1 Tɛsoloniɔn 1 - Ku̍o̍ Delee 1999

¹ Mɔ̍ Pɔɔ ke Sale ke Timote ke, nɔ̌ à we̍ bo chlǐh-dɛ̍ la ɛ̍ sɔ-ɔ. Ɛ̍ mu̍ chɔchi̍h nyɔ̍ nɛ-a dǒ Tɛsolonaika wlɔ̀ di̍i̍-ɛ we̍, ùh nɛ-a dě à Baa Nyɔsoa ke Joi Jusu Klai ja̍a̍-ɛ. Ǎn sà nǐ wɔ̍n Nyɔsoa iě mɔ̀ blɛ ke wlùh-a i̍ tè-ɛ nyǐ.

Tɛsolonaika nyɔ̍-a kmɔ̌ ke wlùh gbaɛ blě-ɛ la

² À po̍ Nyɔsoa tlɔ̌ ma̍u̍ dǒ mɔ̀ kli̍hgbɛ̍ we̍. À ja ba̍le-ɛ, nɛ̀ à po̍-e mɔ̀-a nynɛ̌ i̍.

³ Mɔ̀-a wlùh gbaɛ ɛ̀ blě-a nu̍-dɛ̍ᵻ ke jbɛɛ ɛ̀ nɛ-a kmu-u dbo̍ de̍e̍-ɛ, ɛ̍ ke mɔ̀-a à Joi Jusu Klai wlì tè-ɛ ɛ̀ ku̍-ae klì i̍-ɛ, pò à nɛ dǒ à Baa Nyɔsoa jǔ-ɛ, nɛ̀ à nu̍ i̍h wlùh we̍.

⁴ À de̍di̍i̍ᵻ, à juo i̍h ka Nyɔsoa jbɛɛ-a mɔ̀ɔ̍ wɛ̀ ɔ̍ tba̍-a mɔ̀ chèɛ̀ mɔ̀ iě-a ɔ̍ chɛ̀-a nyɔ̍ nu̍-ɛ.

⁵ Dɛ̍nu̍ɛ, pɔ̀n chɛ̀ à ja-a dě mɔ̀ we̍-ɛ, ɛ̍ se̍ wɔ̍i̍n wlu̍-a sǔh, jɛ ɛ̍ ke, gbǐh ke Nyɔsoa-a Sùù na. Ɛ̍ ke à pɔ̀n chɛ̀ wlùh gbaɛ nu̍-a tìh-a taǐn-ɛ ke. Ti̍ à nɛ-a dě mɔ̀ we̍-ɛ, mɔ̀-a tìh ka à nu̍-a nɛ-ɛɛ, mɔ̀ juo i̍h.

⁶ Ɛ̍ kɔn mɔ̀-a sà-e à ke Joi-a wɔ̀ɔ̀ i̍. Mɔ̀ sàɛ̀ jua̍i̍ kaa̍ gbɛɛ, jɛ mɔ̀ gbɛ̍n tu̍owli la i̍ dǒ mɔna̍ ɛ̀ Nyɔsoa-a Sùù-a nyǐ-a nyɔ̍-ɛ we̍.

⁷ Ɛ̍ tìh-ɛ, mɔ̀ɔ̍ bo à blaɛ ka dɛ̍ i̍ dǒ wlùh gbaɛ blě nyɔ̍ kli̍hgbɛ̍ ùh nɛ-a dě Mɛsedonia ke Akaia fɔɔ-ɛ we̍.

⁸ Tu̍owli ɛ̀ kɔ̍-a dǒ Joi pùn i̍ ɛ̀ sɔ-a dě mɔ̀ we̍-ɛ, ɛ̍ se̍ dě Mɛsedonia ke Akaia nɛ due mu̍, jɛ ɛ̍ sɛ̍ tà kli̍hgbɛ̍ i̍ wɛ̀ mɔ̀-a Nyɔsoa wlùh gbaɛ blě tìh. Sɔ nɛ̀ à se̍ dɛ̍ blě dɛ à iě bla̍.

⁹ Ti̍ à ji̍-a dě mɔ̀ we̍-ɛ, ka mɔ̀ nu̍-a à tìh i̍ gbɛ̍n-ɛɛ, nyɔ̍ kli̍hgbɛ̍-a sà i̍h-i. Ɛ̍ ke ka mɔ̀ tǎli-a kwɛ̍i̍n gbo̍ᵻ i̍, iě mɔ̀ bǐi-a dě Nyɔsoa we̍ i̍ wɛ̀ mɔ̀ iě-a kmɔ̌ nɛ Nyɔsoa ɔ̀ nu̍-a tìh-a taǐn-ɛ wɛɛ sà-ɛ.

¹⁰ Wɛ̀ mɔ̀ iě ɔ̍ Jǔ Jusu ɔ̍ sà-eɛ, ɔ̍ dě ja̍i̍wlɔ̀ sɔ-ɛ fuo-e, ɔ̍ bo ɔ̀ sèìe àɔ̀ dǒ Nyɔsoa-a jlu̍h ɛ̀ mu̍-a ji̍-ɛ we̍.