1 Kɔwlɛntiɔn 1 - Ku̍o̍ Delee 1999

¹ Mɔ̍ Pɔɔ, ɛ̍ nu̍ Nyɔsoa-a wlùh iě ɔ̍ dǎ m iě Jusu Klai-a gba̍tòà nu̍. Nɔ̌ ǐn ke à de̍di̍i̍ Sɔtɛni we̍ bo chlǐh-dɛ̍ la ɛ̍ sɔ-ɔ.

² Ǎn chlǐh ɛ̍ Nyɔsoa-a chɔchi̍h nyɔ̍ ùh nɛ-a dě Kɔwlɛn wlɔ̀ di̍i̍-ɛ we̍, ùh Jusu Klai tba̍-a chèɛ̀-ɛ. Mɔ̀ dǎ-ɛ mɔ̀ iě Nyɔsoa-a nyɔ̍ nu̍, ɛ̍ ke nyɔ̍ ùh nɛ-a tà kli̍hgbɛ̍ ùh-a dǎ-a à Joi Jusu Klai-a nynɛ̌ i̍-ɛ ke, ɔ̀ nu̍-a u̍h ke à Joi-ɛ.

³ Ǎn sà nǐ wɔ̍n, à Baa Nyɔsoa ke Joi Jusu Klai iě mɔ̀ blɛ ke wlùh-a i̍ tè-ɛ nyǐ.

Dě Jusu Klai ja̍a̍ bo Nyɔsoa nyǐ-i àɔ̀ dɛ̍ᵻ chɛ̀

⁴ Ǎn po̍ Nyɔsoa tlɔ̌ ti̍ kli̍hgbɛ̍ we̍ mɔ̀-a tìh, dǒ ɔ̍ blɛ ɔ̍ nyǐ-a mɔ̀ dě Jusu Klai ja̍a̍-ɛ we̍.

⁵ Mɔ̀ ke Jusu Klai-a due nɛ-ɛ pàn-ɛ mɔ̀ wɛ̀ dǒ dɛ̍ᵻ kli̍hgbɛ̍ we̍. Mɔ̀ pàn wɛ̀ dǒ wlu-ɛ juo-ɛ kli̍hgbɛ̍ ke tɔɔ blě-ɛ we̍.

⁶ Dɛ̍nu̍ɛ, tu̍owli ɛ̀ kɔ̍-a dǒ Klai pùn i̍ ɛ̀ poe-a dě mɔ̀ we̍-ɛ, mɔ̀ gbɛ̍n ɛ̍ i̍ klìmàtàìn.

⁷ Ɛ̍ kɔn mɔ̀ se̍ Nyɔsoa-a nyǐ-dɛ̍ᵻá dɛ̍-o-dɛ̍ pɔ̀ dě mɔ̀-a à Joi Jusu Klai kɛ̍ɛ̍n fuo-ɛ di̍i̍ dǒ ɔ̍ de̍ ji̍ la̍.

⁸ Ɔ̍ mu̍ mɔ̀-a wlùh gbaɛ-ɛ i̍ kui te̍e̍ wɛ̀ mɔ̀ɔ̍ jěe nɛi̍ nɛ dǒ weɛ̍ à Joi Jusu Klai-a mu̍-a ja-ɛ di̍i̍.

⁹ Nyɔsoa ɔ̀ dǎ-a mɔ̀ mɔ̀ ke ɔ̍ Jǔ Jusu Klai ɔ̀ nu̍-a à Joi-ɛ iě-a we̍ nɛ̍aɛ-ɛ, ɔ̍-ɔ gblìh wlu̍ kɛ̍n.

Dɛ̍-ɛ i̍ gblè-ɛ se̍ kɔn ɛ̍ iě dě chɔchi̍h nɛ

¹⁰ Ǐn de̍di̍i̍ᵻ, ǎn ba̍le mɔ̀-ɛ dǒ à Joi Jusu Klai-a nynɛ̌ kɛ̍n mɔ̀ kli̍hgbɛ̍ mɔ̀ iě wlu̍ i̍ wɔ̌ɛn wɛ̀ mɔ̀-ɔ je̍e kɛ̍n sèàɛ̍. Mɔ̀ gbe̍ɛ̍ɛn kɛ̍n i̍, mɔ̀ iě wlùh due blě mɔ̀-a nu̍-dɛ̍ iě due nɛ.

¹¹ Kloe-a chɛ̌ bo ùh po̍ ǐn kunǎ ka mɔ̀-a sǔh-a sà-a wɔ̍ɔ̍n i̍-ɛ.

¹² Dɛ̍ ǎn sà-aɛ, ɛ̍ nu̍ mɔ̀-a jɔ-ɛ, nɛ̀ ɔ̍ la̍a̍, “Mɔ̍ Pɔɔ-a nyɔ̍,” nɛ̀ dɔɔ la̍a̍, “Mɔ̍ Apolo-a nyɔ̍,” nɛ̀ dɔɔ la̍a̍, “Mɔ̍ Pitɛ-a nyɔ̍,” nɛ̀ dɔɔ la̍a̍, “Mɔ̍ Klai-a nyɔ̍.”

¹³ Klai nɛ sɔɔ̌n ae? Pɔɔ bo ɔ̀ mɛ̌ dǒ gbàɛ̍ kɛ̍n i̍ tu̍ wlì dǒ mɔ̀-a tàà ɛɛ, àe̍e̍ dǒ Pɔɔ-a nynɛ̌ kɛ̍n bo mɔ̀ poe-ɛ nǐ dlǔ ae?

¹⁴ Ǐn po̍ Nyɔsoa tlɔ̌-ɛ ka ǐn se̍-a mɔ̀-a nyɔ̍ nǐ dlǔ po̍-ɛ, Klepɔ ke Kaeɔ-a tɛ̀ bo ǐn sà-o.

¹⁵ Wɛ̀ nyɔ̍-ɔ je̍e ka nu̍ dǒ ǎn nynɛ̌ kɛ̍n bo mɔ̀ poe-ɛ nǐ dlǔ-a chɛ̀. (

¹⁶ Nɛ̀ ǐn po̍ Slɛfanɔ ke ɔ̍ blǐ gbò nyɔ̍ nǐ dlǔ dɛ ke. Jɛ ǐn se̍-o dɛ̍ i̍ juo pò ǐn po̍ nyɔ̍-o-nyɔ̍ dɔɔ nǐ dlǔ-ɛ.)

¹⁷ Klai se̍ ǐn dbo̍ iě nyɔ̍ nǐ dlǔ po̍, jɛ ɔ̍ dbo̍ m iě pɔ̀n chɛ̀ bla̍. Jɛ ɛ̍ se̍ nyi̍ɔ̍-a flɔ̍nwlùh-u wlu-i kai. Pò ǐn nu̍ la̍a̍n-ɛ, nɛ̀ Klai-a dǒ gbàɛ̍ kɛ̍n i̍ tu̍ wlì mɛ̌ɛ se̍ gbǐh kɛ̍n nɛ mu̍.

Dě Klai ja̍a̍ bo à jě-e Nyɔsoa-a gbǐh nɛ-ɛ ke ɔ̍ flɔ̍nwlùh

¹⁸ Dɛ̍nu̍ɛ, tu̍owli ɛ̀ kɔ̍-a dǒ Klai-a dǒ gbàɛ̍ kɛ̍n i̍ tu̍ wlì mɛ̌ɛ dɛ we̍-ɛ, ɛ̍ wɔ̀ se̍o̍nɛ dǒ nyɔ̍ ùh-a mǎ-aɛ we̍, jɛ àɔ̀ juh-a pǔh-aɛ, nɛ̀ Nyɔsoa-a gbǐh bo ɛ̍ to.

¹⁹ Nyɔsoa la̍a̍, “Ǎn mu̍ flɔ̍nwlùh kɔn nyɔ̍-a flɔ̍nwlùh-u gbɔ̀lɔ, wɛ̀ iě nyɔ̍ ùh juo-a dɛ̍-ɛ, u̍h-a dɛ̍ juo-ɛ gbɔ̀ fǒ-e.”

²⁰ Ti̍laa nyɔ̍ ùh la̍ ùh blě-a flɔ̍nwlùh-ɛ ke, telě nǎ poe nyɔ̍ ke nyɔ̍ ùh la̍ ùh blě-a dɛ̍ᵻ kli̍hgbɛ̍-a gbɔ̀ sà la̍-ɛ, tà u̍h nɛ ɛ? Kaka la̍ Nyɔsoa to ɛ̍ ka kmɔ̌ la ɛ̍ flɔ̍nwlùh nu̍-a bo-ɛa sǔh-ɛ.

²¹ Nyɔsoa nu̍ ɛ̍ dě ɔ̍ flɔ̍nwlùh di̍i̍ wɛ̀ kmɔ̌ nyɔ̍ se̍ ɔ̍ juo-ɛ bɛ̌ɛ dě u̍h naɛ flɔ̍nwlùh di̍i̍. Dɛ̍ à bla̍-a iě kmɔ̌ nyɔ̍-a dǎɛ ɛ̍ se̍o̍nɛ. Nyɔ̍ ùh gbaɛ-a ɛ̍ wlùh-ɛ, u̍h-u bo Nyɔsoa pǔh-i.

²² Juu nyɔ̍ nɔ̀ɔ̍, u̍h-a pɔ̀n jbaɛdih i̍, iě ùh se̍-a Juu nyɔ̍-ɛ u̍h-a pɔ̀n flɔ̍nwlùh i̍.

²³ Jɛ àɔ̀ nɔ̀ɔ̍, à bla̍ Klai-a dǒ tu̍ wlì kɔ̍-ɛ tìh, wɛ̀ Juu nyɔ̍-a dǎɛ ɛ̍ nyɔ̍ tàmlain poe dɛ̍. Iě ɛ̍ wɔ̀ se̍o̍nɛ dǒ ùh se̍-a Juu-ɛ we̍.

²⁴ Jɛ Juu nyɔ̍ ke juh se̍-a Juu Nyɔsoa-a dǎ-aɛ, nɛ̀ Klai bo ɔ̀ nu̍ Nyɔsoa-a gbǐh ke ɔ̍ flɔ̍nwlùh dǒ u̍h we̍.

²⁵ Nyɔsoa naɛ we̍i̍ bo-ɛ nu̍ flɔ̍nwlùh klaa ɛ̍ sìì wlɔ̀ nyi̍ɔ̍ naɛ flɔ̍nwlùh, wɛ̀ ɔ̍ naɛ gbǐh-a mɛ̌-ɛ kmu ɛ̍ sìì wlɔ̀ nyi̍ɔ̍ naɛ gbǐh nɛ-ɛ.

²⁶ Ǐn de̍di̍i̍ᵻ, ka mɔ̀ nɛ-a wɛ̀ Nyɔsoa iě-a mɔ̀ dǎ-aɛ, ɛ̍ bo mɔ̀ iě wlùh we̍ nu̍. Dǒ wlɔ̀ nyi̍ɔ̍ we̍-ɛ, ti̍ ɔ̍ dǎ-a mɔ̀-ɛ, nɛ̀ mɔ̀-a nyɔ̍ dɔu se̍ di̍i̍ i̍ flɔn, wɛ̀ mɔ̀-a dɔu se̍ gbǐh kɔn iě mɔ̀-a dɔu se̍ dě nynɛ̌ chɛǐ sɔ.

²⁷ Jɛ Nyɔsoa tba̍ dɛ̍ ɛ̀ kmɔ̌ la ɛ̍ dǎɛ-a se̍o̍nɛ-ɛ chèɛ̀, wɛ̀ ɛ̍ iě di̍i̍ flɔn nyɔ̍ tɛ̀n nui. Wɛ̀ ɔ̍ tba̍ gbǐh-a mɛ̌-ɛ dɛ̍ chèɛ̀ ɛ̍ iě kmu nyɔ̍ tɛ̀n nui.

²⁸ Dɛ̍ ɛ̀ kmɔ̌ nyɔ̍-a bla̍-a jlǐhɛ̍ dlǔ wɛ̀ u̍h se̍-a dɛ̍ɛ̍ jě-ɛ, ɛ̍ ke ɛ̀ u̍h se̍-a dɛ̍ dǎɛ-ɛ ɛ̍ bo Nyɔsoa-a tba̍ chèɛ̀, wɛ̀ ɛ̍ iě kmɔ̌ nyɔ̍ naɛ gbɔ̀ fǒ-e.

²⁹ Wɛ̀ nyɔ̍-o-nyɔ̍-ɔ je̍e bu̍hᵻ wlù i̍ po̍ dǒ Nyɔsoa jǔ.

³⁰ Ɔ̍ nu̍ ɛ̍ wɛ̀ à ke Jusu Klai nɛ due, iě ɔ̍ nu̍ ɛ̍ wɛ̀ Klai nu̍ à flɔ̍nwlùh ke à i̍ slɛ̌-nyɔ̍. Wɛ̀ Klai nu̍ ɛ̍ iě à kɔn dǒ Nyɔsoa we̍, ɔ̀ sèìe àɔ̀ dě Klai ja̍a̍-ɛ.

³¹ Ɛ̍ tìh-ɛ, Nyɔsoa-a wlu̍ la̍a̍, “Nyɔ̍-o-nyɔ̍ ja bu̍hᵻ wlù i̍ po̍-ɛ, Joi Nyɔsoa dɛ-a bu̍hᵻ bo ɔ̍ iě wlù i̍ po̍.”