Yowɛli 3 - ALLALA KUMƐ

Sibolenu Kiti-Koe Alla Bolo

¹ Wo wati wa ke, Yuda anubɛ Yerusalɛm kɛnu bi nya min nun fen-tigiyɛ la, Mari ko a si wo lasɛgi wo gbɛ rɔ wo nya na tun.

² A ko a si sibole bɛɛ kundɛn lɛɛ do rɔ min tɔgɛ Kiti Sa Lɛɛ. A ko a si anu kiti nyɔ rɔ ka a tɛgɛ anu bara min ma wole, ata mɔgɛnu na. A ko anu bara wole, Isirɛla mɔgɛnu tanyɛnsɛn duninya-tonko-nanɛ bɛɛ rɔ ka wola nyamanɛ tala anu nyɔgɔn na.

³ Mari ko anu bara korɔn lakɛ mɔgɔ-biranɛ wonuna ko la iko siyaman, ni min si to min ye. Anu ya Isirɛla den-keinu fɛlɛn alako anu ni yɛlannu-sarɛ sɔrɔn. Anu ya Isirɛla sunkurɔnnu ma baan-sɔnkɛ la.

⁴ Mari ya Filisiti nyamanita-mɔgɛnu anubɛ Taya anubɛ Saidon so-burɔ-mɔgɛnu manyinika, ni anu bi min mala kɛ la, ni anu bi ale Mari tayili sara le la wo rɔ. Nba, ni wo le, ale Mari ko ale fanan si a tayili sara anu na tiriya!

⁵ A ko wo ara ata sɛnɛ anubɛ wodi-gbɛnu bi ka ta wonu na wola bɛsi-kɔ-tinɛnu tɔ.

⁶ A ko wo ara ata mɔgɛnu bira Yuda nyamanɛ anubɛ Yerusalɛm soe burɔ ka ta anu mayira Kirisi kɛnu ma pon!

⁷ Kɔnɔ a ko kaka, wo ara ala mɔgɛ minnu mayira, a si na wonu na tun ka bɔ kan tinɛ wonu tɔ. A ko a si a ma, wole fanan na iko wo ara a ma ata mɔgɛnu na nya min.

⁸ A ko ale nyɛrɛ si a ma, Yuda nyamanita-mɔgɛnu ni wola dannu san ka ta anu mayira Sabiya kɛnu ma pon! Ale Mari kan le kɛ la.

⁹ Wo ni kɛ fɔ bɛɛ ye duninya rɔ ko, “Bɛɛ ni a rabɛn kɛlɛla ko la. Wo ni wola kɛlɛ-kurugbɛnu kele. Wola kɛlɛ-dan bɛɛ ni anu gbɛrɛn anu nyɔgɔn ma ka kɛlɛ labui anu yogenu ma.

¹⁰ Wola nunakɛnu ni wola dɛɛnu gbesi faannu na wo ye ka wola sɔnbɛnu gbesi tanbɛnu na. Hali mɔgɔ-rafaganɛnu ni kɛlɛ kɛ.

¹¹ Wole sibole minnu bi Yuda nyamanɛla foolɛ rɔ, wo ni wo latiriya nala ka wo kun bɛn lɛɛ rɔ.” E, Mari, ila kɛlɛ-dannu nayigi anu kan ma.

¹² Mari ko, “Fɔ sibole wonu ba anu tabɛn kɛlɛ-kɛ-koe la ka na Kiti Sa Lɛɛ rɔ. Sibole minnu bi wola foolɛ rɔ, n si anu kiti lɛɛ wo rɔ.

¹³ Anu wunduyogo dɔgɔma-ma-de! Wo ni anu kunyɛ tɛgɛ a daga rɔ iko fui-fen-tɛgɛtɛ. Wo ni anu burun sagbayi, iko mɔgɛ wa numunu-siyamɛ burun, a yi-lamara-tinɛ la ni fa, ado ni anu hakɛnu mara yi wo la, a lamara tinɛ bɛɛ la si fa tɛf!”

¹⁴ Mɔgɔ waga yirika-siyaman nadɛnnɛ Kiti Sa Lɛɛ kɛ rɔ. Marita tele si anu taran lɛɛ wo rɔ.

¹⁵ Tele anubɛ karɛ si fin wulɔn. Hali lolenu, anu mɛlan ti yen.

Alla Duwa-Koe Ala Mɔgɛnu Ye

¹⁶ Mari kulu-mayɛlɛnɛ si bɔ Yerusalɛm kɔnkɔ-sɛnimɛ kuma. Dugi anubɛ san-kole si yɛrɛyɛrɛn. Kɔnɔ hali wo, a si ala mɔgɛnu kumafunfan.

¹⁷ A ko wole, Isirɛla mɔgɛnu si a lɔn wati wo rɔ ko wota Mari Alla le ale la. A ko ale le ye a mayigila ata kɔnkɔ-sɛnimɛ kuma. A ko Yerusalɛm soe si ma so-sɛnimɛ la. Sibolo-gbɛrɛnu ti nɔ-ko sɔrɔn a ma tun!

¹⁸ Mari ko wo wati si a taran, kɔnkɛnu yamatogonnɛ ki-fannu na. I tara kɔnkɔ-wo-kɔnkɔ ma, i si kolo-fannu taran nyɔ, wo si minnu burun. Yi-worɔn min bɛɛsi ye Yuda nyamanɛ rɔ, wo bɛɛ la si fa yi la tɛf! Tenke do si bɔ Mari Bato-Bɔn la ka yigi lɛɛ do rɔ min tɔgɛ Akasiya lɛɛ.

¹⁹ Mari ko Iyipiti si ma wula-da-rakolɔn la. Idɔm si ma nyamani-kasaranɛ la. Wo ye mala bawo anu nara bui Yuda nyamanɛ ma ka mɔgɔ-magbalanɛnu faga nyɔ.

^20-21 Mari ko a si wonu tayili sara. A ko mɔgɔ-yilikinɛ wonu ti to anu niyi la. Yuda nyamanɛ anubɛ Yerusalɛm soe rakolonyanɛ ni taran muk, ado Mari ko a mayiginɛ si to Yerusalɛm a Bato-Bɔn la tolon!