2 Kɔwlɛntiɔn 3 - Ku̍o̍ Delee 1999

Ku̍o̍ delee gbǎ dɛ̍kɛ̍n ɛ̍ sìì ku̍o̍ soa

¹ À tè la̍ à i̍ bɛ̌-ɛ gbɔ̀ dɛ ae? Àe̍e̍ à kɔn à iě chlǐh-dɛ̍ ɛ̀ mu̍-a à tìh we̍ i̍ sèàɛ̍-ɛ dě mɔ̀ we̍ ja ɛɛ, àe̍e̍ à kɔn à iě ɛ̍ dě mɔ̀ we̍ sà ae? À se̍ ɛ̍ we̍ chlǐh-dɛ̍ i̍ pɔ̀n ɛ̀ nyɔ̍ duuh-a nu̍-aɛ.

² Mɔ̀-a chɛ̀ bo ùh nu̍ à tìh we̍ i̍ sèàɛ̍ chlǐh-dɛ̍ à blě, ɛ̀ chlǐh-a dǒ à wlùh kɛ̍n nyɔ̍ kli̍hgbɛ̍ iě-a slè wɛ̀ u̍h iě-a juo-ɛ.

³ Ɛ̍ flɔn we̍i̍ ka mɔ̀ wɔ̀-a chlǐh-dɛ̍ ɛ̀ Klai chlǐh-a iě ɔ̍ po̍-a ɛ̍ à klě i̍-ɛ. Ɛ̍ se̍ chlǐh-dɛ̍ tu̍-a nǐ bo ɔ̍ se̍ ɛ̍ chlǐh-i. Ɔ̍ se̍ ɛ̍ chlǐh dǒ sɔɔ̌ᵻ paɔᵻ kɛ̍n, jɛ kmɔ̌ nɛ Nyɔsoa-a Sùù bo ɛ̀ nu̍ ɛ̍ iě Klai chlǐh ɛ̍ dǒ wlɔ̀ nyi̍ɔ̍-a wlùh kɛ̍n.

⁴ À bla̍ ìh la, dɛ̍nu̍ɛ, Klai nu̍ ɛ̍ iě à tè Nyɔsoa wlì.

⁵ Ɛ̍ se̍ nɛ̀ à blě gbǐh dǒ à chɛ̀ we̍ à iě dɛ̍-o-dɛ̍ nu̍. Gbǐh à blě-aɛ, i̍h sɔ dě Nyɔsoa we̍.

⁶ Ɔ̍ nyǐ àɔ̀ gbǐh dǒ ku̍o̍ delee-a pòi̍nynuu̍ nu̍-ɛ we̍. Ku̍o̍ delee la ɛ̍ se̍ telě ɛ̀ chlǐh-aɛ, jɛ ɛ̍ sɔ dě Nyɔsoa-a Sùù we̍. Telě ɛ̀ chlǐh-aɛ, ɛ̍ ja̍ mɛ̌ɛ, jɛ Sùù-a nyǐ nyɔ̍ feɛ.

⁷ Telě ɛ̀ chlǐh-aɛ, ɛ̍ chlǐh-ɛ dǒ sɔɔ̌ᵻ paɔᵻ pùn iě ɛ̍ ja mɛ̌ɛ. Ti̍ ɛ̍ po̍-eaɛ, dǒ Nyɔsoa-a tìh-a i̍ bɛ̌-ɛ ji̍-i. Wɛ̀ Mose-a jua̍a̍ fa̍n-ɛ dǒ tìh-a i̍ bɛ̌-ɛ la we̍. Ɔ̍ jua̍a̍-a fa̍n-a wɛ̀ jlǐh gbɛɛ-ɛ, jɛ Eslɔɛ nyɔ̍ se̍ ɛ̍ ja̍ gbɛ̀n-ɛ bɛ̌ɛ.

⁸ Jɛ ku̍o̍ ɛ̀ Nyɔsoa-a Sùù nyǐ-a àɔ̀-ɛ, ɛ̍ tìh-a i̍ bɛ̌-ɛ ku̍ wɔ̍n ɛ̍ sìì telě.

⁹ Pò dɛ̍ ɛ̀ ja-a nyɔ̍ kàn gbɛ̍n-ɛ we̍-ɛ, ɛ̍ blě tìh-a i̍ bɛ̌-ɛɛ, nɛ̀ dɛ̍ ɛ̀ slɛ̌-a i̍-ɛ, ɛ̍ tìh-a i̍ bɛ̌-ɛa mu̍ ɛ̍ sìì kaa̍.

¹⁰ Kaka la̍, dɛ̍ ɛ̀ blě-a tìh-a i̍ bɛ̌-ɛ de-ɛ, ɛ̍ se̍ tìh-a i̍ bɛ̌-ɛ blě dɛ. Dɛ̍nu̍ɛ, ku̍o̍ delee-a tìh-a i̍ bɛ̌-ɛ ku̍ wɔ̍n ɛ̍ sìì ɛ̍.

¹¹ Pò dɛ̍ ɛ̀ se̍-a i̍ wlè-ɛ blě-ɛ, ɛ̍ blě tìh-a i̍ bɛ̌-ɛɛ, nɛ̀ ku̍o̍ delee ɛ̀ se̍-a jlǐh wɛ̀ mu̍-ɛ, ɛ̍ tìh-a i̍ bɛ̌-ɛ mu̍ i̍ bɛ̌ kaa̍ ɛ̍ iě ɛ̍ sìì.

¹² Ka à blě-a wlì tè dɛ̍ la-ɛ, à wlu-i gbài̍gbài̍.

¹³ À ke Mose se̍ wɔ̀ɛ-ɛ, ɔ̀ bǎɛ-a jliɛ̍ jua̍i̍ wɛ̀ Eslɔɛ nyɔ̍ je̍e-a ɔ̍ fa̍n-a jua̍a̍-a jlǐh wɛ̀ la̍ jě-ɛ.

¹⁴ Jɛ u̍h-a wlùh-u wɔ̌n dɛ̍-ɛ i̍. Sèàn-a chɛ̀ jliɛ̍-a taǐn laa̍ ɛ̍ ka̍n-ɛ u̍h-a wlùh kɛ̍n ke̍ pò u̍h ja Mose-a telě chlǐh-dɛ̍ᵻ slè-ɛ. Dɛ̍nu̍ɛ, Klai nɛ due bo ɔ̀ sà ɛ̍ dǒ nyɔ̍ jua̍i̍.

¹⁵ Sèàn-a chɛ̀ pò u̍h slè Mose-a telě-ɛ, jliɛ̍ ka̍n-ɛ u̍h-a wlùh kɛ̍n ke̍.

¹⁶ Jɛ pò nyɔ̍ bǐi-e Joi we̍ i̍-ɛ, nɛ̀ jliɛ̍-a sɔ dǒ ɔ̍ wlùh kɛ̍n.

¹⁷ Joi bo ɔ̀ nu̍ Nyɔsoa-a Sùù. Joi-a Sùù bo ɛ̀ flɔn-ɛ nyɔ̍ kɛ̍n i̍.

¹⁸ Nɛ̀ɛ̍, à kli̍hgbɛ̍ à jě Joi-a tìh-a i̍ bɛ̌-ɛ dǒ à jua̍i̍ᵻ ìh se̍-a dɛ̍ kɛ̍n kaɛn-ɛ we̍. Joi-a Sùù bo ɛ̀ bǐi àɔ̀ i̍ dě ɔ̍ tu̍ di̍i̍ ma̍u̍, iě à wɔ̀ ɔ̍ tìh-a i̍ bɛ̌-ɛ ti̍ kli̍hgbɛ̍ we̍.