Vapilipo 2 - Ibibiliya mu Shimakonde Imbodi Yaambi na dimbande dya Imbodi Yakala

Jedya kulishapeya kumwe Klistu

¹ Napavedoni, ikava kenga kunkupagwa kwing'a ntima shii kwoekwoe nkati mumwe Klistu, ikava kenga kunkupagwa kupambadyanga kwoekwoe kwalinagwaledyo, ikava kenga unkupagwa upamo woewoe mu Imumu na ikava kenga linkupagwa lilotelo lyoelyoe na shididi,

² bai tadya lipuwilo lyangu liwikile popo, mupagwa mumakumbukililo lolo, muvanavo linagwaledyo lyolyo, muvanavo upamo, mukumbukila shinu shimo tu.

³ Hamunatende shinu shoeshoe kwamashindano na ata kwakulyona kwamambinya kanji kwakulishapeya, kula munu amwone muje kupagwa muwa mwake nae.

⁴ Kula munu angaikange i gweka yake jo mwene kanji namomo yavanu vanji.

⁵ Pakati penu, avanavo ding'anong'ano adi, dyo dipagwíte momo nkati mumwe Klistu Yesu,

⁶ Nae, ata ikava kenga mumavalelo ave Nnungu, hagwene yakulinganana na Nnungu kuva shinu shakung'ang'anikila

⁷ kanji andilishuluwa jo mwene atwala mavalelo antumika na avalekwa mwaing'ope yamunu. Paaneke mumavalelo amunu,

⁸ andílishapeya ava wakwigwilila mpaka kupela, ata kupela panshalaba.

⁹ Napavedoni Nnungu aninkwedya kutwala kumupa lina alilá livéle pashanya pamena uti

¹⁰ pakulota palina limwe Yesu, malundi uti ashidike, kuwa, pai na mwina pai

¹¹ na kula lulimi luvalangange kenga Yesu Klistu ni Umu kwalishangelo lya Nnungu Atata.

Tandedya kwambwalegwa mujopa na mutatamela

¹² Nadoni mmakunagwaleka, kenga mo mwamungwigwilidile ngwengwe, ambi apa i do ngupagwité ako kanji kupunda namene pandikapagwite, tandedya kwambwalegwa kwenu mujopa na mutatamela

¹³ mwaa Nnungu ni ákola madengo nkati mwenu pakulota mwenu mulote na mutandedye kwodananavo amulá munnagwéla nae.

¹⁴ Tandedya kula shinu kwabila kutangadikanga kwali kwamitau

¹⁵ pakulota dashi, muve mmanu múkave makosha na múkave ushapu, mmanavake Nnungu múkave malemba pakati paimbula yavanu vakukangadakanga na vakwashalanga, po pamulangala mwenu pakati pave kenga vyakulangala mushilambo

¹⁶ mùkamulidile lilove lyashingumi kwambangidya muliduva limwe Klistu nangu ngulitamange kenga hangutukwite monyo na ata hangukadile shimadengo shamonyo.

¹⁷ Ata ikava kenga vankungumimina pashanya shadaka na mukutumika muukulangalalela-shadaka kwalikulupililo lyenu, ninkupuwanga na ninkupuwanga pamo namu mwenu.

¹⁸ Nimumo momo, namwenu puwanga na puwanga namu nangu.

Timoti namu Epapoloditu

¹⁹ Ninkulindila nkati mumwe Umu Yesu kenga panikatimangatimanga, nantumidya Timoti kwenu mwenu pakulota nangu nguvenavo ntima shii pangulota kumanya dyabali dyenu.

²⁰ Mwaa hanguvenavo munu junji ávenavo makumbukililo lolo álota kumwangaikangila mwenu mwiu mwiu.

²¹ Vanji uti vaangaikangila vyave i vimwe Klistu Yesu.

²² Kanji napane mwenu mundimanya mana aanakanénge kwake nae mwaa kenga mwana na tatamunu, nae anditumika namu nangu muntenga wambone.

²³ Nadoni ninkulindila nintumidye ako, po pangulota kumanya shana myaa vyangu

²⁴ na ninkuvanavo likulupililo kumwe Umu kenga kwashipajelo ata nene nimwene momo ndaida ako.

²⁵ Kanji napane ndyona do, indivaikila nintumidye kwenu mwenu Epapoloditu, mwanetu, mmádengomwangu na mwing'ondomwangu, jo wamuntumile mwenu na ntumika wa avilá vyangulota nangu

²⁶ mwaa nae ankuvanavo mweshe kwenu mwenu na unindimba ntima pakuva mundigwa kenga nae nnwele.

²⁷ Mwiu nae andíva nnwele ata mpaka kuleka indaja. Kanji Nnungu andimwanangila shididi na i gweka nae ata nangu momo kwambangidya hangunavenavo shipalodi pashanya shipalodi.

²⁸ Nadoni ninkuvanavo dukuduku yakupunda apo yakuntumidya kwenu pakulota pamulota kumwona kavili, mwenu muvenavo lipuwilo na nangu shipalodi shangu shipunguke.

²⁹ Napavedoni, mpwashalele nkati mumwe Umu kwalipuwilo uti na vaishimu vanu vakuva kenga ajo

³⁰ mwaa nae andípela kwashimadengo shimwe Klistu alimyanga shingumi shake pakulota awishe popo ashilá she shibakidíle mukutumika kwenu kwangu nangu.