1 Kɔwlɛntiɔn 9 - Ku̍o̍ Delee 1999

Pɔɔ-a Klai-a gba̍tòà nu̍ dɛ bo ɔ̍ sèàɛ̍ we̍ i̍

¹ Ka ǐn flɔn-a de̍e̍ i̍, iě ǐn nu̍-a Klai-a gba̍tòà-ɛ mɔ̀ se̍ i̍h juo ae? Àe̍e̍ à Joi Jusu bo nɛ̌ se̍-a jě ae? Nɛ̀ ɛ̍ se̍ ǎn dbo̍ ɛ̀ se̍ mɔ̀ ka nɛ-ɛ dǒ Joi we̍ ae?

² Pò nyɔ̍ duuh se̍ ǎn Klai-a gba̍tòà tìh i̍ wɔ̌ɛn-ɛ, mɔ̀ɔ̍ bo ùh wɔ̌ɛn ɛ̍-ɛ. Dɛ̍nu̍ɛ, mɔ̀ɔ̍ bo ùh sì dě ǐn de̍e̍ i̍ iě mɔ̀ to ɛ̍ ka ǐn nu̍-a Joi-a gba̍tòà-ɛ.

³ Pò nyɔ̍ ja ǐn fɔ̌ sɔ̀n we̍ i̍ tè-eɛ, nɛ̀ kǎ ǎn nu̍ ka ɔ̍ wlu̍ pɔ̀n we̍ sà-a.

⁴ Nɛ̀ na̍ à se̍ i̍ blaɛ à iě niɛ̍ nǎ dě dbo̍ la di̍i̍ ae?

⁵ Nɛ̀ à se̍ i̍ blaɛ à iě Nyɔsoa nynɔ̌gbaɔᵻ blě wɛ̀ à iě u̍h wìèlè gba̍ ae? Ɛ̍ kɔn blaiɛ̍ bo Klai-a gba̍tòà duuh ke Joi de̍di̍i̍ᵻ ke Pitɛ-a nu̍.

⁶ Àe̍e̍ ǐn ke Banaba ke à nɛ due bo à kɔn à iě dbo̍ nu̍ dǒ à kmɔ̌ nɛ-ɛ we̍ ae?

⁷ Nyɔ̍we̍ bo ɔ̀ nu̍ fledlǔ wɛ̀ ɔ̀ pùhbɔ ɔ̍ chɛ̀ kɛ̍ɛ̍n wɛ̀ sàì ɛ? Klè joi jɔwe̍ bo ɔ̀-ɔ di̍ ɔ̍ chɛ̀-a klè-a tù-dɛ̍ᵻ ɛ? Nyɔ̍we̍ bo ɔ̀ blě nɛadɛᵻ wɛ̀ ɔ̀ se̍ i̍h-a nyɛnɛ nǐ nǎ ɛ?

⁸ Ìh la ǎn bla̍-aɛ, kmɔ̌ nyɔ̍-a flɔ̍nwlùh bo gbɛɛ, jɛ kǎ telě dǎ ke.

⁹ Kǎ ɛ̍ nu̍ ka chlǐh-ɛ dě Mose-a telě di̍i̍, ɛ̍ la̍a̍, “Pò bli ja dɛ̍ i̍ bla̍-ɛ, nɛ̀ ìn bɔ̌ ɛ̍ gbǎn wɔ̍i̍n po̍-ɛ.” Ìn jajeɛ̍ bli tìh bo Nyɔsoa kma ae?

¹⁰ Ɛ̀ ɔ̍ bla̍-aɛ, ɛ̍ se̍ à tìh ɔ̍ se̍ ɛ̍ bla̍ ae? À tìh bo ɛ̍ chlǐh-ɛ. Dɛ̍nu̍ɛ, nyɔ̍ ɔ̀ po̍-a klèwa̍-ɛ ke ɔ̀ bla̍-a dɛ̍ i̍-ɛ u̍h tè ɛ̍ wlì u̍h iě-o di̍-dɛ̍ jě-e.

¹¹ À tù Nyɔsoa-a dɛ̍ᵻ jɔ̌ dě mɔ̀ nynɛ̌. Nɛ̀ pò à ja mɔ̀ dɛ̍ kwa̍a̍ i̍ pɔ̀n-ɛɛ, nɛ̀ ɛ̍ se̍ dě mɔ̀ di̍i̍ i̍ sǐi ae?

¹² Pò ɛ̍ blaɛ i̍ nyɔ̍ duuh iě mɔ̀ dɛ̍ kwa̍a̍ jě-ɛ, nɛ̀ àɔ̀ bo à se̍-o sìì mu̍ ae? À blaɛ i̍ de, jɛ à gbɛ̍n-ɛ ɛ̍ plǔh sɔ̀nᵻ i̍. Iě à ku̍-e klì i̍ dǒ dɛ̍ᵻ kli̍hgbɛ̍ we̍, wɛ̀ à-a je̍e pɔ̀n chɛ̀ ɛ̀ kɔ̍-a dǒ Klai pùn i̍-ɛ bu̍h i̍ tba̍.

¹³ Nyɔ̍ ùh-a nui-a dě Nyɔsoa-a slaǎ sà gbò sɔ̀n dbo̍-ɛ, dě-e bo u̍h-a jě-e di̍-dɛ̍, iě ùh-a sà-a slaǎ dǒ gblǒ kɛ̍n-ɛ, u̍h-a jě-o dɛ̍. Mɔ̀ se̍ i̍h juo ae?

¹⁴ Kǎ ɛ̍ nɛ ke, nyɔ̍ ùh-a bla̍-a pɔ̀n chɛ̀-ɛ, Joi la̍ ɛ̍-ɛ bo u̍h iě dɛ̍ i̍ di̍-i.

¹⁵ Jih ǐn blaɛ-a i̍ de iě-a nu̍-ɛ, nɛ̌ se̍a i̍h-a dɛ̍ nu̍. Ǐn se̍ mɔ̀ chlǐh-dɛ̍ la we̍ chlǐh mɔ̀ iě i̍h-a dɛ̍-o-dɛ̍ nu̍ dǒ ǐn we̍. Ɛ̍ nmɔ jii̍ iě mɛ̌ duedɛ ɛ̍ sìì dɛ̍ mu̍-a ǐn bu̍hᵻ wlù i̍ poe-ɛ, wɛ̀ nyɔ̍ dɔɔ iě ɛ̍ ǐn kwa̍a̍ sà.

¹⁶ Ǐn se̍ i̍ blaɛ iě bu̍hᵻ wlù i̍ po̍ ǎn pɔ̀n chɛ̀ bla̍ tìh, dɛ̍nu̍ɛ, ǐn kɔn iě ɛ̍ nu̍. Pò ǐn se̍ pɔ̀n chɛ̀ bla̍-ɛ, nɛ̀ chlě dǒ ǐn we̍.

¹⁷ Pò ǐn ja dbo̍ la nu̍ dǒ ǎn chɛ̀ blǐ paǐ-ɛ, nɛ̀ ǎn mu̍ pɛ̌ɛ la jě tìh gbàɛ̀. Jɛ pò ǐn se̍ ɛ̍ dǒ ǐn blǐ paǐ sà-ɛ, nɛ̀ ɛ̍ tèè ǐn kwa̍ iě ɛ̍ nu̍ dɛbo.

¹⁸ Nɛ̀ɛ̍, dɛ̍ɛ pɛ̌ɛ la ǎn mu̍ ka jě ɛ? Ɛ̀ ǎn mu̍-a jě-ɛ, ɛ̍ nu̍ iě pɔ̀n chɛ̀ la bla̍ bu̍ɛ̍i̍, dɛ̍nu̍ɛ, dɛ̍ᵻ pɔ̀n chɛ̀ bla̍ nyɔ̍ blaɛ-a i̍ u̍h iě-a jě-ɛ, i̍h-i bo nɛ̌ gbɛ̍n i̍ kli̍hgbɛ̍.

Pɔɔ-a pɔ̀n nyɔ̍ kli̍hgbɛ̍ iě Klai wlùh gbaɛ

¹⁹ Ǐn flɔn de̍e̍ i̍, nyɔ̍ se̍ ǐn wlu̍ i̍ kɔn. Jɛ ǐn nu̍ ǎn chɛ̀ nyɔ̍ kli̍hgbɛ̍-a kèi̍ we̍i̍, wɛ̀ ɛ̍ iě kmɔ̌ nɛ iě nyɔ̍ dɔu-a wlùh fèàɛ̀ dě Klai we̍.

²⁰ Pò ǐn jɛɛ Juu nyɔ̍-ɛ, nɛ̀ ǐn nu̍ ǎn chɛ̀ Juu jǔ we̍i̍, wɛ̀ ɛ̍ iě kmɔ̌ nɛ iě u̍h-a wlùh fèàɛ̀ dě Klai we̍. Pò ǐn jɛɛ nyɔ̍ ùh nɛ-a dǒ telě sɔ̀n-ɛ, nɛ̀ ǐn nu̍ ǎn chɛ̀ dǒ telě sɔ̀n nɛ nyɔ̍ we̍i̍. Telě se̍ ǐn wlu̍ i̍ kɔn gbɛɛ, jɛ ǎn nu̍ ɛ̍-ɛ, wɛ̀ ɛ̍ iě kmɔ̌ nɛ iě u̍h-a wlùh fèàɛ̀ dě Klai we̍.

²¹ Pò ǐn jɛɛ nyɔ̍ ùh se̍-a dǒ telě sɔ̀n nɛ-ɛ, nɛ̀ ǐn nu̍ ǎn chɛ̀ se̍ dǒ telě sɔ̀n nɛ nyɔ̍ we̍i̍, wɛ̀ ɛ̍ iě kmɔ̌ nɛ iě u̍h-a wlùh fèàɛ̀ dě Klai we̍. Jɛ ɛ̍ se̍ nɛ ǐn se̍ dǒ Nyɔsoa-a telě sɔ̀n nɛ kai, ǐn nɛ dǒ Klai-a telě sɔ̀n kleǐn.

²² Pò ǐn jɛɛ gbǐh-a mɛ̌-nyɔ̍-ɛ, nɛ̀ ǐn nu̍ ǎn chɛ̀ gbǐh-a mɛ̌-nyɔ̍ we̍i̍. Wɛ̀ ɛ̍ iě kmɔ̌ nɛ u̍h-a wlùh iě fèàɛ̀ dě Klai we̍. Ǎn nu̍ dɛ̍ᵻ kli̍hgbɛ̍ ǐn kɔn iě-a nu̍-ɛ, wɛ̀ ɛ̍ iě kmɔ̌ nɛ iě nyɔ̍ duuh pǔh-i gbɔ̀gbɔ̀.

²³ Pɔ̀n chɛ̀-a tìh bo ǎn nu̍ ìh kli̍hgbɛ̍ la, wɛ̀ pɔ̀ìě ɛ̍ mu̍-a ja-ɛ, iě-o dɛ̍ jě.

²⁴ Mɔ̀ se̍ i̍h juo ka nyɔ̍ ùh-a bla̍-ɛa dlǔᵻ wɔ̍i̍n dǒ ple̍ la̍-ɛ, u̍h-a nyɔ̍ due gbài̍ bo ɔ̀ gba̍-a nyǐ-dɛ̍-ɛ ae? Ɛ̍ tìh-ɛ, ple̍, wɛ̀ ìè ɛ̍ gba̍.

²⁵ Nyɔ̍ kli̍hgbɛ̍ ùh-a mu̍-a dlǔᵻ wɔ̍i̍n bla̍-ɛ, slɛ̌-a taǐn kli̍hgbɛ̍ bo u̍h-a nu̍. Blawɛ̌ jɛ mu̍-a jii̍ nyni-ɛ, ɛ̍ kɔn tìh bo u̍h-a nu̍ ìh la. Jɛ àɔ̀ nɔ̀ɔ̍-ɛ, à nu̍ ɛ̍-ɛ wɛ̀ à iě ɛ̀ se̍-a jii̍ nyni la kɔn-ɛ jě.

²⁶ Ɛ̍ kɔn tìh ǎn tù ple̍-ɛ jlǐhɛ̍, wɛ̀ iě wlɔ̀ nyni̍ nɛ̌ se̍-e dɛ̍ gba̍. Ɛ̍ kɔn ǐn wɔ̀ fɔ̀n-nyɔ̍ ɔ̀-ɔ gblà-a nyɔ̍ gbuna-ɛ.

²⁷ Wɛ̀ ǎn nu̍ ǎn ku̍ la kà i̍, wɛ̀ iě ɛ̍ wlu̍ kɛ̍ɛ̍n kɔn, wɛ̀ pò ǐn wɔ̀ tìh bla̍-a dě nyɔ̍ duuh we̍-ɛ, wɛ̀ nɛ̌ se̍-e nyɔ̍ nynɛ̌ gbǎ ka̍ nɛ.