2 Kɔwlɛntiɔn 5 - Ku̍o̍ Delee 1999

¹ À juo ka pò à nyi̍ɔ̍ku la ɛ̀ wɔ̀-a wɛ̀ɛ̀ sɔ̍n wlù à tǐn-ae di̍i̍-ɛ, pò ɛ̍ gbɔ̀lɔ-ɛ, Nyɔsoa-a mu̍ gbò blě dě ja̍i̍wlɔ̀ à iě dě ɛ̍ di̍i̍ tǐn. Gbò ɔ̍ chɛ̀ po̍-a ɛ̀ se̍-a gbɔ̀lɔ mu̍ nɔ̌ kmɔ̌-a kmɔ̌-ɛ bo.

² Kaka la̍, dě à di̍i̍-a si̍n-i. Dɛ̍nu̍ɛ, à pɔ̀n à iě-e à gbò ɛ̀ nɛ-a dě ja̍i̍wlɔ̀-ɛ di̍i̍ pa̍ ka nyɔ̍-a pa̍ jlii̍-ɛ.

³ Pò à nɛ dě ɛ̍ di̍i̍-ɛ, nɛ̀ à se̍ gbaǎn chɛn mu̍.

⁴ Ka à tǐn-a nɔ̌ kmɔ̌-a wɛ̀ɛ̀ sɔ̍n wlù la di̍i̍ ke̍-ɛ, dě à di̍i̍-a si̍n-i ka gbɛ̀-a bla̍ nyɔ̍-ɛ. Ɛ̍ se̍-ɛ à iě dě à kmɔ̌ we̍ ku̍ di̍i̍ sɔ, jɛ à pɔ̀n à iě à ku̍ ɛ̀ nɛ-a dě ja̍i̍wlɔ̀-ɛ di̍i̍ nɛ, wɛ̀ à ku̍ ìh-a mu̍-a mɛ̌-ɛ, i̍h iě ku̍ jih se̍-a mɛ̌ mu̍-ɛ sàɛ̀.

⁵ Nyɔsoa bo ɔ̍ po̍ à gba̍a̍ dǒ ɛ̀ la we̍. Iě ɔ̍ nyǐ à ɔ̍ Sùù ɛ̍ iě ɛ̍ to ka ɔ̍ mu̍-a ɛ̍ nu̍-ɛ.

⁶ Ɛ̍ tìh-ɛ, à bɛ̌ wlì i̍ ti̍ kli̍hgbɛ̍ we̍. À juo ka à nɛ-a dě à nyi̍ɔ̍ku di̍i̍-ɛ, nɛ̀ à se̍ dě Joi we̍ nɛ.

⁷ Dě à wlùh gbaɛ di̍i̍ bo à na-ɛ. À-a na-ɛ dě ìh nyɔ̍-a jě-aɛ di̍i̍.

⁸ À bɛ̌ wlì i̍. Ɛ̍ mu̍ à gbǐh po̍ à iě dě à nyi̍ɔ̍ku di̍i̍ sɔ, à iě dě Joi we̍ tǐn.

⁹ Ɛ̍ tìh-ɛ, pò à nɛ dě à nyi̍ɔ̍ku di̍i̍ àe̍e̍ à se̍ dě ɛ̍ di̍i̍ nɛ-ɛ, à iě ɔ̍ wlùh i̍ pɛ̍n-ɛ, ɛ̍ kɔn di̍i̍chì bo à chɛ̍n.

¹⁰ Dɛ̍nu̍ɛ, à kli̍hgbɛ̍ à kɔn à iě dǒ Klai-a taɔ gbalǎ jǔ i̍ nyna. Jɔ-ɛ, ɔ̍ mu̍ dɛ̍ jě dǒ dɛ̍ chɛ̀ àe̍e̍ dɛ̍ sɔ̀n ɔ̍ nu̍-a nɔ̌ kmɔ̌-ɛ we̍.

Nyɔ̍ ke Nyɔsoa-a jbɛɛ-a jii-e Klai ja̍a̍

¹¹ Ɛ̍ tìh-ɛ, à ple̍ Joi Nyɔsoa-a faɔn. Ɛ̍ kɔn à fɔ̀n dɛ̍ we̍ à iě nyɔ̍ duuh-a wlùh fèàɛ̀. Nyɔsoa ju̍o̍e à dɛ̍ᵻ kli̍hgbɛ̍ we̍ i̍. Ǐn tè ɛ̍ wlì mɔ̀ iě laǎn à i̍ juo-ɛ nu̍ ke dě mɔ̀-a wlùh di̍i̍.

¹² À se̍ à chɛ̀ tìhwe̍ po̍-ɛ kɛ̍n i̍ gba̍ dě mɔ̀ we̍, jɛ à sèàɛ̍ mɔ̀ tìh chɛ̀ wlùh wɛ̀ mɔ̀ iě à tìh-a bu̍hᵻ wlù i̍ po̍. Nyɔ̍ ùh se̍-a blɔ̌ dɛ̍ᵻ nyɔ̍-ɔ jě-aɛ tìh, jɛ ùh-a blɔ̌-a dɛ̍ᵻ nyɔ̍-a jě-aɛ tìh-ɛ, mɔ̀ iě u̍h-a wlu̍ pɔ̀n we̍ sà-a bɛ̌ɛ.

¹³ Jɛ pò se̍na̍ nu̍ àɔ̀ de-ɛ, nɛ̀ Nyɔsoa tìh bo. Pò à dlǔ slɛ̌ i̍-ɛ, nɛ̀ mɔ̀-a tìh bo.

¹⁴ Klai-a àɔ̀ jbɛɛ bo ɛ̀ kɔn à wlu̍ i̍. Dɛ̍nu̍ɛ, à wɔ̌ɛn ɛ̍ kleǐn ka nyɔ̍ due mɛ̌-a dǒ nyɔ̍ kli̍hgbɛ̍ we̍-ɛ. Ɛ̍ tìh-ɛ, nyɔ̍ kli̍hgbɛ̍ mɛ̌-ɛ.

¹⁵ Ɔ̍ mɛ̌-ɛ dǒ nyɔ̍ kli̍hgbɛ̍ we̍, wɛ̀ ùh nɛ-a kmɔ̌-ɛ, u̍h-u je̍e kmɔ̌ nɛ dɛ dǒ u̍h-a chɛ̀ we̍, jɛ u̍h iě kmɔ̌ nɛ dǒ ɔ̀ mɛ̌-a iě ɔ̀ wlǔh-ae u̍h-a tìh-ɛ we̍.

¹⁶ Ɛ̍ tìh-ɛ, sɔ dě ti̍ à gbaɛ-a Klai wlùh-ɛ we̍-ɛ, à-a se̍a nyɔ̍ ja̍ gbɛ̀n ka kmɔ̌ we̍ nyɔ̍-a nu̍-aɛ. Ka kmɔ̌ we̍ nyɔ̍-a nu̍-a ɔ̍ ja̍ gbɛ̀n-ɛ, kǎ à nu̍ ke de.

¹⁷ Pò nyɔ̍-o-nyɔ̍ ke Klai nɛ due-ɛ, nɛ̀ nyɔ̍ laa̍ ɔ̍ nu̍ nyɔ̍ delee wɛ̀. Ɔ̍ kmɔ̌ soa sì-i, wɛ̀ delee naɛ ji̍.

¹⁸ Nyɔsoa bo ɔ̀ nu̍ ìh kli̍hgbɛ̍ la. Ɔ̍ nu̍ ɛ̍ iě ɔ̍ ke à gbe̍ɛ̍ɛn kɛ̍n i̍ dě Klai ja̍a̍. Ɔ̍ nyǐ àɔ̀ dbo̍ à iě nu̍ wɛ̀ ɔ̍ ke nyɔ̍ duuh iě kɛ̍n i̍ gbe̍ɛ̍ɛn ke.

¹⁹ À tu̍owli nu̍ ka Nyɔsoa nu̍-a iě ɔ̍ ke nyɔ̍ kli̍hgbɛ̍ gbe̍ɛ̍ɛn-a kɛ̍n i̍ dě Klai ja̍a̍-ɛ. Nyɔsoa tǎli u̍h-a gblɛ̍n sɔ̀ɛ̀n i̍. Wɛ̀ ɔ̍ nyǐ àɔ̀ tu̍owli ka ɔ̍ ke nyɔ̍ duuh nu̍-a kɛ̍n i̍ gbe̍ɛ̍ɛn.

²⁰ Ɛ̍ tìh-ɛ, à wlu Klai-a dɛ̍. Dě à ja̍a̍ bo Nyɔsoa-a ba̍le-e nyɔ̍. À gbɛ̍n mɔ̀-a bu̍hᵻ dǒ Klai-a tàà Nyɔsoa iě ɛ̍ nu̍ mɔ̀ ke ɔ̍ iě kɛ̍n i̍ gbe̍ɛ̍ɛn.

²¹ Klai se̍ gblɛ̍n sɔ̀ɛ̀n nu̍ nyɔ̍. Jɛ à tìh bo Nyɔsoa po̍ ka à gblɛ̍n sɔ̀ɛ̀n dǒ ɔ̍ dlǔ, wɛ̀ dě ɔ̍ ke à due nɛ-ɛ di̍i̍-ɛ, à iě i̍ slɛ̌-nyɔ̍ nu̍ dě Nyɔsoa jlǐh.