2 Kɔwlɛntiɔn 2 - Ku̍o̍ Delee 1999

¹ Ɛ̍ tìh-ɛ, ǐn po̍ tìh gbɔ̀ nɛ̌ je̍e mɔ̀ we̍ ji̍ dɛ wɛ̀ mɔ̀-a wlùh je̍e dě de̍ i̍ gbǎ.

² Dɛ̍nu̍ɛ, pò ǐn po̍ mɔ̀-a wlùh seɔn de-ɛ, nɛ̀ nyɔ̍we̍ bo ɔ̀ mu̍ ǐn mɔna̍-a po̍ ɛ? Mɔ̀ɔ̍ due kɔn wlùh ǐn po̍-a seɔn-ɛ mɔ̀ɔ̍ bo ùh kɔn ùh iě ǐn mɔna̍-a po̍.

³ Ɛ̍ kɔn ǐn chlǐh mɔ̀ chlǐh-dɛ̍ laa̍ we̍. Ǐn se̍ pɔ̀n iě-e mɔ̀ we̍ ji̍-ɛ, wɛ̀ mɔ̀ɔ̍ kɔn taǐn ùh kɔn ùh iě-a ǐn mɔna̍-a po̍-ɛ, wɛ̀ mɔ̀ iě ǎn wlùh seɔn po̍. Ǐn juo ɛ̍ kleǐn pò ǐn gbǎ mɔna̍-ɛ, nɛ̀ mɔ̀ kli̍hgbɛ̍ mɔ̀ gbǎ mɔna̍-a ke.

⁴ Ǐn chlǐh mɔ̀ we̍ dě jua̍i̍ sàɛ̀ ke, wlùh-a dě de̍ i̍ gbǎ-a ke fìn-ɛ dɔu di̍i̍. Ɛ̍ se̍ iě mɔ̀-a wlùh dě de̍ i̍ po̍ kai, jɛ iě ɛ̍ to-ɛ ka ǐn nu̍-a mɔ̀ kli̍hgbɛ̍-ɛ jbɛɛ kaa̍-ɛ.

Tǎli dɛ̍ sɔ̀n nyɔ̍ nu̍-a ìn pùn-ɛ ɛ̍ tìh i̍

⁵ Jɛ pò nyɔ̍-o-nyɔ̍ po̍ mɔ̀-a nyɔ̍-a wlùh dě de̍ i̍-ɛ, nɛ̀ ɛ̍ se̍ mɔ̍ ɔ̍ se̍ ɛ̍ pùn nu̍. Jɛ nɛ̀ mɔ̀-a nyɔ̍ duuh bo ɔ̍ nu̍ ɛ̍ pùn. Ǎn bla̍ ɛ̀ la, dɛ̍nu̍ɛ, ǐn se̍ pɔ̀n iě ɔ̍ wɔ̍i̍n gbɛ̍n kaa̍.

⁶ Nyɔ̍ kaɛn la, kàn mɔ̀-a nyɔ̍ dɔu gbɛ̍n-a ɔ̍-ɛ, ɛ̍ tìè i̍.

⁷ Ɛ̍ tìh-ɛ, mɔ̀ bǐi i̍ mɔ̀ iě ɔ̍ gblɛ̍n sɔ̀ɛ̀n-a tìh i̍ tǎli mɔ̀ iě ɔ̍ we̍ gbǎ. Wɛ̀ ɛ̍ iě ɛ̍ nu̍ ɔ̍-ɔ je̍e seɔn gbǎ kaa̍ wɛ̀ ɔ̍-ɔ je̍e i̍ kà chɛ̀ɛ̌chɛ̀.

⁸ Ɛ̍ tìh-ɛ, ǎn ba̍le mɔ̀-ɛ, mɔ̀ iě ɛ̍ to dě ɔ̍ we̍ ka mɔ̀ jbɛɛ-a ɔ̍-ɔ ɛ̍.

⁹ Ǐn chlǐh chlǐh-dɛ̍ laa̍ iě mɔ̀ɔ̍ tɛ̀n pò mɔ̀ ja ǎn wlu̍ nu̍ mu̍ dǒ dɛ̍ᵻ kli̍hgbɛ̍ we̍-ɛ.

¹⁰ Nyɔ̍-o-nyɔ̍ kɔn dɛ̍ sɔ̀n-a tìh mɔ̀ tǎli-a i̍-ɛ, nɛ̀ ǐn tǎli ɔ̍ dɛ̍ sɔ̀n-a tìh i̍ ke. Pò ǐn kɔn iě nyɔ̍-a dɛ̍-o-dɛ̍-a tìh i̍ tǎli-ɛ, nɛ̀ ǐn nu̍ ɛ̍ mɔ̀-a tìh. Klai bo ɔ̀ nu̍ ǎn sàànsi̍i̍h.

¹¹ Ǎn nu̍ ɛ̍ wɛ̀ Setɔn je̍e à gblàa̍ i̍ poe. À juo dɛ̍ᵻ ɛ̍ pɔ̀n-a nu̍-ɛ i̍-ɛ.

Pɔɔ mu̍ Tloa

¹² Ti̍ ǐn ji̍-a dǒ Tloa wlɔ̀ di̍i̍ iě-a pɔ̀n chɛ̀ ɛ̀ kɔ̍-a dǒ Klai pùn i̍-ɛ bla̍-ɛ, Joi pɔ̀ni ǎn wìè iě-e ɔ̍ dbo̍ nui.

¹³ Jɛ ǎn wlùh se̍ i̍ tè. Dɛ̍nu̍ɛ, ǐn se̍ à de̍di̍i̍ Taitɔ jě deě. Ɛ̍ tìh ǐn po̍ ùh nɛ-a doǒ-ɛ klàe̍ wɛ̀ ǐn mu̍ dě Mɛsedonia bloa̍ kɛ̍n.

Klai ke à nu̍ dɛ̍ klà sà nyɔ̍

¹⁴ Jɛ à po̍ Nyɔsoa tlɔ̌, ɔ̍ nu̍ ɛ̍ dě à ke Klai-a due nɛ-ɛ di̍i̍-ɛ, iě à ke Klai ke à nu̍ dɛ̍ klà sà nyɔ̍. Nyɔsoa jii àɔ̀ wɛ̀ à bla̍ pɔ̀n chɛ̀ ɛ̀ kɔ̍-a dǒ Klai pùn i̍-ɛ, iě ɛ̍ sɛ̍ i̍ tà kli̍hgbɛ̍ ka nɔ̌-dɛ̍ chɛ̀-ɛ.

¹⁵ Àɔ̀ bo à wɔ̀ nɔ̌-dɛ̍ chɛ̀ ɛ̀ Klai sà-ɛa slaǎ dě Nyɔsoa we̍ dǒ nyɔ̍ ùh-a pǔh-aɛ ke juh ùh-u pǔh-aɛ nynɛ̌ we̍.

¹⁶ Nyɔ̍ ùh-u pǔh-aɛ, nɔ̌ sɔ̀nᵻ bo ɛ̀ dbǎ u̍h. Jɛ nyɔ̍ ùh-a pǔh-aɛ, nɔ̌ chɛ̀ bo ɛ̀ nyǐ u̍h feɛ. Nyɔ̍we̍ bo ɔ̀ bɛ̌ɛ ìh la nu̍ ɛ?

¹⁷ À ke nyɔ̍ dɔu ùh-a ple̍-a Nyɔsoa-a wlu̍-ɛ se̍ wɔ̀ɛ. Dɛ̍nu̍ɛ, Nyɔsoa bo ɔ̀ dbo̍ àɔ̀. Tìh gbɛ̍n àɔ̀ i̍ dǒ wlu la̍ dǒ Nyɔsoa jǔ ka Klai-a pòi̍nynuu̍-ɛ.