1 Chɔɔn 1 - Ku̍o̍ Delee 1999

Wlu̍ ɛ̀ nyǐ-a nyɔ̍ feɛ-ɛ la

¹ Nyɔ̍ ɔ̀ kɔn tìh à chlǐh-a mɔ̀ we̍-ɛ, ɔ̍-ɔ bo ɔ̀ kɔn nynɛ̌ nu̍ Wlu̍ ɔ̀ nyǐ-a nyɔ̍ feɛ-ɛ. Sɔ dě tɔ̀blɔ̍ɔ̍-ɛ, nɛ̀ ɔ̍ nɛ kmɔ̌ wɛ̀ se̍e̍. À wɔ̌n ɔ̍ wlu̍ iě à chɛ̀ tba̍ ɔ̍ jlǐhɛ̍. À gbɛ̀n ɔ̍ ja̍ iě à tǔh i̍ ɔ̍ sɔ̍n i̍.

² Feɛ laa̍ bo ɛ̀ wlǔh tà iě à jě ɛ̍, wɛ̀ à nu̍ ɛ̍ sàànsi̍i̍h iě à sèàɛ̍ mɔ̀ wlùh ɛ̍ tìh. Kmɔ̌ sie feɛ ɛ̀ nɛ-a dě Baa Nyɔsoa we̍-ɛ, ɛ̍-ɛ bo ɛ̀ wlǔh tà dǒ àɔ̀ we̍.

³ Dɛ̍ kɔn tìh à wɔ̌n-a iě à tba̍-a jlǐhɛ̍-ɛ, ɛ̍ bo à sèàɛ̍ mɔ̀ wlùh ke. Wɛ̀ mɔ̀ iě à kɛ̍n gbǎ iě à ke Baa Nyɔsoa ke ɔ̍ Jǔ Jusu Klai iě we̍ nɛ̍aɛ.

⁴ À chlǐh ìh la wɛ̀ à nmɔ-ɛ iě kwlǎ wɛ̀.

Nyɔsoa bo ɔ̀ nu̍ sɔ̀npli

⁵ Tu̍owli à wɔ̌n-a dě ɔ̍ Jǔ wɔ̍ɔ̍n wɛ̀ à bla̍-a dě mɔ̀ we̍-ɛ, ɛ̍ nu̍, Nyɔsoa bo ɔ̀ nu̍ sɔ̀npli. Kwile se̍ dě ɔ̍ ja̍a̍ nɛ fu̍u̍.

⁶ Pò à la̍ ɔ̍ ke à nɛ̍aɛ la̍ we̍ wɛ̀ à iě dě kwile-e na-ɛ ke̍ ma̍u̍-ɛ, nɛ̀ à tmɔ̌ si̍h, iě à-a jě tìh-a taǐn dɛ̍ɛ̍.

⁷ Jɛ ka ɔ̍ nu̍-a dě sɔ̀npli di̍i̍ nɛ-ɛ, pò à nu̍ la̍a̍n dě sɔ̀npli di̍i̍ nɛ-ɛ ke-ɛ, nɛ̀ ɔ̍ ke à nɛ̍aɛ la̍ we̍. Nɛ̀ ɔ̍ Jǔ Jusu Klai-a nymɔ̍-a wɔ̍lɔ à gblɛ̍n sɔ̀ɛ̀n kli̍hgbɛ̍ pihpǐh.

⁸ Pò à la̍ à-a nu̍ gblɛ̍n sɔ̀ɛ̀n-ɛ, nɛ̀ à boe à chɛ̀ i̍. Nɛ̀ tìh-a taǐn se̍ dě à ja̍a̍ nɛ.

⁹ Jɛ pò à sà à gblɛ̍n sɔ̀ɛ̀n gbɔ̀ i̍ dě Nyɔsoa ɔ̀-ɔ gblìh-a wlu̍ kɛ̍n iě ɔ̀ slɛ̌-a i̍-ɛ we̍-ɛ, nɛ̀ ɔ̍ mu̍ à gblɛ̍n sɔ̀ɛ̀n-a tìh i̍ tǎli, wɛ̀ ɔ̍ iě à se̍ i̍ slɛ̌ gblɛ̍n kli̍hgbɛ̍ wɔ̍lɔ pihpǐh.

¹⁰ Pò à la̍ à-a se̍a gblɛ̍n sɔ̀ɛ̀n nu̍-ɛ, nɛ̀ Nyɔsoa bo à jě si̍h-i, iě ɔ̍ wlu̍ se̍ dǒ à wlùh kɛ̍n nɛ.