Valoma 10 - Ibibiliya mu Shimakonde Imbodi Yaambi na dimbande dya Imbodi Yakala

¹ Mmanung'unumunu, malotelo amuntima mwangu na kujugwa kwangu kwaninjugwa Nnungu ni kulota vanavo vaambwalegwe.

² Mwenu, nangu ninkumya ushuda kwavanavo kenga vankuvanavo dukuduku kwa Nnungu kanji dukuduku yave hainava shinu yalimanyilo

³ mwaa vàvele mukutikinanga ishaliya yake Nnungu na valambela vabuni ishaliya yavo vo vene havalivikile mwina mwaishaliya ailá ya Nnungu.

⁴ Doni, mwisho walilamulo ni Klistu kwambangidya ipagwe ishaliya kwa aijá uti ákulupila.

Lyambwalelo kwa aijá ámwang'ula Yesu kuva Umu

⁵ Mwenu, Musha ankwandika kwaing'ano yaishaliya yalakéla mulilamulo, “Munu átandedya vinu avi, andanama kwaindila yavyanavo.”

⁶ Kanji ishaliya yalakéla mulikulupililo inkushidoni, “Haunatangole shintimatima, ‘Nyani álota kukwela kuwa?’ ” yani amwidenavo Klistu pai

⁷ kwali, “ ‘Nyani álota kushuluka kulitavaleva?’ ” yani amwidenavo Klistu pashanya

⁸ kanji inkushidashi? “Lilove linkupagwa pepi namu wako, linkupagwa nkanywa mwako na muntima mwako,” yani lilove lyalikulupililo lyatuvalanganga.

⁹ Mwaa ikava kenga wako undaang'ula kwaikanywa yako kenga Yesu ni Umu na undakulupila kwantima wako kenga Nnungu anindyuwa pakati pavakupela, undaambwalegwa.

¹⁰ Doni, kwa wo ntima, munu anakulupila kutwala kupata ishaliya na kwa yo ikanywa, munu andaang'ula kutwala kwambolegwa.

¹¹ Kenga mwatangalela Maandiko, “Aijá ánkulupila nae, hatutala.”

¹² Mwaa hakupali kuvilingananga pakati pavayuda na vamidi pakuva Umu jojo ni Umu wavanu uti avaalaliya uti avalá vantambulánga nae

¹³ mwaa “uti aijá átambulanga lina limwe Umu, andaambwalegwa.”

¹⁴ Napane valota kuntambulanga dashi aijá wávakankulupidile? Na valota kunkulupila dashi aijá wávakamwigwite vammalanganga? Na valota kwigwa dashi akapali munu ávavalangangidile?

¹⁵ Na valota kuvalanganga dashi vakatumigwidye? Kenga indyandikigwa, “Kwalala dashi madodo a avalá vavalangánga ntenga wavinu vyambone!”

¹⁶ Kanji i uti vaigwilíla ntenga wambone mwaa Ishaiya ankushidoni, “Umu, da nyani ákulupidile dyabali dyetu?”

¹⁷ Nadoni likulupililo linkwaloka mukwigwa na kwigwa kunkwalakela kwaindila yalilove lyake Klistu.

¹⁸ Kanji nangu ninkudya, da vanavo havaigwite? Elo, vandigwa. “Lidi lyave lindiigwinika mushilambo uti na malove ave mpaka kumwisho shilambo.”

¹⁹ Kanji kavili ninkudya, da vanaishilaeli havaigwite shana? Shitandi Musha atédoni, “Nantadya muvavikile liloko avalá vákave venentete, venentete vákave limanyilo, nantadya muvavikile shitundi.”

²⁰ Kutwala Ishaiya kwakulyalaveka ankushidoni, “Vaningupata avalá vákangulambadile, ndililodya kwa avalá vákashinguudyangidya.”

²¹ Kanji kwamwaa wavanaishilaeli nae atédoni, “Maduva uti ndivanyaladyedya makono venentete vákaigwilila na vakupinga.”