2 Kɔwlɛntiɔn 10 - Ku̍o̍ Delee 1999

Klai bo ɔ̀ nyǐ Pɔɔ dbo̍ la

¹ Mɔ̍ Pɔɔ, ǎn ba̍le mɔ̀-ɛ dǒ ka Klai nu̍-a ɔ̍ chɛ̀ wlù ja-a iě ɔ̍ gbɛ̍n-a gba̍n-ɛ we̍. Nyɔ̍gbei la̍ pò ǐn nɛ nɔ̌ mɔ̀ we̍-ɛ nɛ̀ ǎn ja ǎn chɛ̀ wlù, jɛ pò ǐn se̍-e mɔ̀ we̍ nɛ-ɛ nɛ̀ ǎn kma wɔ̍n.

² Ǎn ba̍le mɔ̀-ɛ, mɔ̀ɔ̍ je̍e ɛ̍ nu̍ pò ǐn ji̍-e mɔ̀ we̍-ɛ wɛ̀ nɛ̌ je̍e wɔ̍n kma. Ǐn juo ɛ̍ ǎn mu̍ wɔ̍n kma wɛ̀ iě wlì i̍ bɛ̌ dǒ nyɔ̍ ùh la̍ à nu̍-a dɛ̍ᵻ ka kmɔ̌ we̍ nyɔ̍-ɛ we̍.

³ À tǐn nɔ̌ kmɔ̌ we̍ gbɛɛ, jɛ ɛ̍ se̍ kmɔ̌ we̍ wlùh à se̍ fɔ̀n-ɛ.

⁴ À fɔ̀n-dɛ̍ᵻ à fɔ̀n-aɛ, i̍h se̍ kmɔ̌ we̍ nyɔ̍-a fɔ̀n-dɛ̍ᵻ, jɛ à blě Nyɔsoa-a kmu-gbǐh dǒ nyɛ̌-nyɔ̍-a kmu-ɛ kli̍hgbɛ̍-ɛ gbɔ̀lɔ-ɛ we̍.

⁵ À nu̍ ɛ̍ iě si̍h tòlo-ɛ ke kmu-u dɛ̍ᵻ kli̍hgbɛ̍ blɔ̌ nyɔ̍ blě-a ìh-a nu̍-a ɛ̍ wɛ̀ nyɔ̍-ɔ juo-a Nyɔsoa-a, wɛ̀ i̍h wɛ̀ i̍. À nu̍ ɛ̍ iě nyi̍ɔ̍-a wlùh i̍ naɛ kli̍hgbɛ̍ iě Klai-a wlùh nu̍.

⁶ À jě ti̍ wɛ̀ à iě nyɔ̍ wɔ̍n blaɛ nyɔ̍ kli̍hgbɛ̍ kàn gbɛ̍n, pò mɔ̀-a à wlù nu̍-ɛ gbǎ gba̍a̍-ɛ.

⁷ Mɔ̀-a gbɛ̀n dǒ dɛ̍ᵻá kɛ̍n ka. Nyɔ̍ nɛ dě mɔ̀ nynɛ̌ ɔ̍ juo-o dɛ̍ i̍ chɛ̀ɛ̌chɛ̀ ka ɔ̍ nu̍-a Klai-a pòi̍ju-ɛ ae? Nɛ̀ɛ̍, ɔ̍ naɛ wlùh i̍ dɛ dǒ ɔ̍ chɛ̀ we̍. Dɛ̍nu̍ɛ, àɔ̀ Klai-a pòi̍nynuu̍ ka ɔ̍ nu̍-a Klai-a pòi̍ju nu̍-ɛ ke-ɛ.

⁸ Jɛ pò ǎn wɔ̍i̍n po̍-ɛ sì-o i̍ wɛ-ɛ dǒ tùn Joi nyǐ-a àɔ̀ à iě-a mɔ̀ gbǐh ku̍u̍ po̍-eɛ we̍-ɛ, ìh se̍-a mɔ̀ɔ̍ gbɔ̀lɔ dɛ-ɛ, ǐn se̍ ɛ̍ tɛ̀n ple̍ mu̍.

⁹ Ǐn se̍ pɔ̀n mɔ̀ iě ka nu̍ ǎn po̍ mɔ̀ faɔn dǒ ǎn chlǐh-dɛ̍ᵻ we̍.

¹⁰ Nyɔ̍gbei la̍a̍, “Pɔɔ-a chlǐh-dɛ̍ᵻá kma i̍ iě ɔ̍ pɔ̀n-ɛ nyɔ̍ dɛ̍-ɛ i̍ dě i̍h di̍i̍. Jɛ pò ɔ̍ chɛ̀-a gbǎ nɛ nɔ̌ à we̍-ɛ, nɛ̀ ɔ̍ se̍ i̍ kma, nɛ̀ ɔ̍ se̍ wlu-ɛ juo.”

¹¹ Nyɔ̍ kaɛn la u̍h kɔn u̍h iě ɛ̍ we̍ i̍ ju̍o̍e ka dɛ̍ à bla̍-a dě chlǐh-dɛ̍ᵻ di̍i̍ pò à se̍-e mɔ̀ we̍ nɛ-ɛ, à nɛ̀ dě mɔ̀ we̍-ɛ, ɛ̍ due bo à nu̍.

¹² Nyɔ̍ ùh-a bɛ̌-ɛa u̍h-a chɛ̀ i̍-ɛ, à se̍ u̍h à chɛ̀ we̍ po̍ mu̍, àe̍e̍ à se̍ à chɛ̀ u̍h i̍ blaɛ mu̍. Jɛ pò u̍h ja u̍h-a chɛ̀ dɛ̍ dbee dǒ u̍h-a chɛ̀ we̍, u̍h ja u̍h-a chɛ̀ u̍h-a chɛ̀ i̍ blaɛ-ɛ, nɛ̀ u̍h bo we̍i̍.

¹³ Jɛ à se̍ wɔ̍i̍n po̍ mu̍ à iě tà à kɔn à iě-a siee-ɛ sì. Ɛ̍ se̍ dbo̍ Nyɔsoa nyǐ-a àɔ̀ à iě-a nu̍-ɛ sìì mu̍. Dě mɔ̀ nynɛ̌ bo à nui dbo̍ la.

¹⁴ À se̍ wɔ̍i̍n po̍ à iě tà à kɔn à iě-a siee-ɛ sì, dɛ̍nu̍ɛ, à sɔ dě mɔ̀ we̍ wɛ̀. Àɔ̀ bo à nu̍ sàǐtòò nyɔ̍ à ja pɔ̀n chɛ̀ ɛ̀ kɔ̍-a dǒ Klai pùn i̍-ɛ dě mɔ̀ we̍.

¹⁵ À-a po̍ wɔ̍i̍n dǒ nyɔ̍ duuh-a dbo̍ u̍h nu̍-a ɛ̀ Nyɔsoa se̍-a à nyǐ-ɛ we̍. Jɛ à tè ɛ̍ wlì ka mɔ̀-a wlùh gbaɛ-a ku̍-aɛ, kǎ à dbo̍ à nu̍-a dě mɔ̀ nynɛ̌-ɛ ɛ̍ mu̍ i̍ bɛ̌-ɛ nu̍ kaa̍.

¹⁶ Pò ɛ̍ nɛ-aɛ, wɛ̀ à iě pɔ̀n chɛ̀ bla̍ dě bloa̍ nɛ-a mɔ̀ de̍ i̍-ɛ di̍i̍ i̍. Wɛ̀ à-a je̍e nyɔ̍ dɔɔ-a dbo̍ Nyɔsoa nyǐ-a ɔ̍-ɛ ɛ̍ tìh-a wɔ̍i̍n po̍.

¹⁷ Jɛ Nyɔsoa-a wlu̍ la̍a̍, “Nyɔ̍-o-nyɔ̍ ja bu̍hᵻ wlù i̍ po̍-ɛ, Joi Nyɔsoa-a nu̍-dɛ̍-a bu̍hᵻ bo ɔ̍ iě wlù i̍ po̍.”

¹⁸ Nyɔ̍ ɔ̀ bɛ̌-ɛa ɔ̍ chɛ̀ i̍-ɛ ɛ̍ se̍ ɔ̍ tìh Nyɔsoa se̍-e wɔ̌ɛn, jɛ nyɔ̍ Joi bɛ̌-ɛa i̍-ɛ ɔ̍ kɔn tìh ɔ̍ wɔ̌ɛn.