Nshuwau 15 - Ibibiliya mu Shimakonde Imbodi Yaambi na dimbande dya Imbodi Yakala

Yesu ni Nnandi Wiu Wavyepo

¹ “Nangu ni nnandi wiu wavyepo na Atata ni nkúlima.

² Kula lutavi lúkapa vyepo nkati mwangu nae andausha na kula lutavi lúpa vyepo, andapangulangila pakulota lupe namene.

³ Mwenu tayali munditakata kwalilove lyanimmalangangidile.

⁴ Pagwa nkati mwangu na nangu ngupagwe nkati mwenu. Mo mwalukapela lutavi vyepo lwolwene kwabila kupagwa munnandi, namwenu ni momo mukanapagwa nkati mwangu.

⁵ “Nangu ni nnandi wavyepo, mwenu po dinavi. Aijá ápagwa nkati mwangu, nangu kupagwa nkati mwake nae, ajo andápa vyepo vyoe. Doni, bila nangu mwenu hashipali shamulota kuulula kutenda.

⁶ Leka munu akapagwa nkati mwangu, munu ajo akandijalegwa ako kenga lutavi kutwala kujuma. Dinavi adyo vandalakota, kujela pamoto kutwa kupya.

⁷ Mwenu mukapagwa nkati mwangu, malove angu kupagwa nkati mwenu, shoeshoe shamulota, jugwa na vinantandakela momo.

⁸ Ni amu mwapatila Atata lishangelo; mwenu mukapa vyepo vyoe mukalilodya kuva mmakwoda vangu.

⁹ “Mo mwangunagwaladyedya Atata nangu ninkunnagwaledya mwenu; pagwa mulinagwaledyo lyangu.

¹⁰ Mwenu mukaigwilila malamulo angu mundapagwa mulinagwaledyo lyangu kenga nangu malamulo amwe Atata ndiigwililila na ninkupagwa mulinagwaledyo lyake.

¹¹ Nangu nimmalangangila vinu avi pakulota lipuwilo lyangu lipagwe nkati mwenu na lipuwilo lyenu, liwikile popo.

¹² Lilamulo lyangu ni ali: nagwaladyania kenga mo mwaninnagwaladyedya nangu.

¹³ Hapali ávenavo linagwaledyo likumene lyakupunda ali, lyakujaula munu shingumi shake kwamwaa wavavagwe.

¹⁴ Mwenu ni mmavangu mukatandedya avilá vyaninnamulila nangu.

¹⁵ Haninshema kavili kuva mmatumika mwaa ntumika hanamanya shatenda nang'olo wake; mwenu napane ninkunshema kuva mmavangu mwaa uti vyangwigwite kumwe Atata, nintadya mumanye.

¹⁶ I mwenu múngutandwele, ila ni nangu níntandwele mwenu na kuntenda muke mukape vyepo na vyepo vyovyo vyo, havinaunde pakulota shoeshoe shamulota kunjugwa Atata palina lyangu, nae amupe.

¹⁷ Ali ni lilamulo lyangu: nagwaladyania!

Shilambo shindavavangedya vakwoda

¹⁸ “Napanelo shilambo shikammangedya, manya kenga shitandi shinguvangadidyé nangu.

¹⁹ Leka mùvele mmashilambo, shilambo shikaninnagwaledya pakuva mmake. Doni, pakuva mwenu po hamunava shinu mmashilambo kanji nangu mushilambo amu nintandola, ni ashi shitádya shilambo shimmangedye.

²⁰ Kumbukila malove animwaulidile, ‘Ntumika hanampunda nang'olo wake.’ Ikava kenga vaningupapata, namwenu momo vanampapata na ikava kenga vandiigwilila lilove lyangu, namwenu momo lyenu lyo, vandaigwilila.

²¹ Vanavo mwenu vanantenda davo kwamwaa walina lyangu pakuva havammanyite aijá ángutumididye.

²² Leka ndikaidile ndatangola na vanavo, vakanavenavo madambi. Napane ambi apa, madambi ave hampali mwakwinikidyangidya.

²³ Ánguvangedya nangu, ankummangedya Atata.

²⁴ Leka ndikatandile vinu vyakanava kutenda munu woewoe pakati pave, vakanavenavo madambi. Kanji napane vanavo vandyona kutwala kunguvangedya nangu namomo kummangedya Atata.

²⁵ Napane avi uti vinditandeka pakulota shiwikile popo ashilá shaandikíke mu Lilamulo lyave doni, ‘Vaninguvangedya pashikapali.’

²⁶ “Napanelo palota kwida aijá nkúpambadyanga wangulota kuntumidya kwaloka kumwe Atata, Imumu Waumwiu áalakela kumwe Atata, nae jo andaumya ushuda wangu nangu.

²⁷ Namwenu momo mundaumya ushuda wangu mwaa mwenu mundípagwa namu nangu tangu kunantandi.