2 Kɔwlɛntiɔn 11 - Ku̍o̍ Delee 1999

Pɔɔ wlu-i Klai-a gba̍tòà-a si̍h naɛ we̍

¹ Ɛ̍ mu̍ ǐn gbǐh po̍ pò mɔ̀ wɔ̌n iě bo-ɛ dɛ̍wɛ nu̍-ɛ. Ǎn ba̍le mɔ̀-ɛ, mɔ̀ wɔ̌n.

² Ǎn nu̍ mɔ̀-a wlɛ̀n ka Nyɔsoa-a nu̍-aɛ. Mɔ̀ wɔ̀ nynɔ̌gbaɔ ɔ̀ se̍-a dɛ̍ i̍ juo-ɛ. Ɔ̍ kɔn wlu̍ bo ǐn po̍ tɔ̀ma̍a̍ ɔ̍ iě jɔ̍gbau due gbài̍ blǐ tǐn, ɔ̀ nu̍-a Klai-ɛ.

³ Jɛ ǎn ple̍ faɔn ka sɛ̍ nu̍-a Ii i̍ boe-ɛ dǒ ɛ̍ di̍i̍ i̍ flɔn-ɛ we̍-ɛ, mɔ̀-a wlùh-u je̍e la̍a̍n fèàɛ̀ nu̍, wɛ̀ mɔ̀ɔ̍ je̍e Klai we̍ fòè-ɛ chɛ̀ɛ̌chɛ̀ i̍ tǎli.

⁴ Ɛ̀ kɔn ǎn bla̍-a ɛ̀ la-ɛ, ɛ̍ nu̍ nyɔ̍ ji̍ dě mɔ̀ we̍ wɛ̀ ɔ̀ bla̍ Jusu dɔɔ kɔn tìh à se̍-a bla̍-ɛ, iě ɛ̍ po̍ mɔ̀ gbǐh. Wɛ̀ Nyɔsoa-a Sùù ke pɔ̀n chɛ̀ ìh nɛ-ao dɔɔ̌ ìh kɔn tìh mɔ̀ se̍a wɔ̌n dě à we̍-ɛ, iě mɔ̀ gbɛ̍n i̍h i̍.

⁵ Ǐn juo ɛ̍ ǐn se̍ gba̍tòà-a konynǐ naɛ dǒ nyɔ̍ la mɔ̀-a dǎɛ gba̍tòà-a klaaᵻɛ́ kɛ̍n.

⁶ Pò ǐn se̍ wlu-ɛ juo-a chɛ̀-ɛ, jɛ ǐn se̍ la̍a̍n nɛ dǒ tɔɔ blě-ɛ we̍. À flɔn-ɛ ɛ̀ la we̍i̍ te̍gbe̍i̍n dě mɔ̀ we̍ tà kli̍hgbɛ̍.

⁷ Ǐn se̍ mɔ̀ dɛ̍ tba̍ ti̍ ǐn bla̍-a Nyɔsoa-a pɔ̀n chɛ̀ dě mɔ̀ we̍-ɛ. Ǐn ja ǎn chɛ̀ wlù, ɛ̍ iě ɛ̍ nu̍ mɔ̀ iě ja̍i̍ dǔ-iɛ.

⁸ Ti̍ ǎn nu̍-a dbo̍ dě mɔ̀ we̍-ɛ, chɔchi̍h nyɔ̍ duuh bo ùh pɛ̌ɛ m. Nɛ̀ ka nyɔ̍ la̍ ǎn jlǐ u̍h-ɛ, kǎ ɛ̍ nɛ dǒ ǎn mɔ̀ we̍ gbǎ la̍.

⁹ Ti̍ ǐn nɛ-a dě mɔ̀ we̍ ǎn pɔ̀n-a wlǐ-ɛ, ǐn se̍ mɔ̀ wɔ̍ɔ̍n i̍ bɛ̌ɛ ǎn we̍ gbǎ tìh. À de̍di̍i̍ᵻ ùh sɔ-a nɔ̌ Mɛsedonia bloa̍ kɛ̍n-ɛ, u̍h ja ǐn dɛ̍ᵻ kli̍hgbɛ̍ ǐn nɛ-a blě ka̍-ɛ. Ka à nu̍-a sàǐtòò-ɛ, kǎ à mu̍ nu̍ dě nya̍. Ǐn se̍ mɔ̀ dɛ̍ i̍ pɔ̀n-ɛ mu̍.

¹⁰ Ka Klai-a tìh-a taǐn nɛ-a dě ǐn ja̍a̍-ɛ, nɛ̀ ǎn wɔ̍i̍n po̍-ɛ la nyɔ̍ se̍ ɛ̍ bɔ̌ i̍ po̍ mu̍ nɔ̌ Akaia bloa̍ kɛ̍n.

¹¹ Dɛ̍nu̍ ǎn bla̍ ɛ̀ la ɛ? Ǐn se̍ mɔ̀ɔ̍ jbɛɛ dɛ bo ae? Nyɔsoa juo ɛ̍, ka ǐn jbɛɛ-a mɔ̀ɔ̍-ɛ.

¹² Dɛ̍ ǎn nu̍-aɛ bo ǎn mu̍ dluwe̍ i̍ gba̍ iě nu̍. Ǎn pɔ̀n nyɔ̍ la u̍h-u je̍e bu̍h-a tba̍ la̍ jě, wɛ̀ u̍h-u je̍e ka nu̍ u̍h-a nu̍ dbo̍ ka à nu̍-a dbo̍ nu̍-ɛ.

¹³ Nyɔ̍ kaɛn la Klai-a gba̍tòà-a si̍h naɛ bo. U̍h-a tmɔ̌ si̍h dǒ u̍h-a dbo̍ u̍h-a nu̍-aɛ we̍. U̍h-a nu̍ u̍h-a chɛ̀ Klai-a gba̍tòà we̍i̍.

¹⁴ Ɛ̍ se̍ nyɔ̍ i̍ kèle dɛ̍, Setɔn-a chɛ̀ ɛ̍ nu̍ ɛ̍ chɛ̀ ka Nyɔsoa-a ǐnchɔ̀ ɛ̀ blě-a sɔ̀npli-ɛ we̍i̍ ke.

¹⁵ Ɛ̍ tìh-ɛ, ɛ̍ se̍ nyɔ̍ i̍ kèle dɛ̍ pò ɛ̍ pòi̍nynuu̍ nu̍ u̍h-a chɛ̀ Nyɔsoa ɔ̀ slɛ̌-a i̍-ɛ ɔ̍ pòi̍nynuu̍ we̍i̍-ɛ. Dě ɛ̍ dlǔ i̍ chlà la̍-ɛ, u̍h-a mu̍ kàn gbɛ̍n-ɛ dǒ u̍h-a nu̍-dɛ̍ᵻ u̍h nu̍-aɛ we̍.

Pɔɔ po̍ wɔ̍i̍n dǒ ɔ̍ jua̍i̍ sàɛ̀ we̍

¹⁶ Na̍a̍ dɛ-ɛ, nyɔ̍ bɔ̌ ǐn bo-nyɔ̍ dǎɛ. Jɛ pò mɔ̀ dǎɛ ǐn bo-nyɔ̍-ɛ, nɛ̀ mɔ̀ gbɛ̍n ǐn i̍ ka bo-nyɔ̍-ɛ, wɛ̀ ɛ̍ iě ɛ̍ nu̍ iě wɔ̍i̍n po̍ ke dɛ̍wɛ.

¹⁷ Dɛ̍ ǎn sà-a kaka-ɛ, ɛ̍ se̍ dɛ̍ Joi-a pɔ̀n-a iě-a sà-ɛ. Wɔ̍i̍n ǎn po̍-a ka-ɛ, ǎn wlu-i ka bo-nyɔ̍-ɛ.

¹⁸ Ka nyɔ̍ dɔu-a po̍-a wɔ̍i̍n dǒ dɛ̍ᵻ u̍h nu̍-aɛ we̍-ɛ, nɛ̀ ǎn mu̍ wɔ̍i̍n po̍ ke.

¹⁹ Mɔ̀-a chɛ̀ la̍ mɔ̀ flɔn di̍i̍ i̍ kǎ mɔ̀ dǎ. Ɛ̍ kɔn mɔ̀-a wɔ̌ɛn bo-nyɔ̍-a tìh i̍.

²⁰ Mɔ̀-a wɔ̌ɛn iě nyɔ̍-a nu̍ mɔ̀ dɛ̍ᵻ jii̍ ka kèi̍ᵻɛ́ àe̍e̍ u̍h-a tè mɔ̀ wɔ̍n dlǔ àe̍e̍ u̍h-a gbɛ̍n mɔ̀ àe̍e̍ u̍h-a bɛ̌-ɛ u̍h-a chɛ̀ i̍, iě u̍h-a tba̍ mɔ̀ gbǎ jua̍i̍.

²¹ Ka à se̍-a ìh la nu̍-ɛ i̍ pɔ̀n-ɛ, nɛ̀ ǐn kɔn iě tɛ̀n ple̍ ae? Jɛ dɛ̍ nyɔ̍-o-nyɔ̍ ku̍-a wlùh ɔ̍ iě-a wɔ̍i̍n po̍ dǒ ɛ̍ we̍-ɛ, nɛ̀ ǎn mu̍ wlùh ku̍ ke iě ɛ̍ wɔ̍i̍n po̍. Ǎn wlu-i ka bo-nyɔ̍-ɛ.

²² U̍h-u Iblu nyɔ̍ ae? Mɔ̍ Iblu jǔ ke. U̍h-u Eslɔɛ nyɔ̍ ae? Mɔ̍ Eslɔɛ jǔ ke. U̍h-u Eblaɛɛn-a tloemlai ae? Mɔ̍ Eblaɛɛn-a tloemlai ke.

²³ Ǎn mu̍ la̍ wlu ka se̍na̍-a nu̍ nyɔ̍-ɛ. U̍h-u Klai-a pòi̍nynuu̍ ae? Ǐn nu̍ pòi̍ju chɛ̀ dǒ u̍h kɛ̍n. Ǐn nu̍ dbo̍ wɛ̀ kaa̍ dǒ u̍h kɛ̍n, iě ǐn poe-ɛ kasoo wɛ̀ dɛ̍ dɔu. Ǐn bla̍-ɛ wɛ̀ dɛ̍ dɔu, iě ǐn na-ɛ mɛ̌ɛ wɔ̍i̍n wɛ̀ dɛ̍ dɔu.

²⁴ Gbɔ̍ᵻ m̀m̌ bo Juu nyɔ̍-a nyɔ̍ klaaᵻ bla̍-ɛ ǐn bli-ku̍-a kwela ta̍a̍n jɔ̌ mɛ̀nyìɛ̍ (39) wɛ̀.

²⁵ Gbɔ̍ᵻ ta̍a̍n bo Wloma nyɔ̍-a kɔ̀mla̍ bla̍ m wɛ̀. Nyɔ̍ tbaɛ ǐn sɔɔ̌ᵻ i̍ u̍h nu̍ due. Ǐn nu̍ nɛ dě blǎgbè klaa di̍i̍ nɛ̀ ɛ̍ wlǎ ɛ̍ gbɔ̍ᵻ ta̍a̍n wɛ̀, iě ǐn pèle tu̍ fɔ̌ we̍ wɛ̀ ǐn nu̍ weɛ̍ gbàǐ dě nǐ kɛ̍n.

²⁶ Dě ǎn wìèlè mu̍-ɛ dɔu di̍i̍-ɛ, ǐn na-ɛ mɛ̌ɛ wɔ̍i̍n dǒ jǐ-nǐ ke, jlǐ-nyɔ̍ ke, ǎn chɛ̀-a nyɔ̍ ke, ùh se̍-a Juu nyɔ̍-ɛ ke, tùgbàwlɔ̀ᵻ di̍i̍ i̍ ke, dě kwlǎslò we̍ ke, dě jbǒ kɛ̍n ke dǒ à de̍di̍i̍ᵻá si̍h naɛ we̍.

²⁷ Ǐn nu̍ dbo̍ iě ǐn sàɛ̀ jua̍i̍ dɛ̍ dɔu. Ǐn se̍ mɔ̌-ɔ nyinɔ̍ kɔn dǒ wlù wǐh dɔu di̍i̍. Mɔ̌ ke nǐ na̍ tɔ̌n-a nu̍ m. Ǐn se̍ di̍-dɛ̍ ke pɛ̌na̍ ke pa̍-dɛ̍ blě sɔ̀ngbɛ̀jɛ̀.

²⁸ Jɛ ǐn se̍ jih sie-a dode̍-ɛ nynɛ̌ sǐ mu̍. Chììn-a nɛ̌ ǐn kɛɛn ti̍ kli̍hgbɛ̍ we̍ dǒ chɔchi̍h nyɔ̍ kli̍hgbɛ̍-a sèò ɛ̀ nu̍-a m-ɛ we̍.

²⁹ Pò nyɔ̍-o-nyɔ̍-a gbǐh ja sɔɔn nu̍-ɛ, nɛ̀ ǎn gbǐh-a nu̍ sɔɔn ke. Pò nyɔ̍-o-nyɔ̍ gbǎ dě gblɛ̍n sɔ̀ɛ̀n di̍i̍-ɛ, nɛ̀ ǎn wlùh gbǎ dě de̍ i̍.

³⁰ Ka ǐn kɔn iě-a wɔ̍i̍n po̍-ɛ, nɛ̀ ǎn mu̍ wɔ̍i̍n po̍ dǒ dɛ̍ᵻ ìh-a to-a ǎn gbǐh-a sɔɔn nu̍-ɛ we̍.

³¹ Nyɔsoa ɔ̀ nu̍-a Joi Jusu Baa-ɛ, ɔ̍ juo ka ǐn se̍-a si̍h tmɔ̌-ɛ. Tlɔ̌ po̍-ɛ kɔn dǒ ɔ̍ we̍ nɔ̌ kmɔ̌-a kmɔ̌.

³² Ti̍ ǐn nɛ-a dǒ Damaɛkɔ wlɔ̀ di̍i̍-ɛ, kɔ̀mla̍ ɔ̀ nɛ-a dǒ Blǔh Baa Awlita sɔ̀n-ɛ, ɔ̍ po̍ nyɔ̍ dǒ tùgbàwlɔ̀-a saǎn wɔ̍n we̍ u̍h iě ǐn gbɛ̍n.

³³ Jɛ ǐn ba̍ᵻ jaɛ ǐn dǒ saǎn-a fɛ̍nwɔn we̍ dě tìa̍a̍n di̍i̍ iě u̍h tlìh-i m, wɛ̀ ǐn ple̍-e ɔ̍ kwa̍.