2 Kɔwlɛntiɔn 7 - Ku̍o̍ Delee 1999

¹ Ǎn tìh kma nyɔ̍, Nyɔsoa po̍ ìh la i̍h-a wlu̍ tɔ̀ma̍a̍ dǒ à we̍. Ɛ̍ tìh-ɛ, dɛ̍ᵻ kli̍hgbɛ̍ ìh-a nɛ-ɛa nyɔ̍-a ku̍ ke sùù nɛi̍-ɛ, mɔ̀ à ti̍ɛ̍ɛn i̍h we̍ i̍. Mɔ̀ à nu̍ ɛ̍ à Nyɔsoa gbiǐh jě-ɛ iě ɛ̍ nu̍ à nu̍-dɛ̍ᵻ iě gblɛ̍ja̍i̍ wɛ̀ chɛ̀ɛ̌chɛ̀.

Taitɔ nui Pɔɔ mɔna̍

² Mɔ̀ flɔn-ɛ mɔ̀-a wlùh kɛ̍n i̍ dǒ à we̍. À se̍ nyɔ̍-o-nyɔ̍ dɛ̍ sɔ̀n pùn nu̍. À se̍ nyɔ̍-o-nyɔ̍ jii̍ nyni-i. À se̍ nyɔ̍-o-nyɔ̍ kanieǐ di̍.

³ Ǐn se̍ ɛ̀ la bla̍ iě mɔ̀ kɛ̀n sà. À jbɛɛ mɔ̀ɔ̍ kaa̍, kǎ ǐn dǎ sàǐtòò. Pò à mɛ̌-o àe̍e̍ à nɛ kmɔ̌-o, dɛ̍-o-dɛ̍ se̍ à i̍ gblè mu̍.

⁴ Ǐn tè mɔ̀ wlì kaa̍. Mɔ̀ fùka ǎn wlùh, iě ǎn po̍ mɔ̀-a tìh-a bu̍hᵻ wlù i̍ kaa̍, wɛ̀ ǎn nu̍ mɔna̍ dě ǎn tìh jě-ɛ kli̍hgbɛ̍ di̍i̍.

⁵ Ti̍ à ji̍-a Mɛsedonia bloa̍ kɛ̍n-ɛ, à se̍ fɔ fu̍u̍. À jě tìh tà kli̍hgbɛ̍, wɛ̀ à ke nyɔ̍ duuh sà wɔ̍ɔ̍n i̍, iě à ple̍ faɔn ke.

⁶ Jɛ Nyɔsoa ɔ̀ fùka-a nyɔ̍ ùh kɔn wlùh gbǎ-a seɔn-ɛ, ɔ̍ bo ɔ̀ fùka à wlùh dǒ Taitɔ-a ji̍-ɛ we̍.

⁷ Ɛ̍ se̍ ɔ̍ ji̍-ɛ nɛ due ɛ̀ se̍ à wlùh fùka, jɛ gbɛ̀ ɔ̍ sà-a kɛ̍n dǒ ka mɔ̀ nu̍-a ɔ̍ gbǐh ku̍u̍ po̍-ɛ we̍-ɛ, ɛ̍ fùka à wlùh ke. Ɔ̍ sèàɛ̍ à wlùh ka mɔ̀-a wlùh gbǎ-a dě de̍i̍, iě mɔ̀-a pɔ̀n-a ǐn jě-ɛ i̍ kaa̍-ɛ, ɛ̍ ke ka mɔ̀ nu̍-a ǎn tìh kma-a ke. Ɛ̍ tìh-ɛ, ǐn gbǎ mɔna̍ kaa̍ ɛ̍ sìì sàǐtòò naɛ.

⁸ Jɛ pò chlǐh-dɛ̍ ǐn chlǐh-a mɔ̀ we̍-ɛ, ɛ̍ po̍ mɔ̀-a wlùh seɔn-ɛ, nɛ̀ ɛ̍ se̍ ǎn wlùh dě de̍i̍ po̍ ka ǐn chlǐh-a ɛ̍-ɛ. Ɛ̍ kɔn ɛ̍ iě ǎn wlùh dě de̍i̍ po̍ de ti̍ ǐn wɔ̌n-a i̍h ka ɛ̍ po̍-a mɔ̀-a wlùh seɔn dǒ ti̍ di̍i̍-ɛ.

⁹ Jɛ kaka la̍ mɔna̍-a nu̍ m. Ɛ̍ se̍ ǐn po̍-a mɔ̀-a wlùh seɔn-ɛ tìh, jɛ ɛ̍ nu̍ ɛ̍ iě mɔ̀ bǐi i̍ mɔ̀ poe mɔ̀-a gblɛ̍n sɔ̀ɛ̀n kɛ̍n i̍. Mɔ̀-a wlùh-a seɔn gbǎ-a la Nyɔsoa-a wlùh dɛ bo. Ɛ̍ tìh-ɛ, à se̍ mɔ̀ dɛ̍ sɔ̀n pùn nu̍.

¹⁰ Wlùh-a seɔn gbǎ-a ɛ̀ nu̍-a Nyɔsoa-a wlùh dɛ-ɛ, ɛ̍ blě nyɔ̍-a i̍ bǐi-ɛ, ɛ̍ ja pǔh-ɛ. Ɛ̍-ɛ po̍ nyɔ̍-a wlùh dě de̍i̍. Jɛ kmɔ̌ we̍ wlùh-a seɔn gbǎ-a ja mɛ̌ɛ.

¹¹ Mɔ̀ jě dɛ̍ Nyɔsoa nu̍-a mɔ̀-a wlùh-a seɔn gbǎ-a, kǎ ɛ̍ tìh nu̍-a mɔ̀ i̍ gbɛ̍n-ɛ iě mɔ̀-a wlùh-a nu̍-a jàjà mɔ̀ iě-a ɛ̍ to ka mɔ̀ se̍-a dɛ̍ sɔ̀n nu̍-ɛ. Mɔ̀ gbǎ jlu̍h-u dǒ dɛ̍ ɛ̀ gbǎ-aɛ we̍, iě ɛ̍ wa̍ mɔ̀ dɛ̍ we̍. Ɛ̍ nu̍ ɛ̍ mɔ̀-a pɔ̀n ǐn jě-ɛ i̍ kaa̍. Ɛ̍ nu̍ ɛ̍ wɛ̀ mɔ̀ kma ǎn tìh, iě mɔ̀-a wlùh-a nu̍ jàjà mɔ̀ iě nyɔ̍ ɔ̀ nu̍-a dɛ̍ sɔ̀n-ɛ kàn gbɛ̍n. Mɔ̀ to ɛ̍ wɛ̀ chɛ̀ɛ̌chɛ̀ ka mɔ̀ se̍-a dɛ̍ sɔ̀n nu̍-ɛ.

¹² Ǐn chlǐh chlǐh-dɛ̍ laa̍ gbɛɛ, jɛ ɛ̍ se̍ ɔ̀ nu̍-a dɛ̍ sɔ̀n àe̍e̍ jɔ ɔ̍ nu̍-a dɛ̍ sɔ̀n pùn-ɛ ɔ̍ tìh ǐn se̍ ɛ̍ chlǐh. Jɛ ǐn chlǐh ɛ̍ wɛ̀ ɛ̍ iě we̍i̍ flɔn dě mɔ̀ we̍ ka Nyɔsoa juo-a ɛ̍ mɔ̀ blě-a à wlùh-ɛ.

¹³ Ɛ̍ bo ɛ̀ fùka à wlùh. À wlùh fùka-ɛ gbɛɛ, jɛ à gbǎ mɔna̍-a kaa̍ dǒ Taitɔ-a mɔna̍-a gbǎ-a we̍. Dɛ̍nu̍ɛ, mɔ̀ kli̍hgbɛ̍ nu̍ ɛ̍ iě ɔ̍ wlùh tè i̍.

¹⁴ Ǐn po̍ bu̍hᵻ wlù i̍ dě ɔ̍ we̍ mɔ̀-a tìh, iě mɔ̀ se̍ ǐn tɛ̀n nui. Jɛ ka dɛ̍ᵻ kli̍hgbɛ̍ à sà-a dě mɔ̀ we̍ nu̍-a tìh-a taǐn-ɛ, kǎ à bu̍hᵻ à po̍-a wlù i̍ dě Taitɔ we̍-ɛ nu̍ ɛ̍ to ɛ̍ ka ɛ̍ nu̍-a tìh-a taǐn-ɛ ke.

¹⁵ Ɛ̍ tìh-ɛ, ka mɔ̀ nu̍-a ɔ̍ wlu̍ nu̍-ɛ ke, ɔ̍ i̍ gbɛ̍n-ɛ dǒ faɔn ke ku̍-a tlɛ̍-ɛ we̍-ɛ, pò i̍h sǐ dǒ ɔ̍ wlì i̍-ɛ, nɛ̀ ɛ̍ kui ɔ̍ mɔ̀ɔ̍ jbɛɛ i̍.

¹⁶ Ǐn nu̍ mɔna̍ kaa̍, dɛ̍nu̍ɛ, ǐn tè mɔ̀ wlì chɛ̀ɛ̌chɛ̀.