1 Chɔɔn 2 - Ku̍o̍ Delee 1999

Jusu Klai bo ɔ̀ nu̍ à we̍ gbǎ nyɔ̍

¹ Ǎn nynuu̍, ǎn chlǐh mɔ̀ ɛ̀ la we̍ wɛ̀ mɔ̀-ɔ je̍e gblɛ̍n sɔ̀ɛ̀n nu̍. Jɛ pò mɔ̀-a nyɔ̍ nu̍ gblɛ̍n sɔ̀ɛ̀n-ɛ, à blě à we̍ gbǎ nyɔ̍ dě Baa Nyɔsoa we̍. Ɔ̍ bo ɔ̀ nu̍-a Jusu Klai ɔ̀ slɛ̌-a i̍-ɛ.

² Dě Klai-a chɛ̀ slaǎ sà-ɛ di̍i̍ bo à gblɛ̍n sɔ̀ɛ̀n-a tìh tǎli-ɛ i̍. Ɛ̍ se̍ à nɛ due-a gblɛ̍n sɔ̀ɛ̀n-a tìh, jɛ kmɔ̌ kli̍hgbɛ̍-a gblɛ̍n sɔ̀ɛ̀n-a tìh bo ìh tǎli-ɛ i̍.

³ Pò à tè-o Nyɔsoa-a telě i̍-ɛ, nɛ̀ à juo-o dɛ̍ i̍ wɛ̀ ka à juo-a ɔ̍-ɛ.

⁴ Nɛ̀ pò nyɔ̍ la̍ ɔ̍ juo Nyɔsoa wɛ̀ ɔ̍ se̍-o ɔ̍ telě i̍ tè-ɛ, nɛ̀ nyɔ̍ kaɛn laa̍ si̍h nyɔ̍ bo, iě tìh-a taǐn se̍ dě ɔ̍ ja̍a̍ nɛ.

⁵ Jɛ nyɔ̍ ɔ̀ nu̍-a ɔ̍ wlu̍-ɛ, nɛ̀ ɔ̍-ɔ bo ɔ̀ kɔn Nyɔsoa-a jbɛɛ-ɛ wɛ̀ gblɛ̍ja̍i̍ wɛ̀. Pò ɛ̍ nɛ ka-ɛ, nɛ̀ à juo-o dɛ̍ i̍ wɛ̀ ka à nɛ-a dě Nyɔsoa ja̍a̍-ɛ.

⁶ Nyɔ̍ ɔ̀ la̍ ɔ̀ nɛ-a dě Nyɔsoa ja̍a̍-ɛ, nɛ̀ ɔ̍ kɔn ɔ̍ iě Jusu Klai-a dɛ̍ na.

Ɛ̀ la bo ɛ̀ nu̍ telě delee

⁷ Ǎn tìh kma nyɔ̍, telě la ɛ̀ kɔn tìh ǎn chlǐh-a mɔ̀ we̍-ɛ, ɛ̍ se̍ telě delee. Dɛ̍ soa bo, mɔ̀ wɔ̌n ɛ̍-ɛ se̍e̍ sɔ dě tɔ̀blɔ̍ɔ̍. Telě soa la, ɛ̍ bo ɛ̀ nu̍ wlu̍ mɔ̀ wɔ̌n-a se̍e̍-ɛ.

⁸ Jɛ telě delee bo ǎn chlǐh la̍ mɔ̀ we̍ ɛ̀ mɔ̀ ke Klai to-a ka ɛ̍ nu̍-a gblangbai̍-ɛ. Dɛ̍nu̍ɛ, kwile-a sì la̍-ɛ, iě sɔ̀npli-a gblangbai̍-a fa̍n la̍.

⁹ Nyɔ̍ jɔ ɔ̀ la̍ ɔ̀ nɛ-a dě sɔ̀npli di̍i̍ wɛ̀ ɔ̀ faɛn-a ɔ̍ de̍di̍i̍-ɛ, nɛ̀ ɔ̍ nɛ dě kwile-e ke̍.

¹⁰ Nyɔ̍ ɔ̀ jbɛɛ-a ɔ̍ de̍di̍i̍-ɛ, nɛ̀ ɔ̍-ɔ bo ɔ̀ nɛ dě sɔ̀npli di̍i̍. Nɛ̀ dɛ̍ ɛ̀ iě-a ɔ̍ blu̍ja̍a̍ po̍ dɛ-ɛ, ɛ̍ se̍ nɛ.

¹¹ Jɛ nyɔ̍ ɔ̀ faɛn-a ɔ̍ de̍di̍i̍-ɛ, nɛ̀ ɔ̍ nɛ dě kwile-e, iě ɔ̍ na-ɛ dě kwile-e. Nɛ̀ ɔ̍ se̍ ɔ̍ chɛ̀-a mu̍-i la̍ juo, dɛ̍nu̍ɛ, kwile gbe-e dě ɔ̍ jlǐh.

¹² Ǎn nynuu̍, ǎn chlǐh mɔ̀ we̍, dɛ̍nu̍ɛ, mɔ̀-a gblɛ̍n sɔ̀ɛ̀n-a tìh tǎli-ɛ i̍ Klai-a tìh.

¹³ Baaᵻ, ǎn chlǐh mɔ̀ we̍, dɛ̍nu̍ɛ, mɔ̀ juo nyɔ̍ ɔ̀ sɔ-a dě tɔ̀blɔ̍ɔ̍-ɛ. Nynuu̍gbèè, ǎn chlǐh mɔ̀ we̍, dɛ̍nu̍ɛ, mɔ̀ sà Nyɔ̍ Sɔ̀n klà wɛ̀.

¹⁴ Ǎn nynuu̍, ǎn chlǐh mɔ̀ we̍, dɛ̍nu̍ɛ, mɔ̀ juo Baa Nyɔsoa. Baaᵻ, ǎn chlǐh mɔ̀ we̍, dɛ̍nu̍ɛ, mɔ̀ juo nyɔ̍ ɔ̀ sɔ-a dě tɔ̀blɔ̍ɔ̍-ɛ. Nynuu̍gbèè, ǎn chlǐh mɔ̀ we̍, dɛ̍nu̍ɛ, mɔ̀ kmu i̍ wɛ̀ Nyɔsoa-a wlu̍ nɛ dě mɔ̀ ja̍a̍, iě mɔ̀ sà Nyɔ̍ Sɔ̀n klà wɛ̀.

¹⁵ Bɔ̌ kmɔ̌ la-a jbɛɛ-ɛ, ɛ̍ ke dɛ̍-o-dɛ̍ nɛ-a nɔ̌ ɛ̍ we̍-ɛ ke. Nyɔ̍ jɔ jbɛɛ-a kmɔ̌ la-aɛ, nɛ̀ ɔ̍ se̍ Baa Nyɔsoa-a jbɛɛ.

¹⁶ Dɛ̍ᵻ kli̍hgbɛ̍ ìh nɛ-a nɔ̌ kmɔ̌ la we̍-ɛ, ìh nu̍-a nyɔ̍-a chɛ̀-a wlùh dɛ̍ᵻ ke, jlǐh-a nɛ̀ sì dɛ̍ i̍ ke kɔn-dɛ̍ᵻ i̍ blɔ̌-ɛ ke, i̍h se̍ dě Baa Nyɔsoa we̍ sɔ. I̍h sɔ nɔ̌ kmɔ̌ la we̍.

¹⁷ Kmɔ̌ la ke ɛ̍ dɛ̍ᵻ ìh nu̍-a nyɔ̍-a wlùh dɛ̍ᵻɛ́, i̍h-a sì la̍ i̍. Jɛ nyɔ̍ ɔ̀ nu̍-a Nyɔsoa-a wlùh-ɛ, nɛ̀ ɔ̍ mu̍ kmɔ̌ nɛ nɔ̌ kmɔ̌-a kmɔ̌.

Klai-a Nyɛ̌-nyɔ̍ ji̍ wɛ̀

¹⁸ Ǎn nynuu̍, ti̍-a dlǔ i̍ chlà-a kɔǎn we̍ wɛ̀. Mɔ̀ wɔ̌n i̍h se̍e̍ ka Klai-a Nyɛ̌-nyɔ̍-a mu̍-a ji̍-ɛ. Kaka la̍ u̍h-a dɔu ji̍ wɛ̀. Ɛ̍-ɛ bo à juo i̍ ka ti̍-a chlà-a la̍ dlǔ i̍-ɛ.

¹⁹ Nyɔ̍ laa̍ u̍h se̍ nɔ̌ àɔ̀ we̍ kɔn, ɛ̍ kɔn u̍h tǎli àɔ̀ i̍. Pò u̍h kɔn nɔ̌ àɔ̀ we̍ de-ɛ, nɛ̀ u̍h-a mu̍ nɔ̌ àɔ̀ we̍ nɛ de. Jɛ u̍h-a mu̍-ɛ bo ɛ̀ flɔn-ɛ ɛ̍ we̍i̍ ka u̍h se̍-a nɔ̌ àɔ̀ we̍ kɔn-ɛ.

²⁰ Jɛ mɔ̀ɔ̍ nɔ̀ɔ̍, Klai nyǐ mɔ̀ Nyɔsoa-a Sùù wɛ̀, iě mɔ̀ kli̍hgbɛ̍ mɔ̀ juo tìh-a taǐn.

²¹ Chlǐh-ɛ ǎn chlǐh-a mɔ̀ we̍-ɛ, ɛ̍ se̍ nɛ̀ mɔ̀ se̍ tìh-a taǐn juo kai. Jɛ mɔ̀-a ɛ̍ juo-o tìh bo ǎn chlǐh mɔ̀ we̍. Wɛ̀ mɔ̀ juo ɛ̍ ke ka si̍h-i sɔ-a dě tìh-a taǐn di̍i̍-ɛ.

²² Nyɔ̍ bo ɔ̀ nu̍ ka si̍h nyɔ̍ ɛ? Nyɔ̍ ɔ̀ la̍ Jusu se̍-a Nyɔsoa-a Chèɛ̀ Tba̍ju-ɛ, ɔ̍-ɔ bo ɔ̀ tmɔ̌ si̍h. Nyɔ̍ kaɛn laa̍ nɛ̀ Klai-a Nyɛ̌-nyɔ̍ bo. Nɛ̀ ɔ̍ tba̍ Baa Nyɔsoa ke ɔ̍ Jǔ chla dɛbo.

²³ Nyɔ̍ jɔ tba̍-a Jǔ chla-ɛ, nɛ̀ ɔ̍ tba̍ Baa chla. Jɛ nyɔ̍ ɔ̀ wɔ̌ɛn-a Jǔ-a tìh i̍-ɛ, nɛ̀ ɔ̍ wɔ̌ɛn Baa-a tìh i̍ wɛ̀ ke.

²⁴ Dɛ̍ mɔ̀ wɔ̌n-a sɔ dě tɔ̀blɔ̍ɔ̍-ɛ, ɛ̍ bo ɛ̀ iě dě mɔ̀ ja̍a̍ nɛ. Dɛ̍ mɔ̀ wɔ̌n-a sɔ dě tɔ̀blɔ̍ɔ̍-ɛ, pò ɛ̍ nɛ dě mɔ̀ ja̍a̍-ɛ, nɛ̀ mɔ̀ nɛ dě Jǔ ke Baa ja̍a̍ wɛ̀.

²⁵ Kmɔ̌ sie feɛ-a wlu̍ bo Klai po̍ tɔ̀ma̍a̍ dǒ à we̍.

²⁶ Ǎn chlǐh mɔ̀ ìh la we̍ dǒ ùh la ùh-a pɔ̀n-a mɔ̀ i̍ boe-ɛ i̍-ɛ u̍h-a dɛ we̍.

²⁷ Klai nyǐ mɔ̀ Nyɔsoa-a Sùù, iě ɛ̍ nɛ dě mɔ̀ ja̍a̍. Mɔ̀ se̍ nyɔ̍-o-nyɔ̍ jbǎ dɛ u̍h iě mɔ̀ nǎ po̍. Dɛ̍nu̍ɛ, Nyɔsoa-a Sùù po̍ mɔ̀ nǎ wɛ̀ dǒ dɛ̍ᵻ kli̍hgbɛ̍ we̍. Dɛ̍ ɛ̍ poe-a mɔ̀ nǎ-ɛ, tìh-a taǐn bo, ɛ̍ se̍ si̍h. Ɛ̍ tìh-ɛ, ka Nyɔsoa-a Sùù nu̍-a mɔ̀ nǎ po̍-ɛɛ, kǎ mɔ̀ iě dě Klai ja̍a̍ nɛ-ɛ nu̍.

²⁸ Nɛ̀ɛ̍, ǎn nynuu̍, mɔ̀ nɛ dě ɔ̍ ja̍a̍, wɛ̀ ti̍ ɔ̍ mu̍-a à kɛ̍n wlǔh-iɛ, wɛ̀ à iě faɔn wɛ̀. Iě tɛ̀n-ɛ je̍e à nu̍, wɛ̀ à-a je̍e sìle dǒ ɔ̍ ji̍ la̍-a.

²⁹ Pò mɔ̀ juo ɛ̍ ka Klai slɛ̌-a i̍-ɛ, nɛ̀ mɔ̀ juo ɛ̍ ke la̍ sǔh ka nyɔ̍ jɔ ɔ̀ nu̍-a i̍ slɛ̌-dɛ̍-ɛ, nɛ̀ ɔ̍ nu̍-a Nyɔsoa-a jǔ wɛ̀-ɛ.