1 Pitɛ 5 - Ku̍o̍ Delee 1999

Kǎ nyɔ̍ iě ka Nyɔsoa nyɔ̍ we̍ i̍ gbɛ̀n-ɛ nu̍

¹ Ǐn ba̍ᵻ Nyɔsoa nyɔ̍ klaaᵻ nɛ-a dě mɔ̀ nynɛ̌ dě chɔchi̍h-iɛ, ǐn gbɛ̍n u̍h-a bu̍hᵻ i̍. Mɔ̍ la mɔ̍ sàànsi̍i̍h dǒ Klai-a jua̍i̍ sàɛ̀ dɛ we̍. Ɔ̍ tìh-a i̍ bɛ̌-ɛ ɛ̀ mu̍-a ji̍-ɛ, ǎn mu̍ ɛ̍ dɛ̍ di̍i̍ nyǐ-ɛ ke. Ǐn gbɛ̍n mɔ̀-a bu̍hᵻ i̍,

² nyɔ̍ ùh Nyɔsoa nyǐ-a mɔ̀-ɛ, mɔ̀ gbɛ̀n dǒ u̍h we̍ i̍, mɔ̀ iě u̍h-a nɛnɛ̌ nu̍. Mɔ̀-a kloǒ bɔ̌ ɛ̍ nu̍-ɛ, jɛ mɔ̀ nu̍ ɛ̍ dǒ wlùh-a i̍ pɛ̌n-ɛ we̍ ka Nyɔsoa-a pɔ̀n-a mɔ̀ iě-a nu̍-ɛ. Mɔ̀ bɔ̌ dbo̍ nu̍-ɛ pɛ̌ɛ la tìh, jɛ mɔ̀ nui ɛ̍ nyɔ̍ jǔ dbee-ɛ.

³ Mɔ̀ bɔ̌ u̍h nyɔ̍ klaaᵻ dɛ̍ kɛ̍n i̍ nui-ɛ, jɛ mɔ̀ɔ̍ bo u̍h iě dɛ̍ i̍ blaɛ.

⁴ Nɛ̀ pò Blawɛ̌ᵻ We̍ I̍ Gbɛ̀n Nyɔ̍ Klaa Klai ji̍-ɛ, wɛ̀ mɔ̀ iě tìh-a i̍ bɛ̌-ɛ blawɛ̌ ɛ̀ se̍-a jlǐh wɛ̀ la̍ kɔn-ɛ tèè.

⁵ Mɔ̀ɔ̍ nynuu̍gbèè, kǎ mɔ̀ iě nu̍ ke. Mɔ̀ jě mɔ̀-a nyɔ̍ klaaᵻ dɛ̍ɛ̍. Mɔ̀ kli̍hgbɛ̍ mɔ̀ ja mɔ̀-a chɛ̀ wlù dǒ mɔ̀ ba̍ᵻ we̍ ka pòi̍nynuu̍-ɛ. Ɛ̍ kɔn ɛ̍ chlǐh-wlu̍ la̍a̍, “Nyɔsoa faɛn blɔ̌-nyɔ̍. Jɛ ɔ̍ nɛ blɛ dǒ ùh-a ja-a u̍h-a chɛ̀ wlù-ɛ we̍.”

⁶ Ɛ̍ tìh-ɛ, mɔ̀ ja mɔ̀-a chɛ̀ wlù dǒ gbǐh nɛ Nyɔsoa-a sɔ̍n sɔ̀n, wɛ̀ ɔ̍ iě mɔ̀ ja̍i̍ dǔ dǒ ɔ̍ chɛ̀-a ti̍ ɔ̍ tba̍-a we̍.

⁷ Mɔ̀ po̍ mɔ̀-a sèò kli̍hgbɛ̍ dǒ Nyɔsoa jǔ i̍. Dɛ̍nu̍ɛ, ɔ̍ kɔn dǒ mɔ̀-a dɛ we̍.

⁸ Mɔ̀ tù mɔ̀-a chɛ̀ jlǐhɛ̍, mɔ̀ iě mɔ̀-a chɛ̀-a nɛnɛ̌ nu̍. Mɔ̀-a nyɛ̌-nyɔ̍ Kǔ-a ple̍ i̍ ka mɔ̌-a nu̍-u gbòlò-a pɔ̀n nyɔ̍ i̍ ɛ̍ iě-e gbɔ̀lɔ-ɛ.

⁹ Mɔ̀ ku̍-e i̍ dě mɔ̀-a wlùh gbaɛ di̍i̍. Mɔ̀ tǔn Kǔ, dɛ̍nu̍ɛ, mɔ̀ juo ɛ̍-ɛ mɔ̀ ba̍ᵻ Nyɔsoa nyɔ̍ kli̍hgbɛ̍ nɛ-a nɔ̌ kmɔ̌ la we̍-ɛ, kǎ u̍h-a nu̍ jua̍i̍ sàɛ̀-ɛ ke.

¹⁰ Jɛ pò mɔ̀ wɔ̀ jua̍i̍ sàɛ̀-ɛ dǒ ti̍ gbɔ̍ di̍i̍-ɛ, Nyɔsoa ɔ̀ blě-a blɛ kli̍hgbɛ̍-ɛ, ɔ̍ chɛ̀-a mu̍ mɔ̀ dǒ ta̍i̍ po̍ dode̍, ɔ̍ iě mɔ̀ gbǐh nyǐ, wɛ̀ ɔ̍ iě ɛ̍ nu̍ mɔ̀ iě i̍ ku̍. Ɔ̍ dǎ mɔ̀ mɔ̀ iě ɔ̍ kmɔ̌ sie tìh-a i̍ bɛ̌-ɛ kwa̍a̍ i̍ klɛ̀ɛ̀n dě Klai ja̍a̍.

¹¹ Ɔ̍-ɔ bo gbǐh kɔn dǒ we̍ nɔ̌ kmɔ̌-a kmɔ̌. Kǎ ɛ̍-ɛ nɛ.

Bɔ̌ɛ-o wlu̍

¹² Sale ɔ̀ nu̍-a ǐn de̍di̍i̍ ǐn gbaɛ-a wlùh-ɛ, ɔ̍ bo ɔ̀ gbǎ ǐn we̍ wɛ̀ ǐn chlǐh mɔ̀ chlǐh-dɛ̍ tile la we̍. Ǎn pɔ̀n iě mɔ̀-a wlùh fùka wɛ̀ mɔ̀ iě ɛ̍ juo ka ɛ̀ la ɛ̍ nu̍-a Nyɔsoa-a tìh-a taǐn blɛ-ɛ. Mɔ̀ ku̍-e i̍ dě ɛ̍ di̍i̍.

¹³ Mɔ̀ ba̍ᵻ chɔchi̍h nyɔ̍ nɛ-a dǒ Babeloun wlɔ̀ di̍i̍ Nyɔsoa tba̍-a chèɛ̀-ɛ, u̍h la̍ u̍h sà mɔ̀ nyinɔ̍ i̍, ɛ̍ ke ǎn jǔ Maɛ ke.

¹⁴ Mɔ̀ gblèè mɔ̀ ba̍ᵻ dǒ jbɛɛ we̍. Ǎn sà nǐ wɔ̍n mɔ̀ɔ̍ kli̍hgbɛ̍ ùh kɔn-a dǒ Klai we̍-ɛ, wlùh-a i̍ tè-ɛ iě dǒ mɔ̀ we̍ nɛ.