I Vakolintu 5 - Ibibiliya mu Shimakonde Imbodi Yaambi na dimbande dya Imbodi Yakala

Nkúlauka mmingange

¹ Kwamwiu, inkuvalangangigwa kenga kwenu mwenu kunkupagwa kulauka, kulauka kúkapagwite ata kwavakammanyite Nnungu ata mpaka munu kulanavo ndyagwe tatake.

² Napane mwenu kutwala kulitenda kuva mmakulyona! Leka apo hamunavenavo shipalodi kutwala kumminganga átandile shitendo asho pakati penu?

³ Ata ikava kenga nangu hangupali kwamili ninkupagwa namu mwenu mwimumu, nadoni kenga ngúpagwite popo po, nimuukumu tayali átandile shitendo asho.

⁴ Pamulota kukadyanianga palina limwe Umu wetu Yesu, imumu yangu ìpagwite pamo na dimongo dimwe Umu wetu Yesu,

⁵ nkamudye munu ajo kumwe Shatwani akabamalegwe shimunumunu kwambangidya imumu yake yambolegwe muliduva limwe Umu.

⁶ Kulyona kwenu hakunava shinu kwambone. Da mwenu hamunamanya shinu kenga nkukumuku padyoko unátadya likamu uti kukukumuka?

⁷ Ushanianga nkukumuku wakala pakulota muve likamu lyaambi kenga mwiu hamuve nkukumuku mwaa ngandolo wetu wapasaka Klistu jo, vaninshinda.

⁸ Nadoni tukukulule shikukulu kanji i kwankukumuku wakala, nkukumuku wavyakunyata na vyaukalau kanji kwamagung'u avakataile nkukumuku, magung'u ashalowa na aumwiu.

⁹ Nimwandikila mwibalugwa doni, hamunalyunganiange na vanu vakulavalava.

¹⁰ Avi hangunavamba shinu vakulavalava vashilambo ashi na ata vashojo, vakutindinganianga kwali valipúdya kwavakushang'apa. Leka ive davo mwenu ikanimmaikila mume mushilambo amu.

¹¹ Kanji napane nimwandikila mene kulyunganianga na woewoe wavanshema nung'unumunu kanji ava nkúlavalava, washojo, wakulipudya kwavakushang'apa, nkúng'wenya, nkwámbalwa kwali nkútindinganianga. Kwamunu wantindo au, mwenu ata mpaka hamunalyenavo.

¹² Da shangu nyamani yakulota nangu kuvaukumu vanu vákapagwite muliganisha? Da haivaikidile mwenu kuvaukumu vo vavé muliganisha amu?

¹³ Nnungu ni álota kuvaukumu avalá vavéle panda. “Mmingange nkalau pakati penu.”