I Nshuwau 1 - Ibibiliya mu Shimakonde Imbodi Yaambi na dimbande dya Imbodi Yakala

Lilove lyashingumi

¹ Lilove lyashingumi jo, andípagwa kutunduvangila kunantandi: wetu nae tundimwigwa, tundimwona na mevo etu, tuninnalyanga shana na tuninkamulanga tuvene kwamakono etu,

² ata jo shingumi andililodya, wetu tundimwona, tundyumya ushuda kwamwaa wake na wetu tunimmalangangila mwenu aijá shingumi shíkamalilika e apagwíte kumwe Atata kutwala kulilodya kwetu wetu.

³ Aijá watungwene na watumwigwite, tunkummalangangila mwenu momo kwambangidya namwenu muvenavo upamo namu wetu, namwiu upamo wetu unkupagwa namu Atata pamo na Mwanagwe, Yesu Klistu.

⁴ Namomo tunkumwandikila vinu avi pakulota lipuwilo lyetu liwikile popo.

Nnungu ni lilangadyo; tuwene mulilangadyo

⁵ Mwenu, ntenga watumwigwite nae na watummalangangila mwenu ni au: jo Nnungu aju ni lilangadyo kwake nae shii hashipali.

⁶ Ikava kenga tunkushidoni, tunkuvanavo upamo namu nae kanji tuwena mushii, tunkushang'apa hatunatandedya shinu umwiu.

⁷ Kanji tukawena mulilangadyo kenga mwapagwididye nae mulilangadyo, tunkuvanavo upamo kula munu kwamuje na myadi vimwe Yesu, jo Mwanamunu vinkutuushanianga ushapu wamadambi uti.

⁸ Ikava kenga tunkushidoni hatuve lidambi, tunkuliduwanga wewe tuvene na nkati mwetu haupali umwiu.

⁹ Kanji tukalyaula madambi etu, nae ni wakukulupilika na waishaliya pakulota kutulivaliva madambi etu na kutuushanianga ushapu waungave-shaliya uti.

¹⁰ Ikava kenga tunkushidoni hatutagile, tunkummika Nnungu kuva nshwang'a na lilove lyake nkati mwetu, halipali.