Yowɛli 2 - ALLALA KUMƐ

Kɛlɛ-Den-Siyamɛ Na-Koe

¹ Wo ni mɔgɛnu-nalɔn-buri fɛ Bato-Bɔn la Yerusalɛm soe burɔ. Wole Yuda nyamanita-mɔgɛnu, wo ni yɛrɛyɛrɛn kilan bolo bawo Mari natoe le, ado wo wati ara gbɛrɛn.

² Pinpi si burun wo kuma wulɔn. Wo yisi si pirinkan. Kɛlɛ-den-siyamɛnu tɔnkɔnyɔ si na iko banda-finyɛ si ta sala tele ya-ma nya min. Wo nyɔgɔn kɛlɛ-den ma na wɛ, ado wo nyɔgɔn ti na tun.

³ Anu bi ki-fannu banna le iko tɛ ye bin-gbalɛ banna nya min. Mala nyamanɛ mani de anu ya rɔ iko Alla ya nakɔɛ min nadan ma benba Hadama ye. Anu ba bɔ kan min, nyɔ si ma iko wula-da-rakolɔn. Anu ti tenbi fenfen na.

⁴ Anu makilannɛ iko soee-kɛlɛ-kɛlɛnu. Anu bi anu burila iko soee-kɛlɛ-tatalɛnu.

⁵ Anu tenbi kɔnkɔ yigi-ni-yɛlɛ kɛla, anu ta-kan ye bɔla iko kirindinu. Anu sɔnkɔ-kan ye tala bɔla iko tɛ tenbi kalɛ la. Anu tabɛnnɛ sɔnɛ anu sansan-yili ma kɛlɛ-kɛ-koe la.

⁶ Anu tenbi gbɛrɛnna kan tinɛ min ma, nyɔ-mɔgɛnu bi kumakɔla kilan bolo.

⁷ Anu bi tugula nya-kun-kelen iko anu makaranta nya min. Anu bi yɛlɛla tarɛnu ma iko kɛlɛ-kɛla-nyananu. Anu bi tala sekeke! Anu ti kilɛ maka doni-bɛrɛn.

⁸ Anu bi tala biriti-biriti! Anu sa tugula anu nyɔgɔn na. Fenfen ti kilɛ tɛgɛ anu ma.

⁹ Anu bi tugula soenu kan ma ka yɛlɛ tarɛnu ma. Anu bi yɛlɛla san-bɔnnu na ka don wundannu na iko kankannu.

¹⁰ Anu kinta-kan ye dugi layɛrɛyɛrɛnna. San-kole fanan bi yɛrɛyɛrɛnna. Tele anubɛ karɛ si fin. Hali lolenu, anu mɛlan ti yen.

¹¹ Mari ye kumala ala kɛlɛ-dannu ye iko san-sɛran, ado kɛlɛ-dan wonu bi ata kumɛ birala. Anu kolo gbɛlɛ, ado anu siya. Marita tele-makilannɛ wo, yon si ke a muinna wo kɔrɔ?

Tubi-Koe Makawandilɛ

¹² Mari ko wo ni sunyɛ don ka di. Wo ni tubi bɛrɛbɛrɛkɛ kaka ka wo fan nasɛgi a ma.

¹³ Wo kana wola durukinu tafara yisi-tinya bolo tun kɔnɔ a ko wo ni tubi-yisi-bɛrɛbɛrɛ sɔrɔn. Wo ni wo ya-lamunun wota Mari Alla la bawo wo di a ye, ado a nyimayanɛ wo ye. A fonde ti bɔ yona, ado ala keninteyɛ kolo. A rabɛnnɛ wo makoto-koe la, wo tɔrɔ ko ma de!

¹⁴ Tumado, wota Mari Alla si a miriya yɛlɛma ka kinikini wo ma alako wola fui-fannu anubɛ wola ki-fannu si sabati nya min. Wo si a ma, wo ni ke dɛgɛ-munku-sarakɛ anubɛ minni-sarakɛnu dila a ma tun.

¹⁵ Wo ni mɔgɛnu-nalɔn-buri fɛ Bato-Bɔn la Yerusalɛm soe burɔ. Wo ni mɔgɛnu nakundɛn alako anu ni sunyɛ don.

¹⁶ Wo wa ban mɔgɛnu nakundɛnna, wo ni anu sɛninya iko tɔn ya a fɔ nya min. Wo ni kinanu kele. Wao ni dennɛnu fanan kele. Hali minnu dɛ ye kinyɛ la, wonu fanan ni bɛn a rɔ. Hali kei min ban-san musi furula, wonubɛ ala musi ni anuna bɔn boloka ka na.

¹⁷ Wole saraka-masɔlɛ minnu bi wɔlila Mari ye saraka-mintan-tinɛ anubɛ Bato-Bɔn don-dɛ tɛma, wo di ka Alla matara. Wo ni a fɔ ko, “Mari, kinikini ila mɔgɛnu ma. I yandi, i kana sɔn, sibolo-gbɛrɛ-mɔgɛnu ni yɛlɛn ma ma ka a fɔ ko kɛnuta Alla ye mintɔ?”

Dugu Lakurayɛ Lanyiri Mari Bolo

¹⁸ Wo wa ban tubila, Mari si a miri ala mɔgɛnuta nyamanɛ ma tun ka kinikini ala mɔgɛnu ma.

¹⁹ Wo kɔma, Mari si a fɔ wo ye ko a si dɔn-fan anubɛ minni-fan anubɛ tuli di wo ma min si na wo wasa. Wo si a ma, sibolo-gbɛrɛ doinu ti wo ma yɛlɛnma-fan la tun.

²⁰ Kɛlɛ-den-siyamɛ minnu nara ka bɔ kantɔ-wara la a ko a si wo doinu kunyɛ lasɛgi a rɔ wulɛ wara la. Kɛlɛ-den yarɔ-sɔlɛ wonu si ta bui Dalɛ-Faganɛ rɔ. Minnu bi kɔma, wonu si ta bui Mɛdetereniyan Kɔgɔ-Yi rɔ. Wonu suyi-suma-titi-wɛ si bɔ. A ko a si kɛlɛ-dan wonu dama kasara tɛrr, ka a tɛgɛ anu bara min ma wo la nun.

²¹ Mari si a fɔ dugi ye ko, “I kana kilan. I ni nyagalen ka a tɛgɛ a si na min ma i ye.”

²² Mari si a fɔ kolo-fannu ye ko, “Wo kana kilan. Bin-fɛrɛntoe le dugi ma. Kɔlɔmanu si gbɔ. Ki-fannu si gbɔ tisikiri!”

²³ Mari si a fɔ wole, Yerusalɛm kɛnu fanan ye ko wo ni sewa ka a tɛgɛ ale Mari ara min ma wo ye. A ara banda-yi kun-fɔlɛ di wo ma, ado a ara bandɛ yirika lana wo ye min si wola sɛnɛnu tabɔ.

²⁴ A ko wola gbere-kolenu na si fa dɔn-fannu na. Wola baan-barɛnu anubɛ wola tulu-barɛnu na si fa pen!

²⁵ Kɛlɛ-dannu bara wo foo min bɛɛsi la san-dande kɛnu kɔrɔ, a ko a si wo bɛɛ lasɛgi wo ma. A ko ale le nyɛrɛ-nyɛrɛ ya kɛlɛ-dan wonu nana wo kan ma nun.

²⁶ Kɔnɔ a ko dɔn-fan ra si boroko-baraka wo gba ma, kurukurun ti a ban, tarali ti a ban. Wo si a ma, wo ni ale wota Mari Alla tanto. Ale ara kabana-koenu kɛ wo ye. Sibolo-gbɛrɛkɛ-mɔgɛnu ti anu yɛ layigi wola sole rɔ tun.

²⁷ A ko wo le si a yira wo la ko wole, Isirɛla mɔgɛnu ni a lɔn ko ale Mari ye wo tɛma. A ko wo si a lɔn ko ale Mari le wota Alla la. Ale le kelan ye nyɔ Allayɛ la, ado a ko a ti sɔn, mɔgɔ-wo-mɔgɔ ni anu yɛ layigi wole, ala mɔgɛnuna sole rɔ tun.

Marita Tele Wara-Koe

²⁸ A ko wo wa ban, a si ata Ni-Sɛnimɛ layigi mɔgɛ bɛɛ ma. A ko wola den-keinu anubɛ wola dunmusinu si wɔlɔyiya-kumɛnu fɔ. Wola kinanu si kiyonu sa, ko-rayen si kɛ wola kemini-mɛsɛnu ye.

²⁹ Hali minnu bi wɔlila bɔn la, kei wo, musi wo, a ko wo wati wa ke, a si ata Ni-Sɛnimɛ layigi wo bɛɛ kuma.

³⁰ A ko a si kabana-koenu yira wo la san-kole rɔ anubɛ dugu-kole kuma. Wo si yele anubɛ ta-mɛlan anubɛ ta-sisi yen wo yɛ la.

³¹ Yanni Marita tele-makilannɛ wo ni ke, tele si fin, karɛ si wulen iko yele.

³² Kɔnɔ min bɛɛ si Mari rakele anu dɛnbɛn-koe la, wonu na si kanan wulɔn, ado Yerusalɛm so-burɔ-mɔgɛ donu fanan si kisi wulɔn iko Mari ara a fɔ nya min. A ko a wa min yabɔ ka a kele, a si wo to a niyi la.