I Vakolintu 10 - Ibibiliya mu Shimakonde Imbodi Yaambi na dimbande dya Imbodi Yakala

Lidumilo kwamwaa wavanaishilaeli

¹ Mmanung'unumunu, ninkulota hamunatikinange kenga vanakuluvetu uti vandípagwa mwina lyundi na uti vandípita mwimanga,

² uti vanavo mulyundi na mwimanga vandíbatishwa nkati mumwe Musha,

³ uti vandílya shakulya shimo shosho shaimumu,

⁴ uti vandíkumbila medi lolo aimumu; doni vanavo vandíkumbila kwalakela mulijanga lyaimumu alilá líshivoda, lijanga lyo àvele Klistu.

⁵ Kanji napane voe pakati pave Nnungu andívanyatila mili vyave vilalange mangunda kushimbweshe.

⁶ Mwenu, vinu avi vinditandeka kenga mpano kwetu wetu kwambangidya hatunavikile liu vyakunyata kenga mwavatandalele vanavo

⁷ na ata hamunave mmakulipudya kwavakushang'apa kenga vanji pakati pave, kenga indyandikigwa, “Venentete vandiikala kulya na kukumbila kutwala kutakatukanga, kupikita.”

⁸ Na ata hatunalavalave kenga pakati pave vanji vandilavalava kutwala kupalanga vanu dyalupu ishilini na tatu muliduva limo.

⁹ Na ata hatunanninge Klistu kenga vanji pakati pave vanínninga kutwala kubamalegwa kwadinyoka.

¹⁰ Na ata hamunatangadikange kenga vanji pakati pave vanditangadikanga kutwala kubamalegwa na Nkúbamola.

¹¹ Avi uti napane vanavo vindivatandeka kenga mpano na vindyandikigwa pakulota kutuduma wetu túnama wakati au wamwisho.

¹² Nadoni aijá áona kenga andinanopa, alilaledye kwambangidya hanagwe.

¹³ Hapali malingo amuvauvanga mwenu pakava akawaida mushinamidyo shavanu. Nnungu ni wakukulupilika, nae hanneka mwenu mutubigwa kupunda shilinga shenu kanji pamo na kutubigwa, nae andamupa mwenu mwashi mwakushumbila pakulota muulule kulipililila.

Tukuta vikukulu vyavavatandela vandamoni

¹⁴ Napavedoni mmakunagwaleka vangu, tukuta mukulipudya kwavakushang'apa.

¹⁵ Ngutangola namu mwenu kenga mmanu mukumbukila; lalyanga mwemwe mmene avi vyangutangola.

¹⁶ Da i mwiu luwene lwakwalaligwa alulá lwatulambwalela, hakunava shinu kuliinjidyanga mumyadi vimwe Klistu? Ligung'u lyatumajana hakunava shinu kuliinjidyanga mumili umwe Klistu?

¹⁷ Pakuva ligung'u livelé limo, wetu ata tukava tuvoe tuvelé mili umo mwaa wetu uti tunkumajana ligung'u lyolyo limo.

¹⁸ Valole vanaishilaeli mwavavalalele mushimunu; da avalá válya vyadaka, havanava shinu vakuliinjidyanga vyapalutali?

¹⁹ Da ngulota kutangola nyamani? Da shadaka shavavaumididye vakushang'apa shinkuvanavo mana? Kwali nnungu wakushang'apa ankuvanavo mana?

²⁰ Mene! Ngulota kushidoni, ashilá shavaumya, vavaumidya vandamoni i Nnungu. Doni, hangunalota shinu mwenu muke mukave mmakuliinjidyanga na vandamoni.

²¹ Mwenu hamuulula kukumbilila luwene lumwe Umu na luwene lwavandamoni, hamuulula kuliinjidyanga pandamu umwe Umu na pandamu wavandamoni.

²² Da doni po, tulota tuntae liloko Umu? Da wetu tunkuvanavo dimongo kumpunda nae?

Tenda uti kwalishangelo lyake Nnungu

²³ “Vinu uti vindilamuliligwa,” kanji i uti vingupwashéla. “Vinu uti vindilamuliligwa,” kanji i uti vidénga.

²⁴ Munu hanalambele wambone wake jo mwene kanji wamunu junji.

²⁵ Alya uti avilá vyavashumidya pashakoni bila kuudyangidya kwamwaa wamakumbukililo amuntima

²⁶ mwaa, “shilambo shimwe Umu na uti vipagwíte nkati mwake.”

²⁷ Munu ákakulupila akakulalika kutwala wako kuka, alya uti avilá vyalota kukuvikila bila kuudyangidya kwamwaa wamakumbukililo amuntima.

²⁸ Kanji munu akakwaulila doni, “Shakulya ashi vaumidyé kenga shadaka,” haunalye kwamwaa wamunu aijá ákwaulidile na kwamwaa wamakumbukililo amuntima;

²⁹ hangunamba shinu makumbukililo amuntima mwako kanji amunu ajo. Da mwaa shani unaiti wangu nangu uke ukaukumigwe na makumbukililo avanu vanji?

³⁰ Ikava kenga ninkuliinjidyanga mukulya ngulambwalela mwaa shani ngutangadikangigwe kwashinu shangulambwaladile?

³¹ Napavedoni, ikava kenga munkulya kwali munkukumbila kwali munkutenda shoeshoe, tenda kwalishangelo lyake Nnungu.

³² Hamunavatadye shinyadinyadi vayuda kwali ata vagalegu na ata liganisha lya Nnungu

³³ kulingana mo mwandivanagwaladyedya nangu vanu uti muuti mene kulambela paida yangu kanji yavanu voe pakulota vaambolegwe.