1 Kɔwlɛntiɔn 13 - Ku̍o̍ Delee 1999

Nyɔsoa nyɔ̍-a jbɛɛ la

¹ Pò Nyɔsoa-a jɛ nyǐ ǐn gbǐh iě wlu̍ kli̍hgbɛ̍ nɛ-a nɔ̌ bloɔ̍-ɛ ke jih nɛ-a dě ja̍i̍wlɔ̀-ɛ po̍-ɛ, jɛ pò ǐn se̍ nyɔ̍ɔ jbɛɛ-ɛ, nɛ̀ ɛ̍ wɔ̀ pani̍ gbàù ke gbekleɛ̍-a slɛ̀ po̍-ɛ.

² Pò ǎn jɛ blě Nyɔsoa-a tu̍owli po̍-ɛa gbǐh, wɛ̀ iě tɔɔ kli̍hgbɛ̍ blě, iě slǎnᵻ kli̍hgbɛ̍ juo, wɛ̀ iě wlùh gbaɛ kli̍hgbɛ̍ ɛ̀ sà-a tlu̍hᵻ wlù-ɛ blě-a chɛ̀ sǔh, jɛ pò ǐn se̍ nyɔ̍ɔ jbɛɛ-ɛ, nɛ̀ ǐn se̍ dɛ̍ i̍ blaɛ.

³ Pò ǎn jɛ nmɔ-ɛ ǎn kɔn-dɛ̍ᵻ kli̍hgbɛ̍ wlùh, wɛ̀ iě ǎn ku̍ kwlǎ sà ɛ̍ iě fɔ̍n-ɛ, jɛ pò ǐn se̍ nyɔ̍ɔ jbɛɛ-ɛ, nɛ̀ ɛ̍ se̍-o ǐn dɛ̍ po̍ mu̍.

⁴ Jbɛɛ blě wlùh-i gbɛ̍n-ɛ ke gblɛ̍n-ɛ nmɔ-ɛ. Jbɛɛ se̍ wlɛ̀n nu̍-ɛ ke nyɔ̍ jlǐhɛ̍ dlǔ bla̍-a ke blɔ̌-ɛ blě.

⁵ Ɛ̍-ɛ sà nyɔ̍ kǔ kɛ̍n. Jbɛɛ se̍ klǎn kɔn. Ɛ̍-ɛ gbǎ jlu̍h-u suei̍. Ɛ̍-ɛ blě-e tìh di̍i̍ i̍.

⁶ Jbɛɛ-ɛ nu̍ dɛ̍ sɔ̀n-a mɔna̍, jɛ dɛ̍ chɛ̀-a mɔna̍ bo ɛ̍ nu̍.

⁷ Jbɛɛ-ɛ sà dɛ̍ sɔ̍nᵻ i̍, ɛ̍ blě wlùh gbaɛ ma̍u̍. Ɛ̍ tè dɛ̍ wlì ti̍ kli̍hgbɛ̍ we̍, iě ɛ̍ ku̍-e klì i̍ dǒ dɛ̍ᵻ kli̍hgbɛ̍ we̍.

⁸ Nyɔsoa-a tu̍owli po̍-ɛa mu̍ i̍ sì. Wlu̍ diih po̍-ɛa mu̍ i̍ sì. Tɔɔ blě-ɛa mu̍ i̍ sì. Jɛ jbɛɛ nɔ̀ɔ̍, ɛ̍ se̍ siee la̍ kɔn.

⁹ À tɔɔ blě-ɛ ke, à Nyɔsoa-a tu̍owli po̍-ɛ se̍ kwlǎ wɛ̀.

¹⁰ Jɛ pò jɛ wɛ̀-a gblɛ̍ja̍i̍-ɛ ji̍-ɛ, nɛ̀ ɛ̀ se̍-a kwlǎ wɛ̀-ɛ, ɛ̍ tìh-a mu̍ i̍ sì.

¹¹ Ti̍ ǐn nu̍-a jǔwɛ-ɛ, nɛ̀ ǎn wlu jǔwɛ dɛ, nɛ̀ ǐn blě jǔwɛ wlùh, ǎn naɛ wlùh i̍ ka jǔwɛ-ɛ. Jɛ ti̍ ǐn nu̍-a jɔ̍gbau wɛ̀-ɛ, iě ǐn tǎli jǔwɛ dɛ̍ᵻ i̍.

¹² À jě i̍ kaka, jɛ ɛ̍ wɔ̀ dě dula jela̍a̍ di̍i̍ gbɛ̀n-ɛ. Jɛ dǒ ti̍ laa̍ di̍i̍-ɛ, à mu̍ jua̍a̍ i̍ jiěe. Kaka la̍, ìh ǐn juo-aɛ, i̍h se̍ kwlǎ wɛ̀ ke̍. Jɛ dǒ ti̍ laa̍ di̍i̍-ɛ, ka Nyɔsoa juo-a m te̍kle̍e̍-ɛ, kǎ ǎn tɔɔ-a mu̍ kwlǎ wɛ̀-ɛ nu̍ ke.

¹³ Ɛ̍ tìh-ɛ, wlùh gbaɛ ke, dɛ̍ wlì tè-ɛ ke jbɛɛ bo ìh se̍ i̍ sì mu̍. Jɛ i̍h nɛ-a ta̍a̍n-ɛ, jbɛɛ bo ɛ̀ ku̍ wɔ̍n.