1 Kɔwlɛntiɔn 5 - Ku̍o̍ Delee 1999

Ka chɔchi̍h iě-a gbǎn nu̍ nyɔ̍-a tìh nu̍-ɛ la

¹ Nyɔ̍ po̍ ǐn kunǎ gbe̍i̍n ka gbǎn nu̍-ɛ nɛ-a dě mɔ̀ nynɛ̌-ɛ. Se̍ Nyɔsoa juo nyɔ̍-a chɛ̀ u̍h-u nu̍ la̍a̍n. U̍h la̍ mɔ̀-a nyɔ̍ due ke ɔ̍ baa-a nynɔ̌-a po̍ dlǔ tàdùè i̍,

² wɛ̀ mɔ̀-a po̍ ɛ̍ bu̍hᵻ wlù i̍. Ìh la mɔ̀ nɛ i̍h-a sùàɛ̀n pa̍ ka̍ de o. Jɔ̍gbau ɔ̀ nu̍-a ɛ̀ kaɛn la-ɛ, mɔ̀ sà ɔ̍ dě mɔ̀-a chɛ̀ nynɛ̌.

^3-4 Ǎn nyi̍ɔ̍tu se̍ dě mɔ̀ we̍ nɛ gbɛɛ wa, jɛ ǎn naɛ mɔ̀-a tìh wlùh i̍ ka nyɔ̍ la̍ ǐn nɛ dě mɔ̀ we̍-ɛ. Ǐn wɔ̀ nyɔ̍ ɔ̀ nu̍-a dɛ̍ kaɛn la-ɛ kɛ̀n sà-a wɛ̀ se̍e̍ dǒ Joi Jusu-a nynɛ̌ kɛ̍n. Mɔ̀ gbǎ tàdùè dě à Joi Jusu-a gbǐh di̍i̍-ɛ, nɛ̀ ǎn mu̍ dě mɔ̀ nynɛ̌ nɛ dě sùù di̍i̍.

⁵ Nɛ̀ mɔ̀ sà jɔ̍gbau laa̍ kwlǎ dě Setɔn we̍ ɔ̍ nyi̍ɔ̍ku iě-e gbɔ̀lɔ-ɛ, wɛ̀ ɔ̍ sùù iě pǔh dǒ weɛ̍ Joi Jusu-a mu̍-a ja-ɛ di̍i̍.

⁶ Mɔ̀-a blɔ̌-ɛ se̍ jii̍ nmɔ. Mɔ̀ se̍ i̍h juo ka blèe̍ fù-i dɛ̍ᵻá dɛ̍ juwɛ-a fù-ia blèe̍ gbo̍ gbàǐ-ɛ ae?

⁷ Mɔ̀ poe gblɛ̍n sɔ̀ɛ̀n ìh wɔ̀-a blèe̍ fù-i dɛ̍ᵻ soa-a kɛ̍n i̍, wɛ̀ mɔ̀ iě blèe̍ gbo̍ delee ɛ̀ se̍-a fù-i dɛ̍ᵻ we̍ nɛ-ɛ sàɛ̀, ɛ̍ bo mɔ̀ nɛ-aa. Dɛ̍nu̍ɛ, Klai to ɔ̍ chɛ̀ iě ɔ̍ nu̍ à Sììkɛ̍n Weɛ̍-a slaǎ sà-ɛ blawɛ̌ jǔ.

⁸ Ɛ̍ tìh-ɛ, mɔ̀ à nu̍ à Sììkɛ̍n Weɛ̍-a Peě. Jɛ mɔ̀ à bɔ̌ ɛ̍ blèe̍ fù-i dɛ̍-a soa naɛ we̍ po̍-ɛ. Blèe̍ fù-i dɛ̍ᵻ ìh blě-a gblɛ̍n-ɛ nyni-ɛ ke kà-ɛ, mɔ̀ à tǎli i̍h i̍. Jɛ mɔ̀ à nui ɛ̍ blèe̍ ɛ̀ se̍-a fù-i dɛ̍ we̍ nɛ, ɛ̀ se̍-a nɛi̍ nɛ iě ɛ̍ nu̍-a tìh-a taǐn-ɛ.

⁹ Chlǐh-dɛ̍ ǐn chlǐh-a mɔ̀ we̍-ɛ, ǐn sèàɛ̍ mɔ̀ wlùh dě ɛ̍ di̍i̍, na̍a̍, mɔ̀ ke gbǎn nu̍ nyɔ̍ bɔ̌ we̍ nɛ̍aɛ-ɛ.

¹⁰ Kmɔ̌ we̍ nyɔ̍ ùh-a nu̍-a gbǎn, ùh kɔn-a klǎn, ùh-a jlǐ-a, ùh-a sà-a kwɛ̍i̍n gbo̍ᵻ wɛɛ-ɛ, u̍h nɔ̀ɔ̍, ǐn se̍ u̍h dǎ fu̍u̍. Pò mɔ̀ iě u̍h-a tìh i̍ tǎli-ɛ, nɛ̀ mɔ̀-a mu̍ nɔ̌ kmɔ̌ la we̍ sɔ sasǎ.

¹¹ Kaka la̍ ǎn chlǐh mɔ̀ we̍, nyɔ̍ ɔ̀ dǎɛ-a ɔ̍ chɛ̀ mɔ̀ de̍di̍i̍ wɛ̀ ɔ̍ nu̍-a gbǎn, iě ɔ̍ kɔn-a klǎn iě ɔ̍ sà-a kwɛ̍i̍n gbo̍ᵻ wɛɛ, iě ɔ̍ po̍-a nyɔ̍ wlu̍ sɔ̀nᵻ pùn i̍, iě ɔ̍ sìèè-a ɔ̍ chɛ̀ nmɔ̍ wlì, iě ɔ̍ jlǐ-aɛ, nyɔ̍ kaɛn laa̍ ɔ̀ nu̍-a ìh la i̍h-a dɛ̍-ɛ, nɛ̀ ɔ̍ ke mɔ̀ bɔ̌ we̍ nɛ̍aɛ. Nɛ̀ ɔ̍ ke mɔ̀ bɔ̌ sɔ̍n jǔ gbo̍a̍ɛ-a chɛ̀ ke.

^12-13 Ɛ̍ se̍ mɔ̍ ɔ̀ se̍ sɔ̀n nyɔ̍-a taɔ pa̍ mu̍. Nyɔsoa bo ɔ̀ mu̍ u̍h-a taɔ pa̍. Jɛ mɔ̀ se̍ nyɔ̍ juh nɛ-a dě chɔchi̍h-ɛ nɔ̀ɔ̍, u̍h-a taɔ pa̍ mu̍ ke ae? Nyɔsoa-a wlu̍ la̍a̍, “Mɔ̀ sà mɔ̀-a chɛ̀ nyɔ̍ sɔ̀nᵻ nynɛ̌ i̍.”