1 Tɛsoloniɔn 4 - Ku̍o̍ Delee 1999

Kmɔ̌ tu̍ ɛ̀ po̍-a Nyɔsoa gbǐh-ɛ la

¹ À de̍di̍i̍ᵻ, pò iě chlà-ɛ, ka mɔ̀ iě-a kmɔ̌ nɛ-ɛ nu̍ wɛ̀ mɔ̀ iě-a dě Nyɔsoa jlǐh i̍ nmɔ-ɛ, ɛ̍-ɛ bo à toe mɔ̀. I̍i̍n, kǎ mɔ̀-a nu̍ la̍. Jɛ kaka la̍ à ba̍le mɔ̀-ɛ, à gbɛ̍n mɔ̀-a bu̍hᵻ i̍ dǒ Joi Jusu-a nynɛ̌ kɛ̍n mɔ̀ iě ɛ̍ dluwe̍ i̍ gba̍ ma̍u̍.

² Mɔ̀ juo slɛ̌ à po̍-a mɔ̀ chèɛ̀ i̍ dě Joi Jusu ja̍a̍-ɛ.

³ Ɛ̀ la bo ɛ̀ nu̍ Nyɔsoa-a wlùh dɛ dǒ mɔ̀ we̍. Ɔ̍ pɔ̀n mɔ̀-a kmɔ̌ iě ɔ̍ we̍ fòè-e, mɔ̀ iě gbǎn nu̍-ɛ we̍ i̍ ti̍ɛ̍ɛn.

⁴ Mɔ̀-a nyɔ̍ jɔ-ɛ, ɔ̍ kɔn ɔ̍ iě ka ɔ̍ iě-a nynɔ̌ blě-ɛ nu̍-ɛ juo. Nɛ̀ u̍h-a mu̍ kǔkɛ̍n nɛ, wɛ̀ u̍h iě dě Nyɔsoa jlǐh i̍ nmɔ.

⁵ Bɔ̌ ɛ̍ wlùh sɔ̀n we̍ blě-ɛ, ka nyɔ̍ ùh se̍-a Nyɔsoa juo-ɛ.

⁶ Nɛ̀ɛ̍, nyɔ̍ bɔ̌ ɔ̍ de̍di̍i̍ dɛ̍ sɔ̀n pùn nu̍-ɛ, àe̍e̍ ɔ̍ bɔ̌ ɔ̍ wɔ̍n sìì dɛ nu̍-ɛ dě blǐ tǐn-i dɛ la di̍i̍. À sèàɛ̍ mɔ̀ wlùh se̍e̍, iě à gbòɛ̀ɛ̀ mɔ̀ ka Joi-a mu̍-a ɛ̍ we̍ nyɔ̍ kàn gbɛ̍n-ɛ.

⁷ Nyɔsoa se̍ à dǎ à iě dě gbǎn nu̍-ɛ di̍i̍ nɛ, jɛ ɔ̍ dǎ àɔ̀ à iě nɛi̍ wɛ̀.

⁸ Ɛ̍ tìh-ɛ, nyɔ̍-o-nyɔ̍ ɔ̀ tba̍-a nǎ po̍ wlu̍ la chla-ɛ, nɛ̀ ɔ̍ se̍ wlɔ̀ nyi̍ɔ̍ chla tba̍, jɛ nɛ̀ Nyɔsoa bo ɔ̍ tba̍ chla, ɔ̀ nyǐ-a mɔ̀ ɔ̍ Sùù-ɛ.

⁹ Nyɔ̍-o-nyɔ̍ se̍ kɔn ɔ̍ iě mɔ̀ we̍ chlǐh dǒ mɔ̀ de̍di̍i̍ᵻ jbɛɛ dɛ we̍. Dɛ̍nu̍ɛ, mɔ̀ɔ̍ bo Nyɔsoa po̍ nǎ wɛ̀ dǒ we̍ jbɛɛ dɛ we̍.

¹⁰ Wɛ̀ kǎ ɛ̍ nɛ ke, mɔ̀ jbɛɛ de̍di̍i̍ᵻ kli̍hgbɛ̍ nɛ-a dě Mɛsedonia-a wɛ̀. Ɛ̍ tìh-ɛ, à de̍di̍i̍ᵻ, à ba̍le mɔ̀-ɛ, mɔ̀ iě ɛ̍ dluwe̍ i̍ gba̍ ma̍u̍.

¹¹ Mɔ̀ fɔ̀n dɛ̍ we̍ mɔ̀ iě dě gba̍n gbɛ̍n kmɔ̌ di̍i̍ nɛ. Mɔ̀ sà dǒ nyɔ̍ dɔɔ-a tìh we̍ wlu̍. Mɔ̀ nu̍ mɔ̀-a chɛ̀-a dbo̍. Kǎ ǐn dǎ mɔ̀ wlùh sèàɛ̍-ɛ se̍e̍.

¹² Wɛ̀ mɔ̀ɔ̍ je̍e nyɔ̍-o-nyɔ̍ wlì tè, nɛ̀ nyɔ̍ ùh se̍-a Nyɔsoa nyɔ̍-ɛ u̍h-a mu̍ mɔ̀ dɛ̍ɛ̍ jě ke.

Joi-a ji̍-ɛ

¹³ À de̍di̍i̍ᵻ, à pɔ̀n dě mɔ̀ di̍i̍ iě i̍ flɔn dǒ nyɔ̍ ùh mɛ̌-aɛ dɛ we̍, wɛ̀ mɔ̀ɔ̍ jěe seɔn gbǎ ka nyɔ̍ ùh se̍-a wlùh i̍ tba̍ dɛ̍ blě-ɛ.

¹⁴ À gbaɛ ɛ̍ wlùh ka Jusu mɛ̌-a wɛ̀ ɔ̍ wlǔh-ae dode̍-ɛ. Ka ɛ̍ nɛ-a ka-ɛ, nɛ̀ à tè ɛ̍ wlì nyɔ̍ ùh mɛ̌-a dě Jusu ja̍a̍-ɛ, Nyɔsoa-a mu̍ u̍h Jusu we̍ jaɛ.

¹⁵ Dɛ̍ à sà-a dě mɔ̀ we̍-ɛ, Joi-a wlu̍ bo. Àɔ̀ mu̍-a kmɔ̌ nɛ wɛ̀ Joi iě-a ji̍-ɛ, à se̍ nyɔ̍ ùh mɛ̌-aɛ jǔ mu̍ mu̍.

¹⁶ Dɛ̍nu̍ɛ, Joi-a chɛ̀-a gbǎ-a mu̍ dě ja̍i̍wlɔ̀ sɔ, wɛ̀ telě iě nyǐ-ɛ dǒ plǎn-a wlu̍ we̍. Wɛ̀ Nyɔsoa-a ǐnchɔ̀-a dlǔtu iě dǎ, wɛ̀ Nyɔsoa-a dɔ̍gbɛ̍ iě wlu. Nɛ̀ nyɔ̍ ùh mɛ̌-a dě Klai ja̍a̍-ɛ, u̍h-a mu̍-e wlǔh sàǐtòò.

¹⁷ Nɛ̀ɛ̍, à nyɔ̍ ùh-a mu̍-a kmɔ̌ nɛ dǒ ti̍ laa̍ di̍i̍-ɛ, u̍h ke à mu̍ dě nǐgbanᵻ kɛ̍n gba̍-ɛ tàdùè dě ja̍u̍n wlì, à iě Joi i̍ jǎɛ. Nɛ̀ à mu̍ la̍ dǒ Joi we̍ nɛ kleǐnklein.

¹⁸ Ɛ̍ tìh-ɛ, jɔ-ɛ, nɛ ɔ̍ fùka ɔ̍ ba̍-a wlùh dǒ wlu̍ la we̍.