Valoma 4 - Ibibiliya mu Shimakonde Imbodi Yaambi na dimbande dya Imbodi Yakala

Kwalikulupililo Abulaamu andivalangiligwa ishaliya

¹ Napavedoni, tulota kutangola nyamani vyúkile ndaanalela Abulaamu nakulugwetu kwodananavo unalikola?

² Mwaa ikava kenga Abulaamu aukilé ndavalangiligwa ishaliya kwamwaa washimadengo, bai nae ankuvanavo shakulitamangila kanji i pamevo pake Nnungu.

³ Maandiko ankushidashi? “Abulaamu anínkulupila Nnungu na likulupililo lyolyo lyo vanimmalangilila nae kuva ishaliya.”

⁴ Mwenu, aijá ákola madengo nshala haunavalangiligwa shinu kuva kenga inudyo kanji kenga aki yake.

⁵ Napane aijá ákakola madengo kanji ánkulupila aijá ámmalangilila ishaliya ákave Nnungu, bai likulupililo lyake vanimmalangilila kuva ishaliya.

⁶ Nimumo momo Daudi nanae ankutangola yakwalaligwa kwamunu wammalangilila Nnungu ishaliya yapukanánga na shimadengo,

⁷ “Vandyalaligwa avalá vitendo vyave vyaungave-lilamulo vilivalivígwe, na avalá madambi ave aputangígwe.

⁸ Andyalaligwa aijá wakammalangilila Umu madambi ake.”

⁹ Da kwalaligwa aku kunkuvaukila vakumulígwe gweka kwali namomo vákakumuligwe? Wetu tunkushidoni, likulupililo vanimmalangilila Abulaamu kuva ishaliya.

¹⁰ Napane vammalangilidilé dashi? Vammalangilidilé mukukumuligwa kwali muungakumuligwa? I mukukumuligwa kanji muungakumuligwa.

¹¹ Shimanyikilo shakukumuligwa kwake nae shivele kenga namakong'o waishaliya yalikulupililo muungakumuligwa pakulota dashi, nae ave tatamunu wauti avalá vakulupíla muungakumuligwa kwambangidya navanavo momo vavalangiligwe ishaliya

¹² na yadavo pakulota nae ave tatamunu wa avalá vakumulígwe i gweka vakumulígwe kanji namomo avalá vawéna mudyatuwa dyodyo dyalikulupililo limwe tatagwetu Abulaamu.

¹³ Mwaa hainava shinu kwaindila yalilamulo intadídye Abulaamu pamo na udukulu wake kupata kulivikila yakuva nae nkúpata-maleko ashilambo kanji kwaindila yaishaliya yalikulupililo.

¹⁴ Mwenu, ikava kenga vamulilamulo ni vakupata-maleko, bai likulupililo lyene lyo, halive mana na kulivikila kwene ko, kunditimbikanga.

¹⁵ Mwaa lyo lilamulo lyo, linkwidanavo shitundi kanji napane palikapagwite lilamulo, hakupali kupujungula.

¹⁶ Ni ashi shitádya kulivikila kunanapele mulikulupililo pakulota kwodanenavo umonyo kwambangidya dashi kuke bila kwambambidya muudukulu uti i gweka wamulilamulo kanji namomo aijá walikulupililo limwe Abulaamu, jo tatamunu wetu uti

¹⁷ kenga indyandikigwa, “Nangu ndikupangila wako uve tatamunu waimbumba yavenentete.” Nae ni tatagwetu pamevo pake aijá wankulupidile, Nnungu ávapa shingumi vapadíle na átadya vipagwe víkapagwite.

¹⁸ Ata ikava kenga lilindilililo halipagwíte, mulilindilililo Abulaamu andíkulupila kenga andava tatamunu waimbumba yavenentete kwodananavo mwavamwaulidíle, “Amu ni mwaulatela kuvalela udukulu wako.”

¹⁹ Nae hadabadabénge mulikulupililo paligwene mili wake kuwa àvenavo ulinga wavyaka kenga miya doni na pagwene kuwa kwalutumbo lumwe Shalaa.

²⁰ Kwakulivikila kwake Nnungu, nae hambambidyenge nkati muungakulupila kanji andyuka ndalinanopya nkati mulikulupililo amupa Nnungu lishangelo

²¹ akulupila do, uti avilá vyalivikila Nnungu, vyovyo vyo ankuulula kutandedya.

²² Ni ashi shitádya vammalangilile kuva ishaliya.

²³ Mwenu, malove ala akummalangilila nae kuva ishaliya haandikigwe kwaupande wake nae gweka

²⁴ kanji ata kwaupande wetu wetu momo. Vandatuvalangilila wetu túnkulupila aijá ándyuwidye pakati pavakupela, Yesu Umu wetu.

²⁵ Nae vaninkamudya kwamwaa wakupujungula kwetu na kundyuwa kwakutuvalangilila ishaliya.