Yona 3 - ALLALA KUMƐ

Ninɛfa Mɔgɛnuna Tubi-Koe

¹ Mari ya a fɔ Nɛbi Yona ye tun ko,

² “I lasɔ, i ni ta Ninɛfa so-karantan wo rɔ ka nna sarakanɛ lake nyɔ-mɔgɛnu ma iko n bara min fɔ i ye kɛ la.”

³ Nɛbi Yona ya Mari kuman-kan to a gbɛ rɔ. A tara Ninɛfa. Ninɛfa wo, so-belebele le wo la. Mɔgɛ si tele sawa bɔ soe wo ratɛgɛ tinɛ.

⁴ Nɛbi Yona donta soe wo ratagama rɔ. A telenta soe wo ratagamana. Wo kɔma, a donta Allata kumɛ mayɔn rɔ mɔgɛnu ye ko, “A ara to tele bi-nani, Ninɛfa kɛ ye nala halakila.”

⁵ Ninɛfa mɔgɛnu lara Allata sarakanɛ la. Anu dama tora kan kelen tɔ. Anu ko mɔgɛ bɛɛ ni kasa-kurɛ kɛ anu kan ma ka a yira ko anu bara tubi. Bolo-kolon wo, fen-tigi wo, mɔgɛ bɛɛ ya sunyɛ don.

⁶ Ninɛfa mansɛ ya wo lamɔɛn min kɛ, a ya a lakɔɛnma ala mansaya-waganɛ rɔ ka ala mansaya-duruki bɔ a kan na ka kasa-kurɛ kɛ a kan ma. A ya a sigi bugurɛ rɔ.

⁷ Mansɛ ya kumɛ kɛ fɔ Ninɛfa mɔgɛ bɛɛsi ye ko, “Mabɛ nna mɔgɔ-banuna tɔn le kɛ la ko, ‘Mɔgɔ wo, kolo-fen wo, anu fenfen kana fen dɔn ka anu min.

⁸ Mɔgɛ bɛɛsi ni kasa-kurɛ kɛ a kan ma ka donu kiri anuna kolo-fannu na. Mɔgɛ bɛɛ ni anu sɔn-yogomɛnu boloka ka fara ko-yogomɛnu na. Ma ni Alla matara sɛnbɛ la.

⁹ Tumado, Alla si a fonde yɛlɛma ma wara la. Tumado, ma ti faga tun ata diminyɛ bolo.’ ”

¹⁰ Anu bara min bɛɛsi ma, Alla ya wo yen. A ya a lɔn worɔ anu bara anu sɔn-yogomɛnu boloka. Woletɔ a ya a fonde yɛlɛma. A ma sɔn anu halaki-koe ma tun iko a ya a fɔ nya min nun.