Yona 2 - ALLALA KUMƐ

Yonata Alla Matara-Koe

¹ Wo tumɛ Nɛbi Yona ye yɛgɛ burɔ, a ya ata Mari Alla matara.

² N bi yakɔrɔ-mamɔɛ rɔ tumɛ min, ile Mari ya n dɛnbɛ. N bi lakira tumɛ min, i ya n di-kɛ-kan lamɔɛn.

³ I ya n nabui kɔgɔ-yi-dumɛ rɔ ka n nayigi dumɛ kuri la. I tora ila yi latugula n kun na.

⁴ N ya a lɔn nun ko i wara n kɔn. N ya a lɔn nun ko n ti ita bon-sɛnimɛ yen tun.

⁵ N tora yi kɔrɔ ha n niyi ragbɛrɛnta n ma. Ninkinarɛ miniminita n kunyɛ ma.

⁶ I ya n nayigi kɔgɔ-yi kɔrɔ ha kɛnkɛn dabira tinɛ. Yi kankanta n ma, a tora sɛ, a ni lakira-dɛ latogon n ma. Kɔnɔ ile Mari Alla ya n kɛndɛ labɔ dumɛ wo kuri la ka n nayɛlɛ.

⁷ N ya a lɔn tumɛ min ko n bara gbɛrɛn kanba-dɛ ma, n ya ile Mari matara. I ya n kuman-kan lamɔɛn ita bon-sɛnimɛ la.

⁸ Minnuna ko sa i wara-koe rɔ tun, wonu denu bi bɛsi-fufafuyinu kɔla.

⁹ Kɔnɔ nde si tantoli-bɛti bɔ ile ye. N si sarakɛ bɔ ile ye. N si nna lanyiri latɔnbagaya i ye. Ile Mari kelen pe le si ke mɔgɔ kisila.

¹⁰ Mari ya a ma, yɛgɛ ya Nɛbi Yona lateseri kɛnkɛn ma.