1 Kɔwlɛntiɔn 2 - Ku̍o̍ Delee 1999

Mɔ̀-a wlùh gbaɛ bɔ̌ dǒ nyɔ̍-a flɔ̍nwlùh kɛ̍n i̍ kɔ̍-ɛ

¹ Ǐn de̍di̍i̍ᵻ, ti̍ iě-a Nyɔsoa-a tìh bla̍ la̍ ji̍ dě mɔ̀ we̍-ɛ, ǐn se̍-e wɔ̍i̍n chɛn-ɛ ke flɔ̍nwlùh klaaᵻ ja.

² Ti̍ iě-a dě mɔ̀ we̍ nɛ-ɛ, ǐn pu̍e̍e ɛ̍ wlùh i̍ iě dɛ̍ᵻ kli̍hgbɛ̍ dǒ de̍ i̍ poe, Jusu Klai-a dǒ tu̍ wlì kɔ̍-ɛ tìh bla̍-a due kɔn tìh-a tɛ̀ ǐn sà-o.

³ Ɛ̍ kɔn ti̍ ǐn nɛ-a dě mɔ̀ we̍-ɛ, wɛ̀ ǎn gbǐh-a nu̍ sɔɔn iě ǎn tlɛ̍-a dǒ faɔn we̍-ɛ bo.

⁴ Iě-a ǎn nyɔ̍ nǎ po̍ tu̍owli la dě mɔ̀ we̍ ja-ɛ, ɛ̍ se̍ wɔ̍i̍n chɛn flɔ̍nwlùh ǐn se̍-e ja. Jɛ gbǐh Nyɔsoa-a Sùù nyǐ-a m-ɛ bo ǐn ja-e,

⁵ wɛ̀ mɔ̀-a wlùh gbaɛ je̍e nyi̍ɔ̍-a flɔ̍nwlùh i̍ tè, jɛ ɛ̍ iě Nyɔsoa-a gbǐh i̍ tè.

Sùù bo ɛ̀ nyǐ àɔ̀ Nyɔsoa-a flɔ̍nwlùh

⁶ Jɛ nyɔ̍ ùh ku̍-a dě Nyɔsoa dɛ di̍i̍-ɛ, u̍h bo à nyǐ flɔ̍nwlùh. Ɛ̍ se̍ kmɔ̌ la ɛ̍ flɔ̍nwlùh, iě ɛ̍ wɔ̍ se̍ kmɔ̌ la ɛ̍ wlu̍ i̍ kɔn nyɔ̍-a flɔ̍nwlùh ke, ùh kɔn naɛ-a mu̍-a gbɔ̀ fǒ-ɛ.

⁷ Nyɔsoa-a flɔ̍nwlùh ɛ̀ sìle-a kmɔ̌ nyɔ̍ se̍-a juo-ɛ, ɛ̍-ɛ bo à nyǐ-a ka nyɔ̍. Flɔ̍nwlùh laa̍ bo Nyɔsoa tba̍ chèɛ̀ se̍e̍ ɛ̍ iě ɛ̍ nu̍ à iě ɔ̍ tìh-a i̍ bɛ̌-ɛa fɔ̌ kɔn, wɛ̀ kmɔ̌ la ɛ̍ dǔ nui-ɛ.

⁸ Kmɔ̌ la ɛ̍ wlu̍ i̍ kɔn nyɔ̍-a nyɔ̍ se̍ flɔ̍nwlùh la blě. Pò u̍h blě ɛ̍ de-ɛ, nɛ̀ u̍h se̍ tìh-a i̍ bɛ̌-ɛ Joi dbǎ mu̍ dǒ gbàɛ̍ kɛ̍n i̍ tu̍ wlì de.

⁹ Jɛ Nyɔsoa-a wlu̍ la̍a̍, “Dɛ̍ ɛ̀ jlǐhɛ̍ se̍-a jě, dounᵻ se̍-a wɔ̌n, wɛ̀ nyɔ̍ se̍-a wlùh kɛ̍n tè ɛ̀ iě-a nɛ-ɛ, ɛ̍ bo Nyɔsoa po̍ gba̍a̍ dǒ nyɔ̍ ùh jbɛɛ-a ɔ̍-ɛ we̍.”

¹⁰ Nyɔsoa nu̍ ɛ̍ iě ɔ̍ Sùù toe i̍h àɔ̀ wɛ̀, dɛ̍nu̍ɛ, Sùù bo ɛ̀ juo dɛ̍ᵻ kli̍hgbɛ̍. Ɛ̍ juo Nyɔsoa-a wlùh dɛ̍ᵻ.

¹¹ Nyɔ̍-a chɛ̀-a sùù ɛ̀ nɛ-a dě nyɔ̍ ja̍a̍-ɛ bo ɛ̀ ju̍o̍e nyɔ̍-a dɛ̍ᵻ kli̍hgbɛ̍ we̍ i̍. Nyɔ̍ dɔɔ se̍ i̍h juo. Kǎ ɛ̍ nu̍ nɛ-ɛ ke Nyɔsoa-a Sùù bo ɛ̀ ju̍o̍e Nyɔsoa-a dɛ̍ᵻ kli̍hgbɛ̍ we̍ i̍.

¹² À se̍ kmɔ̌ we̍ sùù-a tìh i̍ wɔ̌ɛn, jɛ Sùù sɔ-a dě Nyɔsoa we̍-ɛ, ɛ̍ tìh bo à wɔ̌ɛn wɛ̀ ɛ̍ iě kmɔ̌ nɛ à iě dɛ̍ᵻ kli̍hgbɛ̍ Nyɔsoa nyǐ-a àɔ̀-ɛ we̍ i̍ ju̍o̍e.

¹³ Ɛ̍ tìh-ɛ, ɛ̍ se̍ nyi̍ɔ̍-a flɔ̍nwlùh à se̍ nyɔ̍ nǎ poe. Jɛ Nyɔsoa-a Sùù bo à poe nǎ, wɛ̀ à sèàɛ̍ Sùù-a tìh-a taǐn we̍ i̍ dě Sùù blě nyɔ̍ we̍.

¹⁴ Jɛ nyɔ̍ ɔ̀ Nyɔsoa-a Sùù se̍-a dě ja̍a̍ nɛ-ɛ, nɛ̀ ɔ̍ dounᵻ se̍ dě ɛ̍ nyǐ-dɛ̍ᵻ we̍ nɛ. Nyɔ̍ kaɛn laa̍ nɛ̀ ɔ̍ se̍ i̍h i̍ wɔ̌n-ɛ bɛ̌ɛ. I̍h nu̍ se̍o̍nɛ dǒ ɔ̍ we̍. Dɛ̍nu̍ɛ, Nyɔsoa-a Sùù bo ɛ̀ nu̍ ɛ̍ wɛ̀ nyɔ̍-a juo i̍h-a sèàɛ̀gbàà.

¹⁵ Nyɔ̍ ɔ̀ blě-a Nyɔsoa-a Sùù-ɛ, nɛ̀ ɔ̍ bo ɔ̀ nu̍ taɔ pa̍ nyɔ̍ dǒ dɛ̍ᵻ kli̍hgbɛ̍ we̍. Jɛ ɔ̍ chɛ̀ nɔ̀ɔ̍, nyɔ̍ se̍ ɔ̍ taɔ pa̍-a bɛ̌ɛ.

¹⁶ Nyɔsoa-a wlu̍ la̍a̍, “Nyɔ̍we̍ bo ɔ̀ juo Joi-a wlùh wɛ̀ ɔ̀ iě ɔ̍ dɛ̍ toe ɛ?” Jɛ àɔ̀ nɔ̀ɔ̍, à ke Klai ke à blě wlùh due.