Yowɛli 1 - ALLALA KUMƐ

¹ Mari ya kilayɛ min don Pɛtuwɛlila den Nɛbi Yowɛli bolo, wo le kɛ la.

Mɔgɛnu Di-Koe Sɛnita-Fannu Kasara-Koela Ko La

² Wole kinanu, wo ni wo tole masɔ! Wole Yuda nyamanita-mɔgɛnu, wo ni wo tole masɔ! Ha bi, kɛ nyɔgɔn ko sufa ara ma wo benbanuta tele, ka, wotɛ?

³ Nba, wo ni a rakaran wola dannu ye. Wonu fanan ni a rakaran anuna dannu ye. Wonu fanan bɛrɛn ni a rakaran anuna dannu ye.

⁴ Kondon kurun-siyaman nara ka mala ki-fannu dɔn. Kurɔn doi tenbi min tola, kurɔn doi ye nala wo dɔnna.

⁵ Wole gbɛɛ-minna-wɛnu, wo di bawo kondɔnnu bara wola gbɛɛ-kurinu nato dogbe!

⁶ Kɛlɛ-dannu nara bui mala nyamanɛ ma iko kondon-siyamɛnu. Anu makilanta, ado mɔgɔ ti anu dan lɔn siyayɛ bolo. Anuna faannu dɛ ye a la iko yara-nyin.

⁷ Kɛlɛ-dannu bara mala ki-fannu tinya iko kondɔnnu si ki-fannu tinya nya min. Anu bara ban mala ki-fan wonu gbole bɔla a ma ha wonu bara to kolo-gbansan iko tɔnkasɛnu si kɔlɔmanu maka nya min.

⁸ Wole Yuda kɛnu, wo di biribiri iko sunkurun-mabiranɛla kei wa faga.

⁹ Mala dɛgɛ-munku-sarakɛnu anubɛ mala minni-sarakɛnu bara ban. Saraka-masɔlɛnu fanan bi dila bawo saraka-wo-saraka sa Mari anubɛ a Bato-Bɔnla ko la tun!

¹⁰ Sɛnɛ bɛɛ ara ma gbɛkole la. Dugi fanan bi dila bawo sɛnita-fannu anubɛ ki-fannu bara kasara.

^11-12 Wole sɛni-salɛnu, wo di soee, bawo wola sɛnita-fannu bara tinya pɔ! Wole ki-fen-kilɛnu, wo dɛ sa-a-rɔ lungbɔn, bawo wola ki-fannu na ara gbala nyawo! Ki-fannuna gbalɛ, wo le ya a ma, mɔgɛnu yisi ma ara gboya.

¹³ Wole saraka-masɔlɛ minnu bi wɔlila saraka-mintan-tinɛ, wo ni kasa-kurɛnu don ka di biribiri! Wo ni to mata Alla Bato-Bɔn la ka ki dila kudu, bawo fui-fan anubɛ minni-fen, wonu fenfen sa nala Bato-Bɔn la tun.

¹⁴ Wo ni ladɛn kɛ Bato-Bɔn la. Bɛɛ ni sunyɛ don. Wo ni Yuda mɔgɔ-banu anubɛ a mɔgɛ bɛɛ kundɛn. Anu damasi la ni dɛn mata Mari Alla Bato-Bɔn la, anu si di a dala kan min.

¹⁵ Marita wati ara gbɛrɛn. Tele wo nyɛrɛ wa ke, Mari Sɛnbɛ-Bɛɛ-Tigi si tinyalɛ kɛ, ado tinyalɛ wo, kasarɛ le ye a kɔma.

¹⁶ Mala dɔn-fannu bi tinyana ma yala kɔnɔ a ma-kunya sa. Sewa sa mata Alla Bato-Bɔn la mumɛ!

¹⁷ Mala suginu bara ban tinyana bawo dugi ra ara gbala todo! Mala bondɔnnu bara tinya bawo fenfen sa ma bolo ma si min nadon anu na.

¹⁸ Ninkinu bi wundana bawo bin sa anu bolo anu si min dɔn, ado hali sagɛnu, a gbɛlɛ anu kuma.

¹⁹ Mari, i yandi, n bi dila i da la mala ki-fannuna ko la. Kolo-fannu de-nyini-tinɛnu ma ara nunku iko tɛ wa binyɛ mintan gburr!

²⁰ Hali bintɔ-sogenu dɛ la ara ka faa, bawo yinu bara ban gbalala. Tɛ ara mala firɛ mintan terr!