Maono 15 - Ibibiliya mu Shimakonde Imbodi Yaambi na dimbande dya Imbodi Yakala

Vyaushanga saba vyamwisho

¹ Napanelo kuwa ko nindyóna shimanyikilo shinji shikumene na shakutikinikanga: vavele vanjelo saba vànyukete vyaushanga saba vyamwisho, muvyaushanga avyo ni pashiwikila popo shitundi shake Nnungu.

² Nindyóna shinu mwaimanga yashilolo yanganikéne na moto, popo po vàimilenge avalá ve vantamíle lidimu, lishanamu lyake na inamba yalina lyake. Mmakono mwave vàkamulidile dikanyembe dyake Nnungu

³ akuno vaimba lwimu lumwe Musha ntumika wake Nnungu na lwa Ngandolo: “Makango, vitendo vyako, vìkumene, Umu Nnungu Wadimongo-uti. Dindila dyaishaliya dyaumwiu, dyàko, Umu wavenentete.

⁴ Da nyani ákakujopa wako Umu? Na nyani ákaing'a lishangelo lina lyako? Mwaa wako gweka ni wakwilimyanga, venentete uti vandaida kwako ndalipudya, vitendo vyako vyaishaliya vindililodya ngala.”

⁵ Napanelo vikapite avyo ndyóna kuwa ing'ande ya Nnungu ìshimwike yani yema yaushuda.

⁶ Mo nng'ande mo kuma vanjelo saba vávenavo vyaushanga saba. Vanavo vàgwalenge dinguvo dyakutakata dyakumalameta kutwala muvyuva vyave kulyunga mikanda vyalangi yashaabu.

⁷ Napanelo shiumbi shimo pakati pa avalá nsheshe andíjaula midamu saba vyashaabu kuvapa avalá vanjelo saba, midamu avyo vyùmbele shitundi shake Nnungu ánama ngwengwe ngwengwe.

⁸ Bai mwing'ande amulá lindyúmbala lyoi lyalishangelo lyake Nnungu pamo na dimongo dyake. Vikanava kuwikila popo avilá vyaushanga saba vyavanjelo saba, hapali áshuulula kwinjila nng'ande amo.