II Vakolintu 6 - Ibibiliya mu Shimakonde Imbodi Yaambi na dimbande dya Imbodi Yakala

¹ Napane, tukola madengo namu Nnungu tunkunnaililila hamunapwashalele bule umonyo wake Nnungu.

² Mwaa nae atédoni, “Nangu ndikwigwa muwakati uvaikidíle, ndikupwashela muliduva lyakwambola.” Mwenu, au ni wakati uvaikidíle. Mwenu, ali ni liduva lyakwambola.

Mauvilo amwe Paulu mukutumika

³ Hatumpele munu ishaliya yakulota kulikuvala kwambangidya utumika wetu, haunaaneke makosha.

⁴ Leka apo, nkati muvinu uti tunkulilodya kenga tuvatumika vake Nnungu, nkati mukulipililila kwoe, mumauvilo, muwou, muvyakujowa,

⁵ mukushapigwa viboko, mukungwa, muvijungulima, mushimadengo shakupwateka, muushilo bila lwono, mwindala,

⁶ kwaungave-ushapu, kwalimanyilo, kwakulipililila, kwalitananilo, kwa Imumu Wanashwe, kwalinagwaledyo líkave shinankulaba,

⁷ kwalilove lyaumwiu, kwadimongo dyake Nnungu, kwadyuti dyaishaliya kunkanakono na kunshanda,

⁸ nkati mukwishimika na mukwiludyangigwa, mukupata shimbili shakunyata na shambone, twaneka kenga tuvakushang'apa kumbe tuvelé tuvaiu,

⁹ kenga túkamanyika kumbe tunkumanyika namene, kenga túpela kumbe mwe, tuvangumi, kenga túpata shaushanga kumbe patukabyaigwa,

¹⁰ kenga túvenavo shipalodi kumbe ngwengwe tunkupuwanga, kenga tuvamashikini kumbe ni túvatadya voe vatajilike, kenga túkave pashinu kumbe tunkuvanavo uti.

¹¹ Tunditangola ngala namu mwenu mmakolintu; ntima wetu uvelé mwandwa.

¹² Wetu hatunandivilila shinu mwenu ila mwenu munkudivililigwa kwalilotelo lyenu kwetu wetu.

¹³ Napane kwakubadilishania, ngutangola namu mwenu kenga mmana mmadikidiki, ungula momo mitima vyenu.

Hamunalyunge likangoti na vákakulupila

¹⁴ Hamunalyunge likangoti namu vákakulupila. Mwaa ipagwité imbodi shani pakati paishaliya na ungave-lilamulo? Kwali upagwité upamo shani pakati palilangadyo na shii?

¹⁵ Da lipagwité lyunganilo shani pakati pamwe Klistu namu Shatwani? Kwali imbande shani yajavananga nkúkulupila namu ákakulupila?

¹⁶ Da lipagwité lyunganilo shani pakati paing'ande ya Nnungu na vannungu vakushang'apa? Mwaa wetu ni ing'ande ya Nnungu mumi. Kenga mwatangalela Nnungu, “Ndatenga lyutu kwavanavo ndawena pakati pave, nangu ndava Nnungu wave, vanavo vandava venentete vangu.”

¹⁷ Napavedoni, “Lyumadyange pakati pave, vaambukange, atangola Umu, hamunakamule shinu shishapu na nangu nampwashalela.

¹⁸ Nangu ndava tatamunu kwenu na mwenu mundava mmana valume na vakongwe kwangu nangu, atangola Umu Wadimongo-uti.”