1 Kɔwlɛntiɔn 7 - Ku̍o̍ Delee 1999

Pɔɔ po̍ nyɔ̍ nǎ dǒ Nyɔsoa nyɔ̍-a nynɔ̌ blě dɛ we̍

¹ Nɛ̀ɛ̍, dɛ̍ kɔn tìh mɔ̀ chlǐh-a ǐn we̍-ɛ, ǎn mu̍ ɛ̍ pɔ̀n we̍ sà. Pò jɔ̍gbau se̍ nynɔ̌ blě-ɛ, nɛ̀ ɛ̍ mu̍ jii̍ nmɔ.

² Jɛ gbǎn nu̍-ɛ tìè i̍. Ɛ̍ tìh jɔ̍gbau jɔ-ɛ, nɛ̀ ɔ̍ blě ɔ̍ chɛ̀-a nynɔ̌. Nɛ̀ nynɔ̌ jɔ-ɛ, ɔ̍ blě ɔ̍ chɛ̀-a kɔan ke.

³ Jɔ̍gbau kɔn ɔ̍ iě ɔ̍ nynɔ̌-a wlùh nu̍, nɛ̀ kǎ nynɔ̌ iě ɔ̍ kɔan-a tìh nu̍ ke.

⁴ Nynɔ̌ se̍ ɔ̍ chɛ̀-a ku̍ wlu̍ kɛ̍ɛ̍n kɔn, jɛ ɔ̍ kɔan bo ɔ̀ kɔn ɛ̍ wlu̍ i̍. Kǎ ɛ̍ nɛ ke, kɔan se̍ ɔ̍ chɛ̀-a ku̍ wlu̍ kɛ̍ɛ̍n kɔn ke, ɔ̍ nynɔ̌ bo ɔ̀ kɔn ɛ̍ wlu̍ i̍.

⁵ Mɔ̀ bɔ̌ mɔ̀-a chɛ̀ kǎn i̍ po̍-ɛ, jɛ pò mɔ̀ dbǎ wlu̍ i̍ dǒ ti̍ di̍i̍ mɔ̀ iě ba̍le-ɛ, nɛ̀ ǐn sà-o ɛ̍ tɛ̀. Jɛ nɛ̀ nynɔ̌ ke ɔ̍ kɔan gbǎ tàdùè suei̍ wɛ̀ u̍h-u se̍-e wlùh ku̍, iě Setɔn je̍e ɛ̍-ɛ jii ɛ̍-ɛ je̍e u̍h blu̍ja̍a̍ po̍.

⁶ Ǐn se̍ mɔ̀ kɛɛn nɛ̌ mɔ̀ iě ɛ̍ nu̍, jɛ naɛ flɔ̍nwlùh bo.

⁷ Pò nyɔ̍ kli̍hgbɛ̍ wɔ̀ m u̍h se̍ gbò tǐn de-ɛ, nɛ̀ ɛ̍ mu̍ ǐn gbǐh po̍. Jɛ jɔ-ɛ nɛ̀ ɔ̍ blě ɔ̍ chɛ̀-a nyǐ-dɛ̍ ɛ̀ sɔ-a dě Nyɔsoa we̍-ɛ. Jɔ-ɛ nɛ̀ ɔ̍ naɛ nɛ-o dɔɔ̌.

⁸ Na̍a̍, nyɔ̍ ùh se̍-a gbò tǐn-ɛ ke tèwànynɔ̌gbaɔᵻ, ka ǐn nɛ-a ǐn se̍-a gbò tǐn-ɛ, ɛ̍ mu̍ jii̍ nmɔ mɔ̀ iě laǎn nɛ ke.

⁹ Jɛ pò mɔ̀ se̍ mɔ̀-a chɛ̀ i̍ gbɛ̍n-ɛ bɛ̌ɛ-ɛ, nɛ̀ mɔ̀ tǐn gbò. Ɛ̍ mu̍ jii̍ nmɔ mɔ̀ iě gbò tǐn, ɛ̍ sìì mɔ̀-a wlùh si̍n jɔ̍gbau àe̍e̍ nynɔ̌ blě tìh.

¹⁰ Nyɔ̍ ùh tǐn-ia blǐ-ɛ, ǐn blě telě dǒ u̍h we̍. Ɛ̍ se̍ nɔ̌ ǐn we̍ sɔ, dě Joi we̍ bo ɛ̍ sɔ-ɛ. Nynɔ̌ se̍ kɔn ɔ̍ iě ɔ̍ kɔan i̍ tǎli,

¹¹ jɛ pò ɔ̍ tǎli ɔ̍ i̍-ɛ, nɛ̀ ɔ̍ bɔ̌ jla̍ tǐn-ɛ dɛ. Pò ɛ̍ se̍ la̍a̍n nɛ-ɛ, nɛ̀ ɔ̍ mu̍ ɔ̍ kɔan we̍ dode̍. Jɔ̍gbau se̍ kɔn ɔ̍ iě ɔ̍ nynɔ̌ kwlǎ sà.

¹² Mɔ̀ɔ̍ juh sie-a dǒ de̍-ɛ, ǐn blě dɛ̍ iě bla̍ dě mɔ̀ we̍. Ɛ̍ se̍ dě Joi we̍ sɔ. Ɛ̍ sɔ nɔ̌ ǎn chɛ̀ we̍. Na̍a̍, pò mɔ̀ de̍di̍i̍ jɔ̍gbau blě se̍ wlùh gbaɛ blě nynɔ̌ wɛ̀ ɔ̍ nynɔ̌-a chɛ̀ iě wɔ̌n ɔ̍ iě ɔ̍ kwa̍a̍ sie-ɛ, nɛ̀ ɔ̍ bɔ̌ ɔ̍ kwlǎ sà-a dɛ.

¹³ Nɛ̀ pò mɔ̀ de̍di̍i̍ nynɔ̌gbaɔ tǐn kɔan ɔ̀ se̍-a wlùh gbaɛ blě-ɛ blǐ-ɛ, wɛ̀ ɔ̍ kɔan-a chɛ̀ iě wɔ̌n ɔ̍ iě ɔ̍ kwa̍a̍ sie-ɛ, nɛ̀ ɔ̍ bɔ̌ ɔ̍ kɔan bɔ̌-ɛ dɛ.

¹⁴ Nɛ̀ɛ̍, kɔan ɔ̀ se̍-a wlùh gbaɛ blě-ɛ ɔ̍ nynɔ̌ bo ɔ̍ mu̍-u jii, wɛ̀ ɔ̍ iě dǒ Nyɔsoa we̍ kɔn. Nɛ̀ nynɔ̌ ɔ̀ se̍-a wlùh gbaɛ blě-ɛ ɔ̍ kɔan bo ɔ̍ mu̍-u jii ke, wɛ̀ ɔ̍ iě dǒ Nyɔsoa we̍ kɔn. Pò ɛ̍ se̍ la̍a̍n nɛ de-ɛ, nɛ̀ u̍h-a nynuu̍ se̍ nɛi̍ wɛ̀ mu̍ de dě Nyɔsoa jlǐh. Jɛ ka ɛ̍ nɛ-a ka-ɛ, nɛ̀ u̍h kɔn dǒ Nyɔsoa we̍ wɛ̀.

¹⁵ Jɛ jɔ se̍-a wlùh gbaɛ blě-ɛ ɔ̍ ja pɔ̀n ɔ̍ iě wlùh gbaɛ blě nyɔ̍ i̍ tǎli-ɛ, nɛ̀ ɔ̍ tǎli ɔ̍ i̍. Pò ɛ̍ nɛ ka-ɛ, nɛ̀ telě se̍ wlùh gbaɛ blě kɔan àe̍e̍ nynɔ̌ gbɛ̍n mu̍. Dɛ̍nu̍ɛ, Nyɔsoa dǎ àɔ̀ wɛ̀ à wlùh iě i̍ tè.

¹⁶ Nynɔ̌, nyɔ̍-se̍-juo ìn bɛ̌ɛ àn kɔan sèìe-ɛ. Kɔan, nyɔ̍-se̍-juo ìn bɛ̌ɛ àn nynɔ̌ sèìe-ɛ ke.

Ka ìn nɛ-a wɛ̀ Nyɔsoa dǎ-a m-ɛ, kǎ ìè sie

¹⁷ Kmɔ̌ kɔn di̍i̍ Joi Jusu po̍-a jɔ-ɛ, nɛ̀ dě ɔ̍ iě nɛ, ɛ̍ ke ka ɔ̍ nɛ-a wɛ̀ Nyɔsoa dǎ-a ɔ̍-ɛ ke. Ìh la bo ìh nu̍ ǎn telě ǎn poe nǎ dě chɔchi̍h nyɔ̍ kli̍hgbɛ̍ we̍.

¹⁸ Pò nyɔ̍-o-nyɔ̍ gbǎ plɔ̀n wɛ̀ Nyɔsoa iě ɔ̍ dǎ-ɛ, nɛ̀ ɔ̍ bɔ̌ ɔ̍ chɛ̀ plɔ̀n gbǎ dɛ-ɛ sà-a. Pò nyɔ̍-o-nyɔ̍ se̍ plɔ̀n gbǎ wɛ̀ Nyɔsoa iě ɔ̍ dǎ-ɛ, nɛ̀ ɔ̍ bɔ̌ plɔ̀n gbǎ-a dɛ.

¹⁹ Nyɔ̍ gbǎ plɔ̀n o, nyɔ̍ se̍ plɔ̀n gbǎ o, ɛ̍ tìh se̍ kma. Nyɔsoa-a telě i̍ tè tìh bo ɛ̀ kma.

²⁰ Ka jɔ nɛ-a wɛ̀ Nyɔsoa-a dǎ-a ɔ̍-ɛ, nɛ̀ kǎ ɔ̍ iě sie.

²¹ Nyɔsoa iě-a ìn dǎ-ɛ, nɛ̀ ìn nu̍ kèi̍ ae? Ɛ̍ bɔ̌ ìn sèò nui-ɛ, jɛ pò ìn blě flɔna̍ nɔ̀ɔ̍ ɛ̍ iě ìn kèi̍ dɛ-ɛ sà-ɛ, nɛ̀ ìn nu̍ ɛ̍.

²² Nyɔ̍ nu̍ kèi̍ wɛ̀ Joi iě ɔ̍ dǎ-ɛ, nɛ̀ ɔ̍ flɔn i̍ dǒ Joi nɔ̀ɔ̍ we̍. Kǎ ɛ̍ nɛ ke, pò nyɔ̍ flɔn i̍ wɛ̀ Klai iě ɔ̍ dǎ-ɛ, nɛ̀ ɔ̍-ɔ Klai-a kèi̍.

²³ Nyɔsoa po̍ mɔ̀-a pɛlǔh. Ɛ̍ tìh-ɛ, mɔ̀ bɔ̌ nyɔ̍-a kèi̍ᵻ nu̍-ɛ.

²⁴ Ǐn de̍di̍i̍ᵻ, ka nyɔ̍-o-nyɔ̍ nɛ-a wɛ̀ ɔ̍ iě-a dǎ-ɛɛ, nɛ̀ kǎ ɔ̍ iě sie dǒ Nyɔsoa we̍.

Pɔɔ po̍ nynɔ̌gbaɔᵻ ùh se̍-a jla̍ tǐn-ɛ ke tèwànynɔ̌gbaɔᵻ nǎ

²⁵ Nɛ̀ɛ̍, ɛ̀ tba̍-a dǒ se̍ jla̍ tǐn nyɔ̍ pùn i̍-ɛ, Joi se̍ ǐn telě nyǐ dǒ ɛ̍ dɛ we̍. Jɛ ǎn nyǐ ǎn chɛ̀-a flɔ̍nwlùh dǒ Joi-a ǎn wɔɛ jě-ɛ we̍, ɛ̍ bo ɛ̀ nu̍ ɛ̍ wɛ̀ mɔ̀ tè ǐn wlì.

²⁶ Mɔ̍ɔ-ɛ da̍a tìh jě-ɛ la di̍i̍ kaka-ɛ, ɛ̍ mu̍ jii̍ nmɔ-ɛ ka nyɔ̍ nɛ-aɛ, ɔ̍ iě laǎn sie.

²⁷ Ìn blě nynɔ̌ ae? Nɛ̀ ìn bɔ̌ ɔ̍ kwlǎ sà-a. Ìn se̍ nynɔ̌ blě ae? Nɛ̀ ìn bɔ̌ nynɔ̌ i̍ pɔ̀n-ɛ.

²⁸ Jɛ pò ìn blě nynɔ̌-ɛ, nɛ̀ ɛ̍ se̍ dɛ̍ sɔ̀n ìn se̍ nu̍. Pò jǔ nynɔ̌gbaɔ tǐn jla̍-ɛ, nɛ̀ ɛ̍ se̍ dɛ̍ sɔ̀n ɔ̍ se̍ nu̍. Jɛ nyɔ̍ ùh tǐn-a jla̍-ɛ, u̍h-a mu̍ jua̍i̍ sàɛ̀ nɔ̌ kmɔ̌ la we̍. Ɛ̍-ɛ bo ǎn pɔ̀n iě mɔ̀ wɔ̍i̍n sà.

²⁹ Ǐn de̍di̍i̍ᵻ, dɛ̍ ǎn sèàɛ̍-a mɔ̀ wlùh-ɛ, ɛ̍ nu̍ ti̍ sie-a dǒ à jǔ-ɛ, ɛ̍ se̍ dlǔ tɛn dɛ. Sɔ da̍a sèàn blǐ-ɛ, jɔ̍gbauᵻ ùh blě-a nynɔ̌gbaɔᵻɛ́, ka nyɔ̍ se̍ nynɔ̌ blě-ɛ bo u̍h iě-e nɛ.

³⁰ Nɛ̀ nyɔ̍ ùh-a fìn-aɛ, ka nyɔ̍ se̍ fìn-ɛ, nɛ̀ nyɔ̍ ùh-a nmɔ-aɛ, ka mɔna̍ se̍ nyɔ̍ nu̍-ɛ, nɛ̀ nyɔ̍ ùh-a tɛ̀n-a dɛ̍-ɛ, ka nyɔ̍ se̍ tɛ̀n-dɛ̍-a chɛ̀ kɔn-ɛ, kǎ u̍h iě nu̍.

³¹ Nɛ̀ nyɔ̍ ùh kɔn sɔ̍n sì-a da̍a kmɔ̌ we̍-ɛ, ka nyɔ̍ kɔn sɔ̍n se̍ sì-ɛ. Dɛ̍nu̍ɛ, kmɔ̌ la tu̍ ɛ̍ nɛ-ae di̍i̍ kaka-ɛ, ɛ̍ sì la̍ i̍.

³² Ǐn se̍ pɔ̀n sèò iě mɔ̀ nu̍. Jɔ̍gbau ɔ̀ se̍-a nynɔ̌ blě-ɛ, ɔ̍ wlùh-a nu̍ jàjà dǒ Joi-a dbo̍ we̍. Dɛ̍nu̍ɛ, ɔ̍ fɔ̀n dɛ̍ we̍ ɔ̍ iě dě Joi jlǐh i̍ nmɔ.

³³ Jɛ jɔ̍gbau ɔ̀ blě-a nynɔ̌-ɛ, ɔ̍ wlùh-a nu̍ jàjà ɔ̍ iě kmɔ̌ we̍ nu̍-dɛ̍ᵻ nu̍. Dɛ̍nu̍ɛ, ɔ̍ fɔ̀n dɛ̍ we̍ ɔ̍ iě dě ɔ̍ nynɔ̌ jlǐh i̍ nmɔ.

³⁴ Sɔ nɛ̀ wlùh sɔɔ̌n i̍ gbè-a nu̍ ɔ̍-ɛ. Nɛ̀ nynɔ̌gbaɔ àe̍e̍ jǔ nynɔ̌nyaa ɔ̀ se̍-a jla̍ tǐn-ɛ, ɔ̍ wlùh-a nu̍ jàjà dǒ Joi-a dbo̍ we̍. Dɛ̍nu̍ɛ, ɔ̍ pɔ̀n ɔ̍ ku̍ ke ɔ̍ wlùh iě pɔ̌ tè-eɛ dǒ Joi-a dbo̍ we̍. Jɛ nynɔ̌gbaɔ ɔ̀ tǐn-a jla̍-ɛ, ɔ̍ wlùh-a nu̍ jàjà dǒ kmɔ̌-a nu̍-dɛ̍ᵻ we̍. Dɛ̍nu̍ɛ, ɔ̍ fɔ̀n dɛ̍ we̍ ɔ̍ iě dě ɔ̍ kɔan jlǐh i̍ nmɔ.

³⁵ Ǎn bla̍ ìh la wɛ̀ i̍h iě-o mɔ̀ dɛ̍ po̍. Ǐn se̍ mɔ̀ telě i̍ po̍. Jɛ ǎn pɔ̀n mɔ̀ iě dɛ̍ ɛ̀ slɛ̌-a i̍-ɛ nu̍, wɛ̀ mɔ̀ iě-e Joi we̍ fòè kleǐnklein.

³⁶ Pò nyɔ̍ nu̍ dɛ̍ ɛ̍ se̍ i̍ slɛ̌ dǒ ɔ̍ sɛ̌ dlǔ tù nynɔ̌ pùn iě ɔ̍ wlùh se̍ nynɔ̌ laa̍ we̍ i̍ wɛ̀-ɛ, nɛ̀ ɔ̍ nu̍ dɛ̍ ɛ̀ po̍-a ɔ̍ gbǐh-ɛ. Nɛ̀ u̍h tǐn i̍ blǐ. Kǎ ɛ̍ kɔn ɛ̍ iě nɛ-ɛ nu̍, dɛ̍ sɔ̀n se̍ ɛ̍ di̍i̍ nɛ.

³⁷ Jɛ pò jɔ̍gbau po̍ tìh gbɔ̀ dǒ ɔ̍ wlùh kɛ̍n, wɛ̀ nyɔ̍ se̍ ɔ̍ kloǒ nu̍ iě ɔ̍ la̍ ɔ̍ se̍ nynɔ̌ blě mu̍-ɛ, pò ɔ̍ bɛ̌ɛ wlùh i̍ gbɛ̍n-ɛ wɛ̀ ɛ̍ iě dě ɔ̍ di̍i̍ i̍ sǐi-ɛ, nɛ̀ ɛ̍ nmɔ jii̍. Nɛ̀ ɔ̍ bɔ̌ nynɔ̌ blě-ɛ.

³⁸ Ɛ̍ tìh-ɛ, nyɔ̍ ɔ̀ blě-a nynɔ̌-ɛ, ɔ̍ nu̍ dɛ̍ chɛ̀, jɛ nyɔ̍ ɔ̀ se̍-a nynɔ̌ blě-ɛ, ɔ̍ nu̍ dɛ̍ chɛ̀ ɛ̍ sìì ɔ̀ blě-a nynɔ̌-ɛ.

³⁹ Pò nynɔ̌-a kɔan tè kmɔ̌ i̍-ɛ, nɛ̀ ɔ̍ se̍ i̍ flɔn. Jɛ pò ɔ̍ kɔan mɛ̌-ɛ, nɛ̀ ɔ̍ flɔn i̍ ɔ̍ iě nyɔ̍-o-nyɔ̍ ɔ̍ pɔ̀n-aɛ dǔ. Jɛ nɛ̀ ɔ̍ tǐn Nyɔsoa nyɔ̍ blǐ.

⁴⁰ Mɔ̍ɔ, ɛ̍ tù ǎn tìh-ɛ, kǎ ɔ̍ iě sie, nɛ̀ ɔ̍ mu̍ mɔna̍-a gbǎ kaa̍. Nyɔ̍-se̍-juo ǐn blě Nyɔsoa-a Sùù.