Mateu 4 - Ibibiliya mu Shimakonde Imbodi Yaambi na dimbande dya Imbodi Yakala

Ndamoni ankunninga Yesu

¹ Napanelo Imumu aníntwala Yesu kumuukanavo kushimbweshe pakulota atubigwe namu Ndamoni.

² Nae akaunga maduva alubaini shilo na mui na ikankola indala.

³ Bai nkútubya andímwidila ndamwaulila, “Wako ukava umwanagwe Nnungu, lamulila majanga ala ajalukange ave magung'u!”

⁴ Yesu napane kushidoni, “Um! Indyandikigwa doni, ‘Munu hananama ligung'u gweka kanji andánama kwakula lilove lyúma nkanywa mwa Nnungu.’ ”

⁵ Ndamoni kuntwala Yesu kumuukanavo mpaka kunjini wakwilimyanga nammika panantutuvilo waing'ande ya Nnungu

⁶ kutwala kumwaulila doni, “Wako ukava umwanagwe Nnungu, daloka apa ukagwilile pai mwaa indyandikgwa doni, “ ‘Nnungu andavalamulila vanjelo vake, kwamwaa wako wako. Vanavo vandakudong'a, pakulota haunalijajede palijanga.’ ”

⁷ Yesu napane kushidoni, “Namomo indyandikigwa doni, ‘Haunanninge ntima Umu Nnungu wako.’ ”

⁸ Ndamoni kuntwala kavili Yesu kumuukanavo pashanya lishinga lyakulepa nannodya utawala uti wamushilambo shapai na kunnodya lishangelo lyake

⁹ kumwaulila doni, “Ukanguguguvalila na kulipudya kwangu nangu, uti avi ndakupa.”

¹⁰ Yesu napane kushidoni, “Kuka apa Shatwani! Mwaa indyandikigwa doni, ‘Lipudye kumwe Umu Nnungu wako na untumikile jojo bai.’ ”

¹¹ Bai Ndamoni anínneka. Mwe! Vanjelo kwida nantumika.

Yesu ankutunduvanga shimadengo shake

¹² Napanelo Yesu paigwite doni Nshuwau andyungwa, nae andyúja kuka ku Galileya.

¹³ Akanyema pa Nashaleti kuka ndaikala ku Kapalanaumu njini uvéle nanyenje litanda kwisemu ya ku Shebuluni namu Naputali

¹⁴ pakulota liwikile popo lilove litangaléke kwaindila yankúlava Ishaiya kushidoni,

¹⁵ “Shilambo sha Shebuluni na shilambo sha Naputali, kulodya nkono wakulitanda, mwangu unji walundi lwa Yudani, Galileya shilambo shavamidi,

¹⁶ Venentete váshinama mushii, vandyona lilangadyo likumene vila ali, vanu váshinama mushilambo shashimbedi shiídanavo kupela, lindivamulikila lilangadyo.”

¹⁷ Napanelo kutunduvangila muwakati wowo wo, Yesu andítunduvanga kulaililila aashidoni, “Lijugulange mwaa utawala wakuwa undivandika.”

Yesu ankuvashema vakwoda vatandi

¹⁸ Napanelo Yesu apita awena nanyenje litanda lya Galileya, andívona vanung'unumunu vavili, Simoni wavanshema Patulu pamo na nkulumunu Andaleya vateja dingau dyave mulitanda. Vovo vo, shimadengo shave shivele shakwaka dyomba.

¹⁹ Nae kuvaulila kushidoni, “Ngwoda! Nangu nantenda muve mmanu mmakuvaka vanu.”

²⁰ Vanavo kulakenneu dingau dyave, kumwoda.

²¹ Paukile mushu padyoko kuvona vanung'unumunu vanji vavili, Tiyagu na nung'unumunu Nshuwau vanavake Shebedeu vatataliyanga dingau dyave mwingalava pamo na tatagwave, nae kuvashema.

²² Vanavo kunnakenneu tatagwave na ingalava yo, kumwoda.

Yesu dinkumwidila dimbumba dyoe

²³ Napanelo Yesu ashindatanela makaja a ku Galileya apita apundisha muvitala vyave vyakulipudidya avalanganga ntenga wambone wautawala, aponia vilwele na mauvilo uti kwavenentete.

²⁴ Nadoni shimbili shake shindyúmanikanga mushilambo uti sha Shiliya, venentete vashindavaidanavo kwake nae vanu vavénavo mauvilo akuvilingananga na malwele, vamajini, vashalala na vakulamala kutwala nae kuvaponia.

²⁵ Nae dishindamwoda dimbumba dyoe dya ku Galileya, dya ku Dekapolishi, dya ku Yelusalemu, dya ku Yudeya na dyakumwangu unji wa Yudani.