1 Kɔwlɛntiɔn 16 - Ku̍o̍ Delee 1999

Pɔɔ bla̍ Nyɔsoa nyɔ̍-a nyǐ-dɛ̍ᵻá tìh

¹ Nɛ̀ɛ̍, ìh nu̍-a wlǐ mɔ̀ kɔn mɔ̀ iě-a sà dǒ Nyɔsoa nyɔ̍ nɛ-a dě Judia bloa̍ kɛ̍n-ɛ we̍-ɛ, dɛ̍ ǐn sèàɛ̍ chɔchi̍h nyɔ̍ nɛ-a dě Kelesea bloa̍ kɛ̍n-ɛ wlùh u̍h iě-a nu̍-ɛ, ɛ̍-ɛ bo mɔ̀ iě nu̍ ke.

² Ka wlè-weɛ̍-a mu̍-a ji̍-ɛ, ka jɔ-a mu̍-a wlǐ jě-ɛ, nɛ̀ kǎ ɔ̍ iě-o dɛ̍ sà-a nu̍ ɔ̍ iě i̍ tè, wɛ̀ pò ǐn ji̍-ɛ, mɔ̀-ɔ jěe wlǐ sà.

³ Pò ǐn ji̍-ɛ, nɛ̀ ǎn mu̍ nyɔ̍ mɔ̀ tba̍-a chèɛ̀-ɛ chlǐh-dɛ̍ nyǐ, ɛ̀ mu̍-a u̍h-a tìh we̍ i̍ sèàɛ̍-ɛ. Wɛ̀ iě u̍h dbo̍ u̍h iě mɔ̀-a nyǐ-dɛ̍ᵻá chɛ̀ Juluslɛn gba̍.

⁴ Pò ǎn chɛ̀ nɛ-e mu̍ ka̍-ɛ, nɛ̀ u̍h ke ǐn ke à mu̍ mu̍.

Pɔɔ-a mu̍ dihwa̍a̍ mu̍ dě nya̍

⁵ Pò ǐn chɛ̍n Mɛsedonia bloa̍ tìè-ɛ, nɛ̀ ǎn mu̍ dě mɔ̀ we̍ i̍ nala ji̍. Jɛ ǎn pɔ̀n iě Mɛsedonia jii ke̍.

⁶ Ǎn mu̍ ti̍ gbɔ̍ nu̍ dě mɔ̀ we̍. Nyɔ̍-se̍-juo ǎn mu̍-e mɔ̀ we̍-a chɛ̀ wìla̍ wlè-ɛ, wɛ̀ pò ǐn ja tàjɛ̀ mu̍-ɛ, mɔ̀ iě ǐn sɔ̍n we̍ po̍.

⁷ Ǐn se̍ pɔ̀n iě dě mɔ̀ we̍ ji̍ wɛ̀ nɛ̌ se̍-e wlè. Pò Joi wɔ̌n-ɛ, nɛ̀ ǎn pɔ̀n iě ti̍ gbɔ̍ nu̍ dě mɔ̀ we̍.

⁸ Jɛ ǎn mu̍ dě Ɛfɛsɔ wlɔ̀ di̍i̍ nɛ te̍e̍ wɛ̀ klèᵻá sàì jua̍a̍-a peě iě nyni̍.

⁹ Ǐn jě flɔn la̍ wɛ̀ iě dbo̍ ɛ̀ mu̍-a dɛ̍ i̍ sǐ-ɛ nu̍, jɛ ǎn nyɛ̌-nyɔ̍ tìè i̍.

¹⁰ Pò Timote ji̍ dě mɔ̀ we̍-ɛ, nɛ̀ mɔ̀ gbɛ̍n-ɛ ɔ̍ sɔ̍nᵻ sɔɔ̌n i̍. Dɛ̍nu̍ɛ, Joi-a dbo̍ kɔn ba̍ ǎn nu̍-aɛ, ɛ̍-ɛ bo ɔ̍ nu̍ ke.

¹¹ Ɛ̍ tìh-ɛ, nyɔ̍ bɔ̌ ɔ̍ jlǐhɛ̍ dlǔ bla̍-a. Pò ɔ̍ ja mu̍-ɛ, nɛ̀ mɔ̀ po̍ ɔ̍ sɔ̍n we̍ ɔ̍ wlùh iě i̍ tè, wɛ̀ ɔ̍ iě nɔ̌ ǐn we̍ de̍ ji̍. Dɛ̍nu̍ɛ, ǎn gbɛ̀n dě ɔ̍ we̍ wìè-i ɔ̍ ke de̍di̍i̍ᵻ iě ji̍.

¹² À de̍di̍i̍ Apolo nɔ̀ɔ̍, ǐn gbɛ̍n-ɛ ɔ̍ wɔ̍i̍n ɔ̍ iě mɔ̀ jě la̍-a ji̍, ɔ̍ ke de̍di̍i̍ᵻ duuh ke. Jɛ ɔ̍ wlùh se̍ i̍ pɛ̌n ɔ̍ iě-e ji̍ kaka. Pò ɔ̍ jě flɔn la̍-ɛ, nɛ̀ ɔ̍ mu̍-e ji̍.

Bɔ̌ɛ-o wlu̍ la

¹³ Mɔ̀ tù mɔ̀-a chɛ̀ jlǐhɛ̍ mɔ̀ iě-a klì i̍ ku̍ dǒ wlùh gbaɛ blě-ɛ we̍. Mɔ̀ bɛ̌ wlì i̍ mɔ̀ iě kmu.

¹⁴ Mɔ̀ nui dɛ̍ᵻ kli̍hgbɛ̍ dě jbɛɛ-ɛ.

¹⁵ Ǐn de̍di̍i̍ᵻ, mɔ̀-a chɛ̀ juo ɛ̍-ɛ Slɛfanɔ ke ɔ̍ blǐ gbò nyɔ̍ bo ùh gbǎ Nyɔsoa dɛ-ɛ sàǐtòò nɔ̌ Akaia bloa̍ kɛ̍n, iě u̍h fòè u̍h-a chɛ̀ dǒ Nyɔsoa nyɔ̍ jǔ dbee-ɛ we̍. Ǎn ba̍le mɔ̀-ɛ,

¹⁶ mɔ̀ jě nyɔ̍ kaɛn la dɛ̍ɛ̍, ɛ̍ ke nyɔ̍ kli̍hgbɛ̍ ùh-a nu̍-a Nyɔsoa dbo̍-ɛ ke.

¹⁷ Ǐn gbǎ mɔna̍ dǒ Slɛfanɔ ke Fɔtunatɔ ke Akaika-a ji̍-ɛ we̍. Dɛ̍nu̍ɛ, u̍h gbǎ-ɛ dǒ mɔ̀ wɔ̀ɔ̀.

¹⁸ Ka u̍h-a nu̍-a mɔ̀ gbǐh ku̍u̍ po̍-ɛ, kǎ u̍h-a nu̍ ǐn gbǐh ku̍u̍ po̍-ɛ ke. Nyɔ̍ kaɛn la mɔ̀ gbɛ̍n-ɛ u̍h-a tìh jlǐhɛ̍ i̍.

¹⁹ Chɔchi̍h nyɔ̍ nɛ-a Esea bloa̍ kɛ̍n-ɛ, u̍h la̍ u̍h sà mɔ̀ nyinɔ̍ i̍. Akwela ke Plisela ke chɔchi̍h nɛ-a dě u̍h blǐ gbò-ɛ, u̍h la̍ u̍h sà mɔ̀ nyinɔ̍ i̍ dě Joi-a nynɛ̌ di̍i̍.

²⁰ De̍di̍i̍ᵻ kli̍hgbɛ̍ la̍ u̍h sà mɔ̀ nyinɔ̍ i̍. Mɔ̀ gblèè mɔ̀ ba̍ᵻ Nyɔsoa nyɔ̍ dǒ nyinɔ̍ i̍ sèàɛ̍ la̍.

²¹ Mɔ̍ Pɔɔ, ǎn chɛ̀-a sɔ̍n bo ǎn chlǐh i̍ nyinɔ̍ i̍ sà wlu̍ la.

²² Pò nyɔ̍-o-nyɔ̍ se̍ Joi-i jbɛɛ-ɛ, nɛ̀ ɔ̍ mu̍ pǎ poe-ɛ. Ji̍ suei̍, à Joi.

²³ Ǎn sà nǐ wɔ̍n à Joi Jusu-a blɛ iě mɔ̀ we̍ nɛ.

²⁴ Ǎn jbɛɛ nɛ dǒ mɔ̀ kli̍hgbɛ̍ we̍ dě Jusu Klai ja̍a̍.