Vitendo 12 - Ibibiliya mu Shimakonde Imbodi Yaambi na dimbande dya Imbodi Yakala

Tiyagu ankubyaigwa na Patulu ankungwa

¹ Napanelo muwakati awo umu Elode andítunduvanga kuvapapata vanji vamuliganisha.

² Nae anínshinda na lyambila Tiyagu nung'une Nshuwau

³ na akone kenga shitendo asho vayuda shinkuvanagwela, anínkamula Patulu momo. Avyo vitandeke mumaduva ashikukulu shamagung'u ákave nkukumuku.

⁴ Patulu akakamuligwe, Elode anínjela nkalaboshi kutwala kummikila vipinga nsheshe vyamabulisha váshipishania nsheshe-nsheshe vanshunga pakulota ling'oto lyashikukulu sha Pasaka amuukumu paumbala.

⁵ Bai Patulu àvele nkalaboshi, liganisha lishindashwali vanjugwa Nnungu na dimongo mwaa wake nae.

Njelo ankumumya Patulu nkalaboshi

⁶ Napanelo Elode pashilota antwale akamuukumu, shilo shosho Patulu àlele shing'ati mabulisha mavili vàkamulidile mang'unyang'unya mavili avamuungile, pannango vàpagwite mabulisha váshishunga ikalaboshi,

⁷ mwe! Njelo wake Umu apalá pulumundu, nng'ande nkalaboshi mo uti do, ngwe; njelo kunting'inianga amwimulanga aashidoni, “Takatuka shipajelo!” Muwakati wowo Patulu mang'unyang'unya mmakono mo kulumukanga

⁸ kutwala njelo kushidoni, “Lyunge nkanda wako na ugwale makabasha ako!” Patulu kutandela momo. Njelo kavili kushidoni, “Gwala likoti lyako ungwode!”

⁹ Vauma, Patulu andímwoda kanji àkamanya kenga vyashintenda njelo vivele viu; nae ashona kenga avelé mwindoti.

¹⁰ Vakapite mautu mavili avakushunga, pavawikile pannango ukumene wavitali wavashuumila vauka kunjini, wanavo undíshimuka wene, vanavo kupita kuka vawena mwibalabala imo idikidiki kutwala muwakati wowo njelo kunnambaleka.

¹¹ Patulu apalá kumwida ding'ano kutwala kushidoni, “Napanelo ninkumanya mwiu doni, Umu anintumidya njelo wake kwida nanguposha kumakono kwake Elode na kunguposha muvitendo uti vyavashilota kungutenda vayuda.”

¹² Patulu pamanyite shana uti víshitandeka avilá andyúka mpaka paing'ande imwe Maliya anyoke Nshuwau, Nshuwau jo áshimanyika kwalina lya Malukushi. Popo po, vandíkadyania vanu voe vashwali.

¹³ Akakanyola nnango wakunnango ataa odi kutwala mwali ntumika wapaing'ande walina Loda kuka ndamwitika.

¹⁴ Mwali pamanyite kenga lidi alyo limwe Patulu, nae kwamwaa walipuwilo lyoe andíleka kushimula nnango kutwala kuujila kwavakwoda ndavaulila doni, “Mwenu Patulu panda apa!”

¹⁵ Vanavo kushidoni, “Unaigwa na kudulumbuka ko ni aku!” Nae kuka mushu aashidoni, “Mene mwenu, mwiu!” Vanavo, “Wako, ajo inkuululika kuva njelo wake.”

¹⁶ Kanji Patulu ashindauka mushu akanyola nnango. Vanavo vakashimule, pavangwene vandíshanga namene.

¹⁷ Patulu kung'aniang'anianga nkono kuvamaladya kutwala kuvavalangangila mwamuumididye Umu nkalaboshi kutwala kushidoni, “Tiyagu jo pamo na vanung'unumunu, vavalangangile.” Nae kutwala kuma kuka kulyutu linji.

¹⁸ Napanelo wiko paushwenge, mabulisha ding'ano dyave dindívatindinganianga namene mwaa havashimanya shintandéke Patulu.

¹⁹ Bai Elode andílamulila vannambele kanji havangwene. Nadoni nae andívalalyanga mabulisha avalá kutwala kulamulila kuvatanalanga kutwala kunyema ku Yudeya kuka ndaikala palikaja lya Shashaleya.

Kupela kumwe Elode

²⁰ Napanelo Elode, ashindavavikila namene shitundi venentete va ku Tilu namu va ku Shidoni, vanavo kutwala kunga shipinga kuka nannola ling'oto lyakunshomba Balashitu, mmádengo nang'olo wapaing'ande imwe umu, vandíjugwa pakulota ipagwe amani mwaa shakulya shavashilya mmakaja ave shishaalakela kushilambo shake Elode.

²¹ Napanelo liduva lyankodyanio lyavikíle Elode likawike, andígwalangila dinguvo dyake dyashiumu kuka ndaikala pashiteng'u shashiumu kutwala kutangola na venentete.

²² Bai venentete vashindajunga vaashidoni, “Lidi ali halinava shinu lyamunu vila kanji lyannungu.”

²³ Kutwala popo na popo, njelo wake Umu kunkanyola Elode mwaa hampéle lishangelo Nnungu kutwala kumulya vakoko mmunda kwishidyanneu ntima, kupela.

²⁴ Napanelo lilove lya Nnungu lishindaandavala na vakwoda vashindaanjadyeka.

²⁵ Bai Balinaba namu Saulu pavatandadidye shimadengo shave pa Yelusalemu vandyúma na mumwanda wave vaníntwala Nshuwau aijá áshimanyika kwalina lya Malukushi.