1 Kɔwlɛntiɔn 12 - Ku̍o̍ Delee 1999

Nyɔsoa-a Sùù nyǐ nyɔ̍ nyǐ-dɛ̍ᵻ kaɛn kaɛn

¹ Ǐn de̍di̍i̍ᵻ, kaka la̍, dɛ̍ ɛ̀ tba̍-a dǒ Nyɔsoa-a Sùù-a nyǐ-dɛ̍ᵻ pùn i̍-ɛ, ǎn pɔ̀n mɔ̀ iě i̍h we̍ i̍ ju̍o̍e.

² Mɔ̀ juo ɛ̍-ɛ, ti̍ mɔ̀ se̍-a Nyɔsoa juo-ɛ, nɛ̀ kwɛ̍i̍n gbo̍ᵻ ìh se̍-a feɛ blě-ɛ i̍h mɔ̀-a sà wɛɛ. Nɛ̀ ka mɔ̀ jě-ɛ mɔ̀-a nu̍.

³ Ɛ̍ tìh-ɛ, ǎn pɔ̀n mɔ̀ iě i̍h juo ka nyɔ̍ ɔ̀ Nyɔsoa-a Sùù nɛ-a dě ja̍a̍-ɛ, ɔ̍ se̍ Jusu wlu̍we̍i̍ po̍-ɛ bɛ̌ɛ. Pò Nyɔsoa-a Sùù wɔ̍ se̍ dě nyɔ̍ ja̍a̍ nɛ ke-ɛ, nɛ̀ ɔ̍ se̍ Jusu Joi dǎɛ bɛ̌ɛ.

⁴ Nyɔsoa-a Sùù-a nyǐ-dɛ̍ᵻ blě gbɔ̍ᵻ gbɔ̍ᵻ, jɛ ɔ̍ Sùù nɛ due.

⁵ Joi-a jǔ dbee-ɛ blě gbɔ̍ᵻ gbɔ̍ᵻ, jɛ ɔ̍ nɛ-a due-ɛ bo à dbee-e jǔ.

⁶ Nyɔ̍ kli̍hgbɛ̍ blě dbo̍ kaɛn kaɛn u̍h iě nu̍, jɛ Nyɔsoa nɛ-a due-ɛ bo ɔ̀ nyǐ i̍h u̍h.

⁷ Nyɔ̍ jɔ-ɛ, nɛ̀ Nyɔsoa-a Sùù nɛ dě ɔ̍ ja̍a̍ wɛ̀ ɔ̍ iě u̍h kli̍hgbɛ̍ we̍ gbǎ.

⁸ Nyɔ̍ jɔ-ɛ, nɛ̀ Sùù nyǐ ɔ̍ flɔ̍nwlùh dǒ wlu-ɛ we̍, nɛ̀ dɔɔ-ɛ, Sùù due laa̍ nɛ̀ ɛ̍ nyǐ ɔ̍ tɔɔ ke dǒ wlu-ɛ we̍.

⁹ Nɛ̀ dɔɔ-ɛ, Sùù due laa̍ nɛ̀ ɛ̍ nyǐ ɔ̍ wlùh gbaɛ. Dɔɔ-ɛ, nɛ̀ ɛ̍ nyǐ ɔ̍ gbǐh dǒ nyɔ̍ pǔh-iɛ we̍.

¹⁰ Nɛ̀ ɛ̍ nyǐ nyɔ̍ dɔɔ jbaɛdih po̍-ɛ, nɛ̀ dɔɔ-ɛ, ɛ̍ nyǐ ɔ̍ Nyɔsoa-a tu̍owli po̍-ɛ. Nɛ̀ ɛ̍ nyǐ dɔɔ gbǐh ɔ̍ iě Nyɔsoa-a Sùù ke jeědih we̍ sèàɛ̍. Iě ɛ̍ nyǐ dɔɔ gbǐh ɔ̍ iě wlu̍ diih po̍, iě ɛ̍ nyǐ dɔɔ gbǐh ɔ̍ iě wlu̍ diih-a chɛ̀ we̍ i̍ sèàɛ̍.

¹¹ Sùù nɛ-a due-ɛ bo ɛ̀ nu̍ ìh kli̍hgbɛ̍ la. Jɛ dɛ̍ ɛ̍ pɔ̀n-a ɛ̍ iě-a jɔ nyǐ-ɛ, nɛ̀ ɛ̍-ɛ bo ɛ̍ nyǐ ɔ̍.

À kli̍hgbɛ̍ à kɔn dǒ ku̍ due we̍

¹² Kǎ ku̍ nɛ due sǔh wɛ̀ ɛ̍ blě fɔ̌ᵻ dɔu. Kǎ ɛ̍ fɔ̌ᵻ laa̍ i̍h tìè i̍ sǔh wɛ̀ i̍h nu̍ ku̍ due. Kǎ Klai-a tìh nɛ ke.

¹³ Kǎ ɛ̍ nɛ ke dǒ à kli̍hgbɛ̍ we̍. Juu nyɔ̍ o, se̍ Juu o, kèi̍ᵻ o, de̍e̍ i̍ flɔn nyɔ̍ o, à kli̍hgbɛ̍ dě ku̍ due di̍i̍ bo Sùù poe àɔ̀ nǐ dlǔ. À kli̍hgbɛ̍ Nyɔsoa nyǐ àɔ̀ Sùù due dě à wlùh di̍i̍.

¹⁴ Ku̍ se̍ fɔ̌ due gbài̍ blě, jɛ ɛ̍ blě fɔ̌ᵻ dɔu.

¹⁵ Pò bu̍h la̍a̍, “Ka ǐn se̍-a sɔ̍n-ɛ, nɛ̀ ǐn se̍ dǒ ku̍ we̍ kɔn.” I̍i̍n, jɛ ɛ̍ se̍ ɛ̍ ku̍ dɛ-ɛ sà mu̍.

¹⁶ Iě pò doun la̍a̍, “Ǐn se̍-a jlǐhɛ̍-ɛ, nɛ̀ ǐn se̍ dǒ ku̍ we̍ kɔn.” I̍i̍n, jɛ ɛ̍ se̍ ɛ̍ ku̍ dɛ-ɛ sà mu̍.

¹⁷ Pò ku̍ kli̍hgbɛ̍ nu̍ jlǐh-ɛ, nɛ̀ ka ɛ̍ mu̍ nu̍ wɛ̀ ɛ̍ iě i̍ wɔ̌n ɛ? Pò ɛ̍ nu̍ dounᵻá sǔh-ɛ, nɛ̀ dɛ̍ bo ɛ̍ mu̍ nɔ̌ wɔ̌n ɛ?

¹⁸ Jɛ ka Nyɔsoa-a pɔ̀n-a ku̍-a fɔ̌ᵻ iě-a nɛ dǒ à pùn-ɛ, kǎ ɔ̍ nu̍ i̍h doǒ po̍-ɛ.

¹⁹ Pò i̍h kli̍hgbɛ̍ nɛ due gbài̍-ɛ, nɛ̀ dɛ̍ we̍ bo ɛ̀ mu̍ ku̍ nu̍ de ɛ?

²⁰ Ka ɛ̍ nɛ-a ka-ɛ, i̍h-a fɔ̌ᵻ tìè i̍ sǔh o, jɛ i̍h nu̍ ku̍ due.

²¹ Jlǐhɛ̍ se̍ ka dǎ-a bɛ̌ɛ dě sɔ̍n we̍, “Sɔ̍n, ǐn se̍ ìn i̍ pɔ̀n.” Dlǔ wɔ̍ se̍ ka dǎ-a bɛ̌ɛ ke dě bu̍hᵻ we̍, “Bu̍hᵻ, ǐn se̍ mɔ̀ i̍ pɔ̀n.”

²² Iěe, à ku̍-a fɔ̌ᵻ jih se̍-a dɛ̍ i̍ blaɛ dě à jlǐh-ɛ, nyɔ̍ se̍ i̍h-o i̍ si̍e̍-ɛ bɛ̌ɛ.

²³ Wɛ̀ à ku̍-a fɔ̌ᵻ diih ìh à la̍ ìh se̍-a dɛ̍kɛ̍n gbǎ-ɛ, wɛ̀ à tè i̍h ja̍, iě fɔ̌ᵻ jih se̍-a kɛ̍n i̍ flɔn-ɛ ka̍ nɛ-ɛ, wɛ̀ à ka̍n-ɛ i̍h dɛ̍ kɛ̍n.

²⁴ Ku̍-a fɔ̌ᵻ nɛ-a kɛ̍n i̍ flɔn-ɛ ka̍-ɛ, i̍h bo ìh se̍ dɛ̍ kɛ̍n ka̍n-ɛ jbǎ. Jɛ Nyɔsoa po̍ ku̍-a fɔ̌ᵻ kli̍hgbɛ̍ tàdùè, wɛ̀ jih se̍-a dɛ̍kɛ̍n gbǎ-ɛ iě ɔ̍ tè i̍h ja̍.

²⁵ Wɛ̀ dɛ̍-ɛ i̍ gblè-ɛ je̍e ku̍ we̍ nɛ, wɛ̀ ɛ̍ fɔ̌ᵻ iě wlùh due blě.

²⁶ Pò ku̍-a fɔ̌ due ja jua̍i̍ sàɛ̀-ɛ, nɛ̀ ɛ̍ fɔ̌ᵻ kli̍hgbɛ̍ bo ìh-a sàɛ̀ jua̍i̍ tàdùè. Pò ɛ̍ fɔ̌ due tè-ɛ ja̍-ɛ, nɛ̀ ɛ̍ fɔ̌ᵻ kli̍hgbɛ̍ bo ìh-a nui mɔna̍ tàdùè.

²⁷ Nɛ̀ɛ̍, mɔ̀ɔ̍ bo ùh nu̍ ku̍ ɛ̀ kɔn-a dǒ Klai we̍-ɛ, iě mɔ̀ nu̍ ɛ̍ fɔ̌ᵻ due due dɛ.

²⁸ Nyɔsoa tba̍ Klai-a gba̍tòà chèɛ̀ dě chɔchi̍h, iě ɔ̍ tba̍ ɔ̍ tu̍owli po̍ nyɔ̍ chèɛ̀. Wɛ̀ ɔ̍ tba̍ nǎ po̍ nyɔ̍ chèɛ̀, iě ɔ̍ tba̍ jbaɛdih po̍ nyɔ̍ chèɛ̀. Wɛ̀ ɔ̍ tba̍ nyɔ̍ pǔh-i nyɔ̍ ke, nyɔ̍ we̍ gbǎ nyɔ̍ ke, dɛ̍ᵻ we̍ i̍ gbɛ̀n nyɔ̍ ke, wlu̍ diih po̍ nyɔ̍ chèɛ̀.

²⁹ Ɛ̍ se̍ chɔchi̍h nyɔ̍ kli̍hgbɛ̍ ùh se̍ Klai-a gba̍tòà. Ɛ̍ se̍ u̍h kli̍hgbɛ̍ ùh se̍ ɔ̍ tu̍owli po̍ nyɔ̍. Ɛ̍ se̍ u̍h kli̍hgbɛ̍ ùh se̍ ɔ̍ nǎ po̍ nyɔ̍. Ɛ̍ se̍ u̍h kli̍hgbɛ̍ ùh se̍ jbaɛdih po̍ nyɔ̍.

³⁰ Ɛ̍ se̍ u̍h kli̍hgbɛ̍ ùh se̍ nyɔ̍ pǔh-i nyɔ̍. Ɛ̍ se̍ u̍h kli̍hgbɛ̍ ùh se̍ wlu̍ diih po̍ nyɔ̍. Ɛ̍ se̍ u̍h kli̍hgbɛ̍ ùh se̍ wlu̍ diih-a chɛ̀ we̍ i̍ sèàɛ̍ nyɔ̍.

³¹ Jɛ nyǐ-dɛ̍ᵻá chɛ̀, i̍h-a dɛ̍kɛ̍n gbǎ naɛ bo mɔ̀ iě i̍ pɔ̀n chɛ̀ɛ̌chɛ̀. Nɛ̀ i̍h-a jɛ nmɔ-a jii̍ dǒ ɛ̍ ba̍ᵻ kɛ̍n-ɛ, ɛ̍ wìè bo ǎn mu̍ mɔ̀ toe.