ gbǎ.

²³ Taitɔ nɔ̀ɔ̍-ɛ, ɔ̍ nu̍ ǐn ba̍ iě à dbee mɔ̀ jǔ. À de̍di̍i̍ᵻ nɔ̀ɔ̍-ɛ, u̍h-u chɔchi̍h nyɔ̍-a tu̍owli po̍ nyɔ̍, iě u̍h-a nyǐ Klai tìh-a i̍ bɛ̌-ɛ.

²⁴ Mɔ̀ to ɛ̍ ka mɔ̀ jbɛɛ-a u̍h-uɛ, wɛ̀ chɔchi̍h nyɔ̍ kli̍hgbɛ̍ iě-o dɛ̍ i̍ juo dɛ̍ kɔn tìh à po̍-a mɔ̀-a bu̍hᵻ wlù i̍-ɛ.