1 Chɔɔn 4 - Ku̍o̍ Delee 1999

Nyɔsoa sà tu̍owli po̍ nyɔ̍-a si̍h naɛ klà

¹ Ǎn tìh kma nyɔ̍, mɔ̀ bɔ̌ nyɔ̍ kli̍hgbɛ̍ ùh la̍ ùh blě-a Nyɔsoa-a Sùù-ɛ wlùh gbaɛ. Mɔ̀ tɛ̀n u̍h-u pò u̍h sɔ dě Nyɔsoa we̍-ɛ. Dɛ̍nu̍ɛ, Nyɔsoa-a tu̍owli po̍ nyɔ̍-a si̍h naɛ dɔu-a sì la̍ blǔh we̍.

² Kǎ mɔ̀-a mu̍ ka nyɔ̍ ùh blě-a Nyɔsoa-a Sùù-ɛ i̍ juo-ɛ nu̍. Nyɔ̍ ùh wɔ̌ɛn-a Jusu Klai-a dě nyi̍ɔ̍tu di̍i̍ ji̍-i tìh i̍-ɛ, nɛ̀ u̍h sɔ dě Nyɔsoa we̍.

³ Jɛ nyɔ̍ ùh se̍-a Jusu-a tìh i̍ wɔ̌ɛn-ɛ, nɛ̀ u̍h se̍ dě Nyɔsoa we̍ sɔ. Klai-a Nyɛ̌-nyɔ̍ kɔn nynɛ̌ mɔ̀ wɔ̌n-a ɔ̀ mu̍-a ji̍-ɛ, nɛ̀ dě ɔ̍ we̍ bo u̍h sɔ-ɔ. Ɔ̍ chɛ̀ nɛ da̍a kmɔ̌ we̍ wɛ̀.

⁴ Ǎn nynuu̍, mɔ̀ɔ̍ nɔ̀ɔ̍, mɔ̀ sɔ dě Nyɔsoa we̍, iě mɔ̀ sà tu̍owli po̍ nyɔ̍-a si̍h naɛ klà. Dɛ̍nu̍ɛ, Nyɔsoa-a Sùù ɛ̀ nɛ-a dě mɔ̀ ja̍a̍-ɛ, ɛ̍ gbǐh ku̍ wɔ̍n ɛ̍ sìì Nyɔ̍ Sɔ̀n jɔ nɛ-a nɔ̌ kmɔ̌ we̍-ɛ.

⁵ Tu̍owli po̍ nyɔ̍-a si̍h naɛ nɔ̀ɔ̍, u̍h sɔ nɔ̌ kmɔ̌ we̍. Ɛ̍ tìh-ɛ, dɛ̍ᵻ ìh kɔn-a nɔ̌ kmɔ̌ we̍-ɛ, i̍h bo u̍h-a bla̍, iě kmɔ̌ we̍ nyɔ̍-a po̍ dě u̍h we̍ dounᵻ.

⁶ Jɛ àɔ̀ nɔ̀ɔ̍, à sɔ dě Nyɔsoa we̍. Nyɔ̍ juh juo-a Nyɔsoa-ɛ, nɛ̀ u̍h-a po̍ nɔ̌ àɔ̀ we̍ dounᵻ. Jɛ nyɔ̍ ùh se̍-a dě Nyɔsoa we̍ sɔ-ɛ, nɛ̀ u̍h-u po̍ nɔ̌ àɔ̀ we̍ dounᵻ. Dǒ à ju̍o̍e tìh-a taǐn sùù ke ɛ̍ si̍h naɛ we̍ i̍.

Nyɔsoa mɔ jbɛɛ

⁷ Ǎn tìh kma nyɔ̍, mɔ̀ à jbɛɛ we̍, dɛ̍nu̍ɛ, jbɛɛ sɔ dě Nyɔsoa we̍. Nyɔ̍ jɔ blě-a jbɛɛ-ɛ, nɛ̀ ɔ̍-ɔ Nyɔsoa-a jǔ, iě ɔ̍ juo Nyɔsoa.

⁸ Nyɔ̍ jɔ se̍-a jbɛɛ blě-ɛ, nɛ̀ ɔ̍ se̍ Nyɔsoa juo, dɛ̍nu̍ɛ, Nyɔsoa mɔ jbɛɛ.

⁹ Kǎ Nyɔsoa nu̍ ka ɔ̍ jbɛɛ to-ɛ nɔ̌ à nynɛ̌. Ɔ̍ dbo̍ ɔ̍ Jǔ jɔɛ̍ due gbài̍ nɔ̌ kmɔ̌ we̍. Pò à jii ɔ̍-ɛ, wɛ̀ à iě kmɔ̌ nɛ.

¹⁰ Ɛ̀ la bo ɛ̀ nu̍ jbɛɛ. Ɛ̍ se̍ àɔ̀ mɔ à se̍ Nyɔsoa-a jbɛɛ, jɛ ɔ̍-ɔ bo ɔ̀ jbɛɛ àɔ̀ wɛ̀ ɔ̍ dbo̍ ɔ̍ Jǔ. Dě ɔ̍ Jǔ-a ɔ̍ chɛ̀ slaǎ sà-ɛ di̍i̍ bo à gblɛ̍n sɔ̀ɛ̀n-a tìh tǎli-ɛ i̍.

¹¹ Ǎn tìh kma nyɔ̍, pò Nyɔsoa nu̍ ka à-a jbɛɛ-ɛ, nɛ̀ à kɔn à iě we̍ jbɛɛ ke.

¹² Nyɔ̍-ɔ se̍a Nyɔsoa jě. Jɛ pò à jbɛɛ we̍-ɛ, nɛ̀ Nyɔsoa nɛ dě à ja̍a̍, iě ɔ̍ jbɛɛ wɛ̀ gblɛ̍ja̍i̍ dě à ja̍a̍.

¹³ Nyɔsoa nyǐ àɔ̀ ɔ̍ Sùù. Ɛ̍ bo ɛ̀ nu̍ ɛ̍ iě à juo-o dɛ̍ i̍ ka à nɛ-a dě ɔ̍ ja̍a̍ wɛ̀ ɔ̍ nɛ-a dě à ja̍a̍-ɛ.

¹⁴ À jě ɛ̍ iě à sèàɛ̍ nyɔ̍ɔ wlùh ka Baa Nyɔsoa dbo̍-a ɔ̍ Jǔ ɔ̍ iě-a kmɔ̌ la ɛ̍ Sèìe Nyɔ̍ nu̍-ɛ.

¹⁵ Ka Jusu nu̍-a Nyɔsoa-a Jǔ-ɛ, nyɔ̍-o-nyɔ̍ ɔ̀ mu̍-a ɛ̍ tìh i̍ wɔ̌ɛn-ɛ, nɛ̀ Nyɔsoa nɛ dě ɔ̍ ja̍a̍ wɛ̀ ɔ̍ nɛ dě Nyɔsoa ja̍a̍.

¹⁶ Jbɛɛ Nyɔsoa blě-a dǒ à we̍-ɛ, à chɛ̀-a gbǎ juo ɛ̍ i̍ iě à gbaɛ ɛ̍ wlùh. Nyɔsoa mɔ jbɛɛ nɛ̀ nyɔ̍ jɔ nɛ-a dě jbɛɛ di̍i̍-ɛ, nɛ̀ ɔ̍ nɛ dě Nyɔsoa ja̍a̍ iě Nyɔsoa nɛ dě ɔ̍ ja̍a̍.

¹⁷ Ti̍ jbɛɛ-a mu̍-a gblɛ̍ja̍i̍ wɛ̀ nɔ̌ à nynɛ̌-ɛ, nɛ̀ à mu̍ faɔn wɛ̀ dǒ sàwi̍h sì weɛ̍ di̍i̍. Dɛ̍nu̍ɛ, ka Klai nɛ-aɛ, nɛ̀ kǎ à nɛ wɛ̀ ke nɔ̌ kmɔ̌ la we̍.

¹⁸ Faɔn se̍ dě jbɛɛ di̍i̍ nɛ. Jbɛɛ ɛ̀ wɛ̀-a gblɛ̍ja̍i̍-ɛ, nɛ̀ ɛ̍ sà faɔn kli̍hgbɛ̍ i̍. Faɔn ple̍-ɛ sɔ dě kàn gbɛ̍n-ɛ di̍i̍. Nyɔ̍ ɔ̀ ple̍-a faɔn-ɛ, nɛ̀ ɔ̍ jbɛɛ se̍ gblɛ̍ja̍i̍ wɛ̀.

¹⁹ À jbɛɛ, dɛ̍nu̍ɛ, Nyɔsoa bo ɔ̀ jbɛɛ àɔ̀ sàǐtòò.

²⁰ Pò nyɔ̍ la̍ ɔ̍ jbɛɛ Nyɔsoa wɛ̀ ɔ̍ iě ɔ̍ de̍di̍i̍ faɛn-ɛ, nɛ̀ si̍h nyɔ̍ bo. Dɛ̍nu̍ɛ, pò ɔ̍ faɛn ɔ̍ de̍di̍i̍ jɔ ɔ̍ jě-aɛ, nɛ̀ ɔ̍ se̍ Nyɔsoa jɔ ɔ̍-ɔ se̍a jě-ɛ jbɛɛ bɛ̌ɛ.

²¹ Telě la bo Nyɔsoa nyǐ àɔ̀. Ɔ̍ la̍ nyɔ̍ jɔ jbɛɛ-a ɔ̍-ɛ, nɛ̀ ɔ̍ kɔn ɔ̍ iě ɔ̍ de̍di̍i̍ jbɛɛ ke.