1 Timote 6 - Ku̍o̍ Delee 1999

¹ Mɔ̀ɔ̍ kli̍hgbɛ̍ nu̍-a kèi̍ᵻɛ́, ɛ̍ blaɛ i̍ mɔ̀ iě mɔ̀-a dlǔtuᵻ dɛ̍ɛ̍ jě tà kli̍hgbɛ̍. Wɛ̀ nyɔ̍-ɔ je̍e Nyɔsoa ke à nyɔ̍ nǎ po̍-ɛ wlu̍ sɔ̀nᵻ pùn i̍ po̍.

² Kèi̍ jɔ kɔn dlǔtu nu̍-a Nyɔsoa wlùh gbaɛ nyɔ̍-ɛ, nɛ̀ ɛ̍ bɔ̌ ɛ̍ nu̍-ɛ wɛ̀ ɔ̍ bɔ̌ ɔ̍ wɔ̍n blaɛ-ɛ, ɔ̍ ɔ̍ de̍di̍i̍ nu̍ tìh. Jɛ nɛ̀ dǒ ɔ̍ iě ɔ̍ jǔ dbee nmɔ jii̍. Dɛ̍nu̍ɛ, nyɔ̍ ùh-a jě-a u̍h-a dbo̍ nu̍-ɛ dɛ̍ we̍-ɛ, u̍h gbaɛ Nyɔsoa wlùh iě ɔ̍ kma u̍h-a tìh. Poe u̍h ìh la nǎ wɛ̀ ìè u̍h wɔ̍i̍n gbɛ̍n-ɛ dǒ i̍h we̍.

Na-ɛ kɛ̍ dǒ nǎ po̍ nyɔ̍-a si̍h naɛ we̍

³ Nyɔ̍ jɔ ɔ̀ kɔn nǎ po̍-ɛa mu̍-a dǒ dɔɔ̌ nɛ, wɛ̀ ɛ̍ ke à Joi Jusu Klai-a wlu̍ chɛ̀ ke, à nàɛ̀ Nyɔsoa dɛ-a nǎ po̍-ɛ se̍-a wìè due gba̍ mu̍-ɛ,

⁴ nɛ̀ blɔ̌-ɛ bo ɛ̀ jǐ dě ɔ̍ di̍i̍. Jɛ nɛ̀ ɔ̍ se̍ dɛ̍wɛ-a chɛ̀ juo. Nɛ̀ se̍na̍-a nu̍ flɔ̍nwlùh bo ɔ̍ blě, ɔ̍ iě tòlo-ɛ ke wlu̍ tìh-a wɔ̍ɔ̍n i̍ sà dɛ nu̍. Ɛ̍ blě wlɛ̀n nu̍-ɛ ke, dlǔ gbǎnᵻ i̍ bla̍-a. Iě ɛ̍ blě nyɔ̍-a wlu̍ wɔ̍i̍n nyni-ɛ ke nyɔ̍ kǐh bu̍h i̍ jě-ɛ.

⁵ Nyɔ̍ duuh nɛ-o u̍h-a wlu-ɛ i̍ pɔ̀n-ɛ se̍ siee la̍ kɔn, iě u̍h-a nu̍ sàwlùh-ɛ. U̍h nɔ̀ɔ̍, tìh-a taǐn se̍ dě u̍h ja̍a̍ nɛ. Sɔ u̍h jajeɛ̍ Nyɔsoa wɛɛ sà-a bo ɛ̀ pàn-ɛ nyɔ̍ de.

⁶ I̍i̍n, nyɔ̍-a pàn-ɛ kàka̍ dě Nyɔsoa wɛɛ sà dɛ̍ di̍i̍, dɛ̍ àn jě-a pò àn pɔluh pɛ̌n i̍ dǒ ɛ̍ we̍-ɛ.

⁷ Dɛ̍nu̍ɛ, à se̍ dɛ̍ da̍a kmɔ̌ we̍ ja, nɛ̀ à se̍ dɛ̍ da̍a kmɔ̌ we̍ sà mu̍ ke.

⁸ Jɛ pò à blě di̍-dɛ̍ᵻ ke jlii̍-ɛ, nɛ̀ à pɔluh kɔn ɛ̍ iě i̍ pɛ̌n.

⁹ Jɛ juh-a pɔ̀n-a pàn i̍-ɛ, nɛ̀ u̍h-a gbǎ blu̍ja̍a̍. Nɛ̀ bo-o dɛ̍ᵻ dɔu pɔ̀n-ɛ ìh-a pa̍-a nyɔ̍ i̍-ɛ, dě i̍h-a gbɛɛ̍ di̍i̍ bo u̍h-a gbǎ. Jɛ i̍h nɔ̀ɔ̍, i̍h-a nyni i̍ nyɔ̍ jii̍, wɛ̀ i̍h-a gbɔ̀lɔ nyɔ̍-ɔ.

¹⁰ Dɛ̍nu̍ɛ, wlǐ-i jbɛɛ bo ɛ̀ nu̍ dɛ̍ᵻ sɔ̀nᵻ kli̍hgbɛ̍-a maa. Wlǐ dɛ-a jàjà nu̍ ɛ̍ iě nyɔ̍ duuh tǎli Nyɔsoa wlùh gbaɛ tìh i̍, wɛ̀ u̍h ja u̍h-a chɛ̀ wlùh-a dě de̍ i̍ gbǎ-a dɔu we̍.

Nyɔsoa nyɔ̍ slɛ̌n tù wlu̍ la

¹¹ Jɛ mɔ̀ jɔ nu̍-a Nyɔsoa-a pòi̍ju-ɛ, sà ìh kli̍hgbɛ̍ la sɔ̍n we̍. Jɛ dɛ̍ kɔn chììn ìè-a po̍-ɛ, ɛ̍ nu̍ i̍ slɛ̌-ɛ ke, Nyɔsoa dɛ-ɛ nɛ-ɛ ke, wlùh gbaɛ ke, jbɛɛ ke, dě klì i̍ ku̍-ɛ ke gba̍n gbɛ̍n-ɛ.

¹² Fɔ̀n chɛ̀ka dǒ wlùh gbaɛ we̍. Kmɔ̌ sie feɛ kɔn tìh Nyɔsoa dǎ-a m̀ wɛ̀ àn wlu-a àn wlùh gbaɛ blě tìh gbài̍gbài̍ dǒ sàànsi̍i̍h dɔu jǔ-ɛ, ɛ̍-ɛ bo ìè sɔ̍nᵻ sɔɔ̌n i̍ gbɛ̍n-ɛ.

¹³ Nɛ̀ɛ̍, Nyɔsoa ɔ̀ nyǐ-a dɛ̍ᵻ kli̍hgbɛ̍ feɛ-ɛ ke, Jusu Klai jɔ wlu-a ɔ̍ wlùh gbaɛ blě tìh gbài̍gbài̍ dǒ Pɔntiɔ Pale jǔ-ɛ, da̍a u̍h jǔ bo ǎn po̍-e ìn slǔh.

¹⁴ Gbɛ̍n telě la i̍, jɛ pɛ̀àn ke nynɛ̌-a kɔ̌-ɛ bɔ̌ ɛ̍ we̍ gbǎ-a te̍e̍ wɛ̀ à Joi Jusu Klai iě à kɛ̍n wlǔh-i.

¹⁵ Pɔ̀ìě Nyɔsoa ɔ̀ nɛ due blě-a gbǐh kli̍hgbɛ̍-ɛ, ɔ̍ bo ɔ̀ mu̍ ɔ̍ tà sà dǒ ti̍ ɔ̍ tba̍-a di̍i̍, ɔ̀ nu̍-a blǔh baaᵻá Blǔh Baa-a ke joi kli̍hgbɛ̍-a Joi-ɛ.

¹⁶ Ɔ̍ nɛ due ɔ̀ se̍ mɛ̌ la̍ kɔn, iě ɔ̍ tǐn dě sɔ̀npli ɛ̀ se̍-a i̍ plɛ̀n ka̍ nɛ-ɛ di̍i̍. Nyɔ̍ se̍ ɔ̍ jě-ɛ bɛ̌ɛ, wɛ̀ nyɔ̍-ɔ se̍a ɔ̍ jě. Dǒ ɔ̍ we̍ bo ja tè-ɛ ke kmɔ̌ sie gbǐh kɔn. Kǎ ɛ̍-ɛ nɛ.

¹⁷ Nɛ̀ nyɔ̍ ùh blě-a kmɔ̌-a pàn-dɛ̍ᵻɛ́, chlì u̍h-a dounᵻ u̍h-u je̍e i̍h wlùh i̍ kɔ̍, wɛ̀ u̍h-u je̍e i̍h i̍ blɔ̌-ɛ. Dɛ̍nu̍ɛ, i̍h se̍ gba̍n kɔn. Jɛ Nyɔsoa jɔ sèàɛ̍-a dɛ̍ᵻ kli̍hgbɛ̍ to̍o̍gbǎᵻ i̍, wɛ̀ ɔ̍ nyǐ-a àɔ̀ à iě-a kmɔ̌ i̍ nui-ɛ, ɔ̍ bo u̍h iě wlùh i̍ kɔ̍.

¹⁸ Chlì u̍h-a dounᵻ u̍h iě gblɛ̍n-ɛ nmɔ, u̍h-a dɛ̍ᵻ chɛ̀ i̍ nu̍-ɛ iě nya̍ pàn-ɛ, u̍h iě kwa̍ pɔ̀ni.

¹⁹ Pò ɛ̍ ja laan nɛ-ɛ, nɛ̀ u̍h-a tè dɛ̍ i̍ dě nya̍ ɛ̍ iě u̍h gbɔ̀ i̍ ku̍ i̍. Nɛ̀ u̍h-a mu̍ feɛ ɛ̀ nu̍-a tìh-a taǐn-ɛ jě.

²⁰ Timote, dɛ̍ Nyɔsoa po̍-a dě ìn kwa̍a̍-ɛ, nu̍ ɛ̍ sɛ̍sɛ̍. Pàɔ̀n tmɔ̌-ɛ ɛ̀ se̍-a Nyɔsoa dɛ i̍ bǎ-ɛ, sà ɛ̍ sɔ̍n di̍i̍. U̍h-a tie̍u̍n sɔ̀ìn laa̍ u̍h-a dǎɛ-a tɔɔ-ɛ, sà i̍h sɔ̍n di̍i̍.

²¹ Tɔɔ la bo nyɔ̍ duuh la̍ u̍h blě-a, iě u̍h-a Nyɔsoa wlùh gbaɛ sie-a ka kwlǎ. Ǎn sà nǐ wɔ̍n Nyɔsoa-a blɛ iě dǒ mɔ̀ we̍ nɛ.