1 Timote 5 - Ku̍o̍ Delee 1999

Ìh la bo Nyɔsoa jǔ dbee nyɔ̍ iě cheǎn

¹ Bɔ̌ nyɔ̍ klaa dlǔ wǐi-ɛ, jɛ tù ɔ̍ slɛ̌n ka àn mu̍-a ìn baa slɛ̌n tù-ɛ nu̍-ɛ. Juo nynuu̍gbèè-a gbɛ̍n ka̍ ka ìn de̍di̍i̍ᵻ jɔ̍gbauᵻɛ́.

² Kǎ ìè nynɔ̌gbauᵻ nu̍ ke, ka ìn de̍ᵻɛ́. Kǎ ìè wlùh wlǎ blě-ɛ nu̍ ke dǒ nynuu̍nynɔ̌u we̍, ka ìn de̍di̍i̍ᵻ nynɔ̌gbaɔᵻɛ́.

³ Nynɔ̌ ɔ̀ nu̍-a tèwànynɔ̌ teěte-ɛ, tù ɔ̍ tìh jlǐhɛ̍.

⁴ Jɛ pò tèwànynɔ̌ blě nynuu̍ àe̍e̍ diěnynuu̍-ɛ, nɛ̀ u̍h-u bo ùh iě u̍h-a Nyɔsoa dɛ cheǎn sàǐtòò dǒ u̍h-a chɛ̌ pùn. Nɛ̀ u̍h-a sà la̍ u̍h de̍ bei-a gba̍ bo, dɛ̍nu̍ɛ, ɛ̍ bo ɛ̀ po̍ Nyɔsoa gbǐh.

⁵ Nynɔ̌ ɔ̀ nu̍-a tèwànynɔ̌ teěte ɔ̀ se̍-a dǒ we̍ i̍ gbɛ̀n nyɔ̍ kɔn-ɛ, nɛ̀ Nyɔsoa bo ɔ̍ kɔ̍ wlùh i̍. Wɛ̀ ɔ̍ gba̍ ba̍le-ɛ dluwe̍ wlù ke sɔ̀n, Nyɔsoa iě ɔ̍ we̍ gbǎ.

⁶ Jɛ tèwànynɔ̌ jɔ po̍-a ɔ̍ chɛ̀ gbale̍e̍-ɛ, ɔ̍ nɛ kmɔ̌ nɔ̀ɔ̍-o, jɛ nɛ̀ ɔ̍ mɛ̌ wɛ̀.

⁷ Poe u̍h ìh la slǔh wɛ̀ nyɔ̍-ɔ je̍e u̍h-a nynɛ̌ kɔ̌-ɛ.

⁸ Nàa̍, pò nyɔ̍-o-nyɔ̍ se̍ ɔ̍ wloa̍ nyɔ̍-a tìh jlǐhɛ̍ tù-ɛ, ɔ̍ chɛ̌ bo ǎn dǎ gbòǒ, nɛ̀ wlùh gbaɛ bo ɔ̍ tba̍ chla. Wɛ̀ ɔ̍ nu̍ gblɛ̍n sɔ̀ɛ̀n-a gblìmia dǒ se̍ Nyɔsoa juo nyɔ̍ kɛ̍n.

⁹ Tèwànynɔ̌ ɔ̀ kɔn sɔ̀nᵻ sì-a kwela mɛ̀o̍ (60) kɛ̍n-ɛ, ɔ̍ nynɛ̌ bo mɔ̀ iě dě kòo po̍ dǒ tèwànynɔ̌ dɛ we̍. Jɛ ɔ̀ ke ɔ̍ kɔan sèàɛ̍-a gbale̍e̍-ɛ bo ǎn dǎ-a chɛ̀ ke.

¹⁰ Nɛ̀ ɔ̍ kɔn ɔ̍ iě dɛ̍ᵻ chɛ̀ i̍ nu̍, ɛ̍ bo ɛ̀ nu̍-a nynuu̍ we̍ i̍ gbɛ̀n-ɛ ke dihwi̍h tìh jlǐhɛ̍ tù-ɛ. Ɔ̍ ja ɔ̍ chɛ̀ wlù dǒ Nyɔsoa nyɔ̍ we̍, nɛ̀ nyɔ̍ sè-ɛ, nɛ̀ ɔ̍ sìì ɔ̍. Nɛ̀ dɛ̍ chɛ̀ nu̍-ɛ bo ɔ̍ iě we̍ fòè.

¹¹ Jɛ tèwànynɔ̌ ɔ̀ nu̍-a nynɔ̌gbau gbèlà-ɛ, bɔ̌ ɔ̍ nynɛ̌ dě kòo po̍-ɛ. Dɛ̍nu̍ɛ, pò jla̍ tǐn dɛ gbǎ dě ɔ̍ di̍i̍-ɛ, nɛ̀ ɔ̍ poe Klai nɔ̀ɔ̍ kɛ̍n i̍ wɛ̀ sǔh.

¹² Ɛ̍ nɛ ka-ɛ, nɛ̀ ɔ̍ gblìh ɔ̍ chɛ̀-a tɔ̀ma̍a̍ wlu̍ kɛ̍n, iě ɛ̍ sà ɔ̍ kɛ̀n kwa̍a̍.

¹³ Ɛ̍ se̍-o siee, nɛ̀ ɔ̍-ɔ wɔ̌ɛn dɛ̍ nu̍ tìh i̍. Jɛ nɛ̀ wlɔ̀ i̍ na-a bo ɔ̍ tba̍ dlǔ di̍i̍ wɛ̀ sǔh. Ɛ̍ se̍ flàn-a due ɔ̍ se̍ nu̍. Jɛ nɛ̀ ɔ̍ sìi̍ fɛ̍lɛ̍-ɛ i̍, iě ɔ̍ po̍ tìh ɔ̍ se̍-a kɔn-ɛ bu̍h di̍i̍ ke. Wɛ̀ tìh se̍-a dě ɔ̍ wɔ̍ɔ̍n bɛ̌ɛ-ɛ, iě ɔ̍ sà i̍h.

¹⁴ Nɛ̀ mɔ̍ɔ, ɛ̍ tù ǎn tìh-ɛ, pò tèwànynɔ̌ nu̍ nynɔ̌gbau gbèlà-ɛ, nɛ̀ ɔ̍ tǐn jla̍ dode̍ ɔ̍ iě nynuu̍ wlǔh-i, ɔ̍ iě dǒ ɔ̍ gbò we̍ i̍ gbɛ̀n. Nɛ̀ à nyɛ̌-nyɔ̍ se̍ flɔn la̍ jě mu̍ u̍h iě à wlu̍ sɔ̀n pùn po̍.

¹⁵ Dɛ̍nu̍ɛ, tèwànynɔ̌gbaɔᵻ duuh-a chɛ̀ sà Klai dɛ sɔɛn i̍ wɛ̀ se̍e̍, iě u̍h gbǎ dǒ Setɔn de̍e̍.

¹⁶ Nɛ̀ pò nynɔ̌gbaɔ nu̍ Nyɔsoa nyɔ̍, wɛ̀ ɔ̍ iě tèwànynɔ̌ blě dě ɔ̍ chɛ̌ nynɛ̌-ɛ, nɛ̀ ɔ̍ gbɛ̀n dǒ ɔ̍ we̍ i̍. Jɛ nɛ̀ ɔ̍ bɔ̌ ɛ̍ gbɛ̀ dǒ chɔchi̍h dlǔ i̍ tè-ɛ. Wɛ̀ chɔchi̍h iě dǒ juh nu̍-a tèwànynɔ̌gbaɔᵻ teěte-ɛ we̍ i̍ gbɛ̀n.

¹⁷ Nɛ̀ chɔchi̍h-a nyɔ̍ klaaᵻ ùh-a naɛ-a nyɔ̍-ɔ chɛ̀ka-ɛ, ɛ̍ blaɛ i̍ u̍h-a jě-dɛ̍ iě i̍ bɛ̌. Jɛ u̍h-a juh-a po̍-ae gbǐh dǒ Nyɔsoa tìh bla̍-a ke nǎ po̍ la̍-a bo ǎn dǎ gbe̍i̍n.

¹⁸ Dɛ̍nu̍ɛ, Nyɔsoa-a wlu̍ la̍a̍, “Pò bli ja dɛ̍ i̍ bla̍-ɛ, nɛ̀ ìn bɔ̌ ɛ̍ gbǎn wɔ̍i̍n po̍-ɛ.” Nɛ̀ɛ̍, “Dbo̍ nu̍ nyɔ̍ kɔn ɔ̍ iě ɔ̍ pɛ̌ɛ la jě.”

¹⁹ U̍h la̍a̍ kli̍hgbɛ̍ u̍h-a mu̍-a sà dǒ nyɔ̍ klaa pùn-ɛ, bɔ̌ i̍h we̍ gbǎ-a. Jɛ pò sàànsi̍i̍h sɔɔ̌n ke ta̍a̍n ja kunǎ nɔ̀ɔ̍-ɛ, nɛ̀ ǐn se̍ ɛ̍ dǎ.

²⁰ Nyɔ̍ ùh nu̍-a gblɛ̍n sɔ̀ɛ̀n-ɛ, nɛ̀ ìn wǐi u̍h dlǔ i̍ dǒ nyɔ̍ nynɛ̌. Wɛ̀ juh sie-a dǒ de̍-ɛ, u̍h iě faɔn gbǎ.

²¹ Da̍a Jusu Klai ke, Nyɔsoa ke ɔ̍ ǐnchɔ̀ jlǐhwai bo ǎn chlì-i àn dounᵻ. Nu̍ slɛ̌ ǎn po̍-a ìn chèɛ̀-ɛ i̍-ɛ. Bɔ̌-e nyɔ̍ i̍ chlɛ̌-ɛ, bɔ̌ wìè fɔ̌ due sà-a.

²² Bɔ̌ gbù-ɛ, wɛ̀ ìn bɔ̌ nyɔ̍ sɔ̍n dlǔ tè-ɛ. Bɔ̌ dě nyɔ̍ duuh-a gblɛ̍n sɔ̀ɛ̀n di̍i̍ gbǎ-a. Nu̍ àn chɛ̀-a wlaǎwla.

²³ Ka àn poa-a chɛ̍chɛ̍-ɛ, nɛ̀ ìn bɔ̌ nǐ nɛ due nǎ-a. Nǎ nmɔ dɛ̍wɛ wɛ̀ ɛ̍ iě àn di̍-dɛ̍ᵻ wlù ja.

²⁴ Nyɔ̍ duuh-a gblɛ̍n sɔ̀ɛ̀n-a tè gbaɛ̍we̍, wɛ̀ i̍h-a mu̍ u̍h jǔ dě sàwi̍h sì la̍-a. Wɛ̀ nyɔ̍ duuh naɛ-a wlǔh dě nya̍.

²⁵ Kǎ ɛ̍ nɛ ke, nu̍-dɛ̍ᵻ chɛ̀-a tè gbaɛ̍we̍. Jɛ pò nyɔ̍-a jɛ se̍ i̍h i̍ juo-ɛ, i̍h se̍ dě kwile-e sie mu̍.