1 Pitɛ 4 - Ku̍o̍ Delee 1999

Nu̍ dɛ̍ᵻ ka Nyɔsoa nyɔ̍-ɛ

¹ Nɛ̀ɛ̍, ka Klai jě-a ɔ̍ chɛ̀-a ku̍ wɔ̍n-ɛ, nɛ̀ mɔ̀ gbàɛ̀ mɔ̀ iě dě ɔ̍ tu̍ laa̍ di̍i̍ nɛ ke. Dɛ̍nu̍ɛ, nyɔ̍-o-nyɔ̍ ɔ̀ jě-a ɔ̍ chɛ̀-a ku̍ wɔ̍n-ɛ, nɛ̀ ɔ̍ sɔ dě gblɛ̍n sɔ̀ɛ̀n di̍i̍ wɛ̀.

² Nɛ̀ sɔ da̍a sèàn blǐ, Nyɔsoa bo ɔ̀ iě mɔ̀-a kmɔ̌ kli̍hgbɛ̍ wlu̍ i̍ kɔn la̍ sǔh nɔ̌ bloɔ̍. Mɔ̀-a chɛ̀-a wlùh dɛ̍ᵻ bɔ̌ mɔ̀ wlu̍ i̍ kɔn-ɛ dɛ.

³ Ɛ̍ se̍ ti̍ dɛ mɔ̀ iě ùh se̍-a Nyɔsoa juo-ɛ u̍h-a gblɛ̍n nu̍. Tɛin-ɛ, nɛ̀ mɔ̀-a nu̍ nynɛ̌à, mɔ̀-a sìèè mɔ̀-a chɛ̀ nmɔ̍ wlì, mɔ̀-a nu̍ sììjii̍, mɔ̀-a sà kwɛ̍i̍n wɛɛ, iě mɔ̀-a mu̍ nmɔ̍ nǎ peě kɛ̍n i̍ mɔ̀-a nu̍ mɔ̀-a chɛ̀-a wlùh.

⁴ Nyɔ̍ ùh se̍-a Nyɔsoa juo-ɛ, ka mɔ̀ se̍-a u̍h nynɛ̌ gbǎ dě u̍h-a se̍ dɛ̍kɛ̍n gbǎ kmɔ̌ di̍i̍-ɛ, ɛ̍ wlǔh i̍ u̍h de̍e̍. Ɛ̍ kɔn u̍h-a chlèe mɔ̀.

⁵ Jɛ Nyɔsoa ɔ̀ jě-a ti̍ wɛ̀ ɔ̀ iě-a mɛ̌-nyɔ̍ ke kmɔ̌ nɛ nyɔ̍-a taɔ pa̍-ɛ, u̍h-a mu̍ u̍h-a chɛ̀-a tìh we̍ i̍ sèàɛ̍ dě ɔ̍ we̍.

⁶ Ɛ̍ kɔn pɔ̀n chɛ̀ bla̍-ɛ ke dě mɛ̌-nyɔ̍ we̍, ùh kɔn taɔ pa̍-ɛa ka nyɔ̍ kli̍hgbɛ̍-a taɔ nu̍-a pa̍-ɛɛ. Ɛ̍ bla̍-ɛ dě u̍h we̍ wɛ̀ u̍h-a sùù iě kmɔ̌ nɛ dě Nyɔsoa ja̍a̍.

Mɔ̀ blě-e wlùh

⁷ Dɛ̍ᵻ kli̍hgbɛ̍ i̍h-a dlǔ i̍ chlà-a kɔǎn we̍ wɛ̀. Ɛ̍ tìh-ɛ, mɔ̀ po̍ mɔ̀-a chɛ̀ gba̍a̍, mɔ̀ iě mɔ̀-a chɛ̀ jlǐhɛ̍ tù, wɛ̀ mɔ̀ iě ba̍le-ɛ bɛ̌ɛ.

⁸ Mɔ̀-a we̍ jbɛɛ-ɛ bo ɛ̀ iě i̍ tìè, ɛ̍ iě dɛ̍ᵻ kli̍hgbɛ̍ sìì. Dɛ̍nu̍ɛ, jbɛɛ-ɛ bo ɛ̀ kaɛn gblɛ̍n sɔ̀ɛ̀n dɔu kɛ̍n.

⁹ Mɔ̀ nu̍ gba̍ ìn ba̍ gbò we̍ ìn ba̍ gba̍ ìn gbò we̍ dǒ wlùh-a i̍ pɛ̌n-ɛ we̍.

¹⁰ Mɔ̀ kli̍hgbɛ̍ Nyɔsoa nyǐ mɔ̀ nyǐ-dɛ̍ᵻá gbɔ̍ᵻ gbɔ̍ᵻ. Ka mɔ̀ jě-a i̍h wɛ̀-ɛ, mɔ̀ nui i̍h dɛ̍ chɛ̀ dǒ nyɔ̍ duuh we̍.

¹¹ Nyɔ̍-o-nyɔ̍ ɔ̀ mu̍-a tìh bla̍-ɛ, Nyɔsoa-a wlu̍ bo ɔ̍ iě bla̍. Nyɔ̍-o-nyɔ̍ ɔ̀ mu̍-a nyɔ̍ jǔ dbee ke-ɛ, ɔ̍ dbee u̍h jǔ dǒ gbǐh Nyɔsoa nyǐ-a ɔ̍ ɛ̍ we̍. Wɛ̀ Nyɔsoa iě tìhwe̍ po̍-eɛ dǒ Jusu Klai-a nynɛ̌ kɛ̍n dǒ dɛ̍ᵻ kli̍hgbɛ̍ we̍. Tìh-a i̍ bɛ̌-ɛ ke gbǐh kɔn dǒ ɔ̍ we̍ nɔ̌ kmɔ̌-a kmɔ̌. Kǎ ɛ̍-ɛ nɛ.

Mɔ̀ nu̍ mɔna̍ dě jua̍i̍ sàɛ̀-ɛ di̍i̍

¹² Ǎn tìh kma nyɔ̍, i̍ tɛ̀n-ɛ ja mɔ̀ jua̍i̍ sàɛ̀-ɛ, ɛ̍ bɔ̌ mɔ̀ i̍ kèle-ɛ, ka dɛ kaɛn nɛ nyɔ̍ jii-ɛ.

¹³ Jɛ mɔ̀ gbǎ mɔna̍-a ka mɔ̀-a sàɛ̀-a jua̍i̍ Klai tìh-ɛ. Nɛ̀ ti̍ ɔ̍ mu̍-a de̍ ji̍ dě ɔ̍ tìh-a i̍ bɛ̌-ɛ di̍i̍-ɛ, wɛ̀ mɔ̀ iě mɔna̍ nu̍ dɛ̍blɔ.

¹⁴ Pò u̍h po̍ mɔ̀ wlu̍ pùn mɔ̀-a Klai de̍e̍ gbǎ tìh-ɛ, nɛ̀ mɔ̀ nmɔ i̍. Dɛ̍nu̍ɛ, tìh-a i̍ bɛ̌-ɛ Sùù ɛ̀ kɔn-a dǒ Nyɔsoa we̍-ɛ, nɛ̀ ɛ̍ nɛ mɔ̀ kɛ̍n.

¹⁵ Jɛ pò mɔ̀ sàɛ̀ jua̍i̍-ɛ, ɛ̍ bɔ̌ nyɔ̍ gbe̍ja̍a̍ po̍-ɛ ke, jlǐ-ɛ ke, dɛ̍ᵻ sɔ̀nᵻ nu̍-ɛ ke nyɔ̍ duuh-a sɔ̀nwli wɔ̍n di̍i̍ po̍ tìh nu̍-ɛ.

¹⁶ Pò ɛ̍ tù Klai-a nyɔ̍ nu̍ tìh wɛ̀ mɔ̀ iě jua̍i̍ sàɛ̀-ɛ, nɛ̀ mɔ̀ bɔ̌ tɛ̀n ple̍-ɛ, jɛ nɛ̀ mɔ̀ po̍ Nyɔsoa tlɔ̌ ka u̍h-a dǎɛ-a mɔ̀ Klai-a nyɔ̍-ɛ.

¹⁷ Ti̍ nyni̍ wɛ̀ sàwi̍h sì-ɛ iě gbɔ̀ tè-ɛ. Nyɔsoa-a nyɔ̍ bo ùh-a mu̍ sàǐtòò nyɔ̍ nu̍ ùh iě sàwi̍h sì. Pò ɛ̍ tè-ɛ gbɔ̀ dě àɔ̀ we̍-ɛ, nɛ̀ nyɔ̍ juh se̍-a Nyɔsoa-a pɔ̀n chɛ̀-a wlu̍ nu̍-ɛ, nɛ̀ ka u̍h naɛ-a mu̍ nɛ ɛ?

¹⁸ Nyɔsoa-a wlu̍ la̍a̍, “Ɛ̍ kma-a Nyɔsoa-a wlùh nu̍ nyɔ̍ iě-a pǔh-ɛ, jɛ nɛ̀ gblɛ̍n sɔ̀ɛ̀n nyɔ̍ ùh se̍-a Nyɔsoa juo-ɛ, ka u̍h-a mu̍ tè ɛ?”

¹⁹ Ɛ̍ tìh-ɛ, nyɔ̍ ùh sàɛ̀-a jua̍i̍ wɛ̀ ɛ̍ nu̍-a Nyɔsoa-a wlùh dɛ-ɛ, u̍h sà-ɛ u̍h-a chɛ̀ Nyɔsoa ɔ̀ nu̍-a u̍h-a kwlǎ la̍ sǔh kleǐn u̍h iě dɛ̍ chɛ̀ nu̍-ɛ dluwe̍ gba̍. Ɔ̍-ɔ gblìh wlu̍ kɛ̍n.