1 Tɛsoloniɔn 2 - Ku̍o̍ Delee 1999

Pɔɔ nu̍ dbo̍ dě Tɛsolonaika

¹ À de̍di̍i̍ᵻ, mɔ̀-a chɛ̀ juo ɛ̍ ka à dě mɔ̀ we̍ i̍ nala ji̍-ɛ se̍-a bu̍ɛ̍i̍ nu̍-ɛ.

² Mɔ̀ juo i̍h ka à nu̍-a jua̍i̍ sàɛ̀ ke chlèwli̍ nǎ-aɛ, iě u̍h jě-e à tìh dǒ Felepai wlɔ̀ di̍i̍ wɛ̀ à dǔ-a nɔ̌ mɔ̀ we̍ ji̍-ɛɛ. Nyɔ̍ dɔu se̍ pɔ̀n à iě pɔ̀n chɛ̀ la bla̍. Jɛ à Nyɔsoa bɛ̌ɛ à wlì i̍, iě à po̍ gbɔ̍igbɔ̍ wɛ̀ à bla̍ pɔ̀n chɛ̀ la ɛ̀ sɔ-a dě ɔ̍ we̍-ɛ dě mɔ̀ we̍.

³ Wɔ̍n à gbɛ̍n-ɛa mɔ̀ i̍-ɛ, ɛ̍ se̍ si̍h tmɔ̌-ɛ ke sììjii̍ nu̍-ɛ de̍e̍ gbà. À se̍ dɛ̍ we̍ fɔ̀n à iě nyɔ̍-o-nyɔ̍ i̍ boe.

⁴ Jɛ Nyɔsoa-a chɛ̀ bo ɔ̀ wɔ̌ɛn à tìh i̍, iě ɔ̍ tè pɔ̀n chɛ̀ la ɛ̍ tìh dǒ à dlǔ i̍ à iě ɛ̍ bla̍. Ɛ̍ kɔn à wlu, iě Nyɔsoa ɔ̀ chlɛ̌-a dě à wlùh we̍ i̍-ɛ, wɛ̀ à iě ɔ̍ pɔluh i̍ tè-e. Jɛ à se̍ nyi̍ɔ̍-a pɔluh i̍ tè-e dɛ̍ we̍ fɔ̀n.

⁵ Mɔ̀-a chɛ̀ juo ɛ̍-ɛ, à-a se̍a wɔ̍n nmɔ wlu̍ ɛ̀ sà-a nyɔ̍ dɛ̍ kwa̍a̍-ɛ bla̍ dě mɔ̀ we̍. À se̍ klǎn kɔn, Nyɔsoa bo ɔ̀ nu̍ à sàànsi̍i̍h.

⁶ À se̍ dɛ̍ we̍ fɔ̀n nyɔ̍-o-nyɔ̍ iě à tìhwe̍ po̍, mɔ̀ɔ̍ àe̍e̍ nyɔ̍ duuh.

⁷ Ka à nu̍-a Klai-a gba̍tòà-ɛ, à kɔn à iě mɔ̀ dɛ̍ jbǎ-ɛa chɛ̀ de. Jɛ ti̍ à nɛ-a dě mɔ̀ we̍-ɛ, nɛ̀ à gbɛ̍n gba̍n ka gbàɔ̀n nynɔ̌-a gbɛ̀n dǒ ɔ̍ nynuu̍ we̍ i̍-ɛ.

⁸ À mɔ̀ɔ̍ jbɛɛ tìh sɔ à se̍ mɔ̀ Nyɔsoa-a pɔ̀n chɛ̀ nɛ due jii̍ gblè-ɛ i̍ pɔ̀n, jɛ à chɛ̀-ɛ kmɔ̌ bo à pɔ̀n mɔ̀ jii̍ gblè-ɛ i̍ ke. Dɛ̍nu̍ɛ, mɔ̀-a dɛ bla̍ à gbǎ di̍i̍.

⁹ À de̍di̍i̍ᵻ, mɔ̀ bɛ̌ɛ mɔ̀ iě wlùh nu̍, ti̍ à nɛ-a dě mɔ̀ we̍-ɛ, nɛ̀ à nu̍ kmu-u dbo̍ iě à sàɛ̀ jua̍i̍ wlù ke sɔ̀n, wɛ̀ à-a je̍e nyɔ̍-o-nyɔ̍ wɔ̍ɔ̍n i̍ bɛ̌ɛ dǒ à Nyɔsoa-a pɔ̀n chɛ̀ bla̍-a we̍.

¹⁰ Bu̍hᵻ à na-ɛa kɛ̍n dǒ mɔ̀ɔ̍ Nyɔsoa nyɔ̍ we̍-ɛ, ka i̍h se̍-a nɛi̍ nɛ, i̍h slɛ̌-a i̍, iě i̍h se̍-a nynɛ̌-a kɔ̌-ɛ blě-ɛ, mɔ̀-a chɛ̀ ke Nyɔsoa nu̍ à sàànsi̍i̍h.

¹¹ Mɔ̀ juo ka à nu̍-a mɔ̀ sɔ̍nᵻ we̍ i̍ naɛ due due-ɛ, ka baa-a naɛ ɔ̍ nynuu̍ sɔ̍nᵻ we̍ i̍-ɛ.

¹² À fùka mɔ̀-a wlùh, iě à tù mɔ̀ gbàì. Wɛ̀ à gbɛ̍n-ɛ mɔ̀ wɔ̍i̍n, mɔ̀ iě dě kmɔ̌ ɛ̀ po̍-a Nyɔsoa gbǐh-ɛ di̍i̍ nɛ. Ɔ̍ dǎ mɔ̀ mɔ̀ iě dě ɔ̍ kmɔ̌ wlu̍ i̍ kɔn-ɛ ke ɔ̍ tìh-a i̍ bɛ̌-ɛ di̍i̍ ji̍.

¹³ Ɛ̀ la ɛ̍ kɔn tìh bo à po̍ Nyɔsoa tlɔ̌ ke ma̍u̍. Ti̍ à ja̍-a mɔ̀ Nyɔsoa-a tu̍owli-ɛ, mɔ̀ wɔ̌n ɛ̍-ɛ i̍, iě mɔ̀ gbɛ̍n ɛ̍ i̍. Mɔ̀ se̍ ɛ̍ nyi̍ɔ̍-a tu̍owli ka gbɛ̍n, jɛ ka ɛ̍ nu̍-a nɛ-ɛɛ kǎ mɔ̀ nu̍ ɛ̍ i̍ gbɛ̍n-ɛ. Nyɔsoa-a wlu̍ la, ɛ̍-ɛ bo ɛ̀ nu̍-a dbo̍ dě mɔ̀ɔ̍ wlùh gbaɛ blě nyɔ̍ ja̍a̍.

¹⁴ Ǐn de̍di̍i̍ᵻ, Nyɔsoa-a chɔchi̍h nyɔ̍ ùh nɛ-a dě Jusu Klai ja̍a̍ dě Judia fɔɔ-ɛ, mɔ̀-a sà-e u̍h-a wɔ̀ɔ̀ i̍. Ɛ̀ kɔn ba̍ mɔ̀-a chɛ̀-a blǐ nyɔ̍ nu̍-a mɔ̀ jua̍i̍ sàɛ̀-ɛ, ɛ̍ kɔn ba̍ bo u̍h nu̍ jua̍i̍ sàɛ̀ ke dě Juu nyɔ̍ kwa̍a̍.

¹⁵ Juu nyɔ̍ bo ùh dbǎ Joi Jusu, ɛ̍ ke Nyɔsoa-a tu̍owli po̍ nyɔ̍ ke, iě u̍h nu̍ à i̍. U̍h-a nu̍-dɛ̍ se̍ Nyɔsoa gbǐh po̍, iě u̍h tba̍-ɛ nyɔ̍ kli̍hgbɛ̍ bu̍hᵻ i̍.

¹⁶ Tu̍owli à po̍-a dě ùh se̍-a Juu nyɔ̍-ɛ we̍ u̍h iě-a pǔh-ɛ, u̍h se̍ pɔ̀n à iě i̍h po̍. Ɛ̀ u̍h-a nu̍-aɛ, nɛ̀ u̍h-a chɛ̀-a gblɛ̍n sɔ̀ɛ̀n bo u̍h-a jǐi dlǔ ti̍ kli̍hgbɛ̍ we̍. Jɛ Nyɔsoa bɔ̌ɛ u̍h jlu̍h po̍-eɛ.

Pɔɔ-a pɔ̀n dě Tɛsolonaika nyɔ̍ we̍ i̍ nala mu̍-ɛ i̍ dɛ

¹⁷ Àɔ̀ nɔ̀ɔ̍-ɛ de̍di̍i̍ᵻ, ti̍ mɔ̀ ke à chɛɛn-a i̍ dǒ ti̍ gbɔ̍ di̍i̍-ɛ, dǒ nyi̍ɔ̍tu we̍ bo, ɛ̍ se̍ dě pɔluh we̍. Mɔ̀ po̍ à plǔh we̍ i̍ kaa̍, ɛ̍ kɔn à fɔ̀n dɛ̍ we̍ ke kleǐn à iě mɔ̀ jě dɛ.

¹⁸ À pɔ̀n à iě dě mɔ̀ we̍ ji̍ dɛ. Ǎn chɛ̀ ǐn fɔ̀n dɛ̍ we̍ iě dě de̍ mɔ̀ we̍ ji̍ dode̍ de, jɛ Setɔn se̍ wɔ̌n la̍a̍n nɛ.

¹⁹ Ti̍ à Joi Jusu-a mu̍-a ji̍-ɛ, dɛ̍ we̍ à tè wlì ɛ̀ mu̍ à mɔna̍-a po̍ ɛ? Àe̍e̍ blawɛ̌ we̍ à mu̍ tèè dǒ ɔ̍ jǔ, wɛ̀ à iě bu̍hᵻ wlù i̍ po̍ ɛ? Ɛ̍ se̍ mɔ̀ɔ̍ ae?

²⁰ Mɔ̀ɔ̍ bo ùh nu̍ bu̍hᵻ à po̍ wlù i̍, iě à nu̍ mɔna̍.